Levítico 13 - Q'eqchi Bible

Eb' li saqlep rixeb'

¹ Li Qaawa' kiraatina laj Moisés ut laj Aharón, ut kixye reheb':

² “Wi junaq wank xyajel li xtz'uumal, mare saqijoj, mare siip, mare saqchip li nak'utunk chiru li xtib'el, malaj ut chanchan saqlep li wank chirix, tento taak'ame'q rik'in laj Aharón laj tij malaj ut rik'in junaq reheb' li ralaleb'.

³ Laj tij taaril chi us li xtz'uumal: wi ak xsaqo'k li rismal chiru li ra ut li yajel cham wank sa' li tib'elej, ch'olch'o naq a'an saqlep. Ut laj tij taaril ut tixye naq muxb'il li poyanam a'an.

⁴ “Wi ut saq li sal wank chiru li tib'elej, ab'an ink'a' jwal cham okenaq sa' li tib'elej, chi moko li ismal xsaqo'k xb'aan, laj tij tixtz'ap li yaj ut a'in taakanaaq xjunes chiru wuqub' kutan.

⁵ Sa' xwuq li kutan taaril wi' chik, ut wi li yajel sa' xna'aj ajwi' wank ut ink'a' xjek'i rib' chiru li xtz'uumal, tixtz'ap wi' chik wuqub'aq kutan.

⁶ Sa' xwuq li kutan taaril wi' chik, ut wi li yajel yo chi sachk ut ink'a' xjek'i rib' chiru xtz'uumal, toja' naq laj tij tixye naq saq chik ru li yaj: a'an yal jun katzkatzil xox chiru li xtz'uumal. Li yaj tixpuch' li raq' ut ch'ajob'resinb'il chik taakanaaq.

⁷ “Ab'an wi li katzkatz yo chi nujak chiru li xtz'uumal li yaj, chirix naq ak x'ile'k xb'aan laj tij ut xyeemank naq ink'a' muxb'il, tento taaxik junsut chik rik'in laj tij.

⁸ Laj tij taaril chi us li yaj ut wi ak xpukank li katzkatz chiru chixjunil li xtz'uumal, laj tij tixye naq muxb'il chik li yaj, xb'aan naq wank saqlep chirix.

⁹ “Naq saqlep rix junaq poyanam, tento xk'amb'al rik'in laj tij.

¹⁰ Laj tij taaril chi us: wi saq li xsiipal li tib'elej ut xsaqo'k li rismal, ut nak'utunk li rax tib' chisa' li siip,

¹¹ naraj naxye naq a'an saqlep li junelik na'elk chiru li tib'elej. Laj tij tento tixye naq muxb'il li poyanam a'an, ut moko aajel ta ru naq tixtz'ap sa' ochoch, xb'aan naq ak muxb'il.

¹² “Wi li saqlep nak'iik chi junpaat ut ak xpukank chiru chixjunil li tz'uumaejl, natiklaak chi roq ut nawulak toj sa' xjolom li yaj, toj b'arwi' laj tij taaruuq rilb'al,

¹³ laj tij taaril chi us, ut wi li saqlep xsutunk chiru chixjunil li xtib'el, laj tij tixye naq moko muxb'il ta, xb'aan naq li saqlep xsaqo'k ut a'an xkanaak chi ch'ajob'resinb'il chik ru.

¹⁴ Ab'an sa' li kutan taak'utunq wi' sankil xox, taakanaaq chi muxb'il.

¹⁵ Toja' naq laj tij taaril chi us li rax tib' ut tixye naq muxb'il, xb'aan naq li sankil xox, a'an reetalil naq muxb'il li yaj: a'an saqlep.

¹⁶ “Wi li xox taasaqo'q wi' chik, li yaj tento taaxik rik'in laj tij

¹⁷ re naq taaril chi us, ut wi laj tij taaril naq li rax xox xsaqo'k wi' chik, tixye naq ink'a' muxb'il li yaj, xb'aan naq ak xkanaak chi ch'ajob'resinb'il ru.

¹⁸ “Wi junaq wank xox chirix ut taak'iraaq,

¹⁹ ab'anan li xox taasipo'q malaj taasaqo'q ut taakaqo'q, tento tixk'ut chaq rib' chiru laj tij.

²⁰ Wi laj tij tixk'e reetal naq li ra cham chik x'ok sa' li xtib'el li yaj, ut saq chik li rismal chisa', toja' naq tixye naq muxb'il li poyanam a'an: saqlep li x'elk sa' li xox.

²¹ Wi taaril naq li ra maak'a' junaq saqi ismal chisa' chi moko okenaq chi us sa' li xtz'uumal, yo b'an chi sachk, toja' naq tixtz'ap sa' ochoch li poyanam a'an chiru wuqub' kutan.

²² Wi li yajel yo chi pukank chiru li xtz'uumal, laj tij tixye naq saqlep rix ut muxb'il li poyanam a'an.

²³ Ab'an wi ink'a' xpukank li yajel chi moko xnimank, naraj naxye naq a'an yal reetalil li xox, ut laj tij tixye naq ink'a' muxb'il li poyanam a'an.

²⁴ “Wi junaq wank xk'atalal chiru xtz'uumal li xtib'el, ut chiru a'an taak'utunq junaq kaqisal malaj saqisal,

²⁵ laj tij taaril chi us. Wi xsaqo'k li ismal wank sa' li sal ut cham okenaq sa' xtib'el, naraj naxye naq saqlep li x'elk sa' li k'atalk. Ut laj tij tixye naq a'an muxb'il xb'aan naq saqlep rix.

²⁶ Ut wi laj tij tixk'e reetal naq maak'a' junaq saqi ismal chisa' chi moko cham okenaq li sal sa' xtib'el, yo b'an chi sachk, toja' naq tixtz'ap sa' ochoch li poyanam a'an chiru wuqub' kutan.

²⁷ Sa' xwuq li kutan laj tij taaril wi' chik ut tixtz'il rix li yajel a'an: wi li sal ak xpukank chiru chixjunil li xtz'uumal, tixye naq muxb'il li poyanam a'an, xb'aan naq saqlep rix.

²⁸ Ab'an wi li sal ink'a' xpukank chi moko xk'ihank chiru xtz'uumal ut yo chi sachk, naraj naxye naq yal siip sa' xk'ab'a' li k'atalk. Jo'kan laj tij tixye naq ink'a' muxb'il li yaj a'an, xb'aan naq a'an yal reetalil li k'atalk.

²⁹ “Naq junaq winq malaj junaq ixq wan xox sa' xjolom malaj ut chi xmach,

³⁰ laj tij taaril chi us li xox. Wi nak'utunk naq jwal okenaq li xox sa' xtib'el ut q'anq'an li ismal ab'an ink'a' chik k'i, laj tij tixye naq muxb'il li poyanam a'an, xb'aan naq wank xyajel, naraj naxye naq wank saqlep sa' xjolom malaj chi xmach.

³¹ Ut wi laj tij taaril naq li ra ink'a' jwal okenaq sa' xtib'el chi moko wank q'eqi rismal, toja' naq tixtz'ap li poyanam a'an chiru wuqub' kutan.

³² Sa' xwuq li kutan laj tij taaril wi' chik li ra, ut wi li ra ink'a' xpukank ut ink'a' cham okenaq sa' xtib'el, chi moko q'an li rismal,

³³ laj tij tixye naq li yaj tixjo li xmach (ab'an ink'a' tixjo wan wi' li ra), ut tixtz'ap wi' chik chiru wuqub' kutan.

³⁴ Sa' xwuq li kutan laj tij taaril wi' chik li ra, ut wi ink'a' xpukank chi moko cham okenaq sa' xtib'el, laj tij tixye naq ink'a' muxb'il li yaj a'an, ut a'in tixpuch' li raq' ut taakanaaq chi ch'ajob'resinb'il ru.

³⁵ Ab'an wi, chirix li xch'ajob'resinkil rib' li yaj, yooq chi pukank li ra chiru xtz'uumal,

³⁶ laj tij tento taaril jun sutaq chik li yaj. Wi xpukank li ra chiru xtz'uumal, moko aajel ta ru naq tixsik' li q'ani ismal: ch'olch'o naq muxb'il li poyanam a'an.

³⁷ Ab'an wi laj tij tixk'e reetal naq ink'a' xnimank li ra ut x'elk chaq q'eqi ismal, naraj naxye naq k'irajenaq chik li poyanam ut moko muxb'il ta. Toja' naq laj tij tixye naq ch'ajob'resinb'il chik ru li poyanam a'an.

³⁸ “Wi junaq winq malaj junaq ixq wanq saqi sal chiru li xtz'uumal,

³⁹ laj tij taaril chi us, ut wi taak'utunq saqisal chiru li xtz'uumal ink'a' jwal saqsaq, a'an reetalil naq moko nim ta li yajel a'an: ink'a' muxb'il li poyanam a'an.

⁴⁰ “Wi junaq winq taat'ane'q li rismal xjolom ut taakanaaq chi t'uru' li xjolom, ink'a' muxb'il li winq a'an.

⁴¹ Wi li rismal wank sa' xb'een li xpeekem taat'ane'q ut taakanaaq chi t'uru', naraj naxye naq ink'a' ajwi' muxb'il.

⁴² Ab'anan wi taak'utunq junaq sal saq ut kaq sa' xt'uru'il li xjolom, a' yaal ma chiru malaj chirix, a'an reetalil naq aran yo chi elk li saqlep.

⁴³ Toja' naq laj tij taaril chi us, ut wi saq ut kaq li xsiipal wank sa' li t'uru', jo' nak'utunk li saqlep chiru li xtz'uumal li tib'elej,

⁴⁴ li winq a'an saqlep rix, xb'aan naq wank xyajel sa' li xjolom. A'an jun li winq tz'ajn ru li xtib'el, ut jo'ka'in tixye resil laj tij.

⁴⁵ “Ani saqlep rix, tento twanq chi q'ichb'ilaq li raq' ut ink'a' lanb'ilaq li xjolom; ka'ajwi' tixtz'ap b'ayaq li xnaq' ru ut tixjap re chi xyeeb'al: «Muxb'ilin! Muxb'ilin!», cha'aq.

⁴⁶ Jo' najtil wanq li saqlep chirix, taakanaaq chi tz'ajn ru li xtib'el ut tento wanq xjunes, toj chirix li na'ajej wankeb' wi' xmuheb'aaleb' li tenamit.

⁴⁷ “Naq taak'utunq junaq tz'ajn chiru junaq aq'ej yiib'anb'il rik'in tuuxnoq' malaj liin,

⁴⁸ chiru li noq' malaj chiru li ak kemb'il, malaj chiru k'a'aq chik re ru yiib'anb'il rik'in tz'uum,

⁴⁹ ut wi li tz'ajn chiru a k'a'aq re ru a'an rax malaj kaq na'ilok, li tz'ajn a'an reetalil li saqlep ut tento taak'utmanq chiru laj tij.

⁵⁰ Laj tij taaril chi us li tz'ajn, ut tixtz'ap chiru wuqub' kutan eb' a k'a'aq re ru tz'ajninb'il ru.

⁵¹ Sa' xwuq li kutan taaril wi' chik chi us li tz'ajn. Wi xpukank chiru li aq'ej malaj chiru kemb'il t'ikr, malaj chiru li tz'uum malaj ut k'a'aq re ru yiib'anb'il rik'in tz'uum, li tz'ajn a'an reetalil li xiwajel saqlep, ut eb' li k'a'aq re ru a'an, muxb'ileb'.

⁵² Jo'kan naq yalaq k'a'aq re ru wan wi' li tz'ajn a'an, tento xk'atb'al chixjunil, xb'aan naq a'an xiwajel saqlep.

⁵³ Ab'an wi laj tij taaril naq ink'a' xpukank li tz'ajn malaj li sal,

⁵⁴ tixk'e chi ch'aje'k malaj puch'e'k li tz'ajn a'an ut chiru wuqub' kutan taatz'apmanq li k'a'aq re ru li wan wi' li tz'ajn.

⁵⁵ “Chirix naq ak xch'ajmank malaj xpuch'mank li tz'ajn malaj li sal, laj tij taaril wi' chik ut tixtz'il rix. Wi tixk'e reetal naq li tz'ajn toj maji' nasachk, naraj naxye naq muxb'il li k'a'aq re ru wan wi'; tento taak'atmanq, us ta ink'a' xpukank li tz'ajn: a'an jun q'aak li yo chi xk'ulb'al li k'a'aq re ru a'an, chisa' malaj ut chirix.

⁵⁶ Ab'anan naq ak xch'ajmank li tz'ajn, laj tij tixk'e reetal naq x'ok chi sachk li tz'ajn, tixjotz ru li t'ikr, ru li tz'uum malaj ru li ak kemb'il.

⁵⁷ Ab'an wi taak'utunq wi' chik li tz'ajn ut taapukanq chiru li aq'ej malaj chiru li kemb'il t'ikr malaj ut chiru li k'a'aq re ru yiib'anb'il rik'in tz'uum, taak'atmanq li k'a'aq ru tz'ajninb'il ru.

⁵⁸ Li aq'ej malaj li kemb'il t'ikr jo' ajwi' li k'a'aq ru yiib'anb'il rik'in tz'uum, b'arwi' x'elk li tz'ajn naq kich'ajmank, toj taach'ajmanq wi' chik junsutaq; toja' naq taakanaaq chi ch'ajob'resinb'il ru”.

⁵⁹ A'an a'in li chaq'rab' chirix li saqlep li nawank chiruheb' li aq'ej yiib'anb'il rik'in tuuxnoq' malaj liin, malaj chiruheb' li kemb'il t'ikr malaj ut chiruheb' li k'a'aq re ru yiib'anb'il rik'in tz'uum, re naq taaruuq xyeeb'al naq muxb'ileb' malaj ut ink'a' muxb'ileb'.