Levítico 12 - Q'eqchi Bible

Xch'ajob'resinkil rib' li ixq chirix xyo'lajik li xk'uula'al

¹ Li Qaawa' kiraatina laj Moisés ut kixye re:

² “Ye reheb' laj Israel: Naq junaq ixq taakanaaq sa' yu'am ut taayo'laaq junaq xch'ina teelom, a'an jun tz'ajnil ixq chiru wuqub' kutan, jo' naq naxk'ul li xpuch'unik rajlal po.

³ Waqxaqib' kutan chik xyo'lajik, naq li k'uula'al tixk'ul li sirkunsisyon.

⁴ Ab'an li na'b'ej yooq chi xch'ajob'resinkil rib' chiru oxlaju xka'k'aal kutan chik. Ink'a' taaruuq xch'e'b'al junaq k'a'aq re ru osob'tesinb'il chi moko taaruuq chi ok sa' li Loq'laj Na'ajej, toj te'nume'q chixjunileb' li kutan re xch'ajob'resinkil rib'.

⁵ Wi ut taayo'laaq junaq ch'ina ixqa'al, tz'ajnaq ru li na'b'ej chiru wiib' xamaan, jo' naxk'ul rajlal po, ut yooq ajwi' chi xsaab'esinkil rib' chiru waqib' xkaak'aal kutan chik.

⁶ “Naq akaq xe'nume'k chixjunileb' li kutan re xch'ajob'resinkil rib' chirix xyo'lajik li k'uula'al, us ta teelom malaj ch'ina ixqa'al, li na'b'ej tento tixk'am sa' rokeb'aal li Loq'laj Muheb'aal jun karneer aj jun chihab', re taayeechi'imanq cho'q k'atb'il mayej, ut jun mukuy malaj jun k'ook'ob' cho'q mayej chirix li maak. Tixq'axtesiheb' re laj tij,

⁷ ut laj tij tixyeechi'iheb' chiru li Qaawa' re xtojb'al rix li xmaak li ixq. Chi jo'kan ch'ajob'resinb'il chik taakanaaq li ixq rik'in li xyajel”. A'an a'in li chaq'rab' chirix xyo'lajikeb' li teelom malaj ixqa'al.

⁸ Ut wi li na'b'ej ink'a' taaruuq chi xk'eeb'al junaq karneer, naru tixk'e wiib'aq mukuy malaj wiib'aq k'ook'ob': jun taayeechi'imanq cho'q k'atb'il mayej ut li jun chik cho'q mayej chirix li maak. Toja' naq laj tij tixtoj rix li xmaak li ixq a'an, ut a'in ch'ajob'resinb'il chik taakanaaq.