Lamentaciones 3 - Q'eqchi Bible

Li rox xrahil xch'ooleb' laj Jerusalén

¹ Laa'in jun winq li xinkuy naab'al li rahilal, xb'aan xnimal xjosq'il li Qaawa' sa' inb'een.

² A'an xk'amok we sa' li aak'ab' ut xmin wu chi b'eek b'arwi' maak'a' li saqenk.

³ Ka'ajwi' sa' inb'een naxk'ut li xnimal xwankil li ruq', ut nikinxrahob'tesi chixjunil li kutan.

⁴ X'oso'k lintib'el ut lintz'uumal; li Yos xtoqi chixjunil linb'aqel.

⁵ Sutsuukin yalaq b'ar xb'aan rahilal ut ch'a'ajkilal.

⁶ Xinxk'e chi wank sa' li aak'ab', jo'eb' li kamenaq li ke'kamk najter.

⁷ Xinxtz'ap re naq ink'a' chik tin'elq; xinxb'ak' rik'in ch'iich' li q'axal aal.

⁸ Us ta ninjap we chi xpatz'b'al intenq'ankil, ab'an A'an ink'a' naraj wab'inkil.

⁹ Xtz'api linb'e rik'in ninqi pek ut xjal linb'e re naq tinsachq.

¹⁰ Li Yos chanchan jun tz'uqtz'un cho'q we, kama' jun kaqkoj yo chi woyb'eninkil.

¹¹ Sa' xsachb'esinkil linb'e kok' q'uy xinxkanab', chi k'ajo' xsachik linch'ool.

¹² Xkawresi li xsimaj, ut laa'in xinxjayali chiru li ral xsimaj.

¹³ Xinxkut chi ral simaj, ut q'axal cham xe'okje'k sa' lintib'el.

¹⁴ Xinxk'e chi se'eek xb'aaneb' chixjunil li tenamit; chixjunil li kutan yookeb' chi weetz'unkil.

¹⁵ Li Qaawa' xinxnujob'resi chi rahil ch'oolej; k'ajo' xk'ahil li ha' xk'e chi wuk'.

¹⁶ Xtoqi li ruuch we chi pek ut xinxtolk'osi sa' pojtz'.

¹⁷ Maak'a' chik tuqtuukil usilal sa' li waanm ut xsachk sa' inch'ool k'aru li sahil ch'oolej.

¹⁸ Ut xinye: “Maak'a' chik inmetz'ew, x'oso'k li woyb'enihom rik'in li Yos”.

¹⁹ Najultiko'k we linneb'a'il ut linjunaatalil, naq junes rahil ch'oolej ut xyot'ik li waanm nink'ul.

²⁰ Junelik najultiko'k we: ka'aj chik maa na'elk li waanm wik'in.

²¹ Ab'an wank jun li nak'ojlaak wi' inch'ool ut xaqxo wi' li woyb'enihom:

²² ninnaw naq li xrahom li Qaawa' maak'a' roso'jik, ut li ruxtaan ink'a' nalajk.

²³ Rajlal eq'la na'ak'o'k li xrahom: k'ajo' xnimal li xtiikilal xch'ool!

²⁴ Ut ninye sa' li waanm: “Li Qaawa' a'an linb'ihomal; jo'kan naq xaqxo li woyb'enihom rik'in”.

²⁵ Chaab'il li Qaawa' rik'ineb' li neke'yo'onink rik'in; A'an chaab'il rik'ineb' li neke'sik'ok re.

²⁶ Q'axal us royb'eninkil naq li Yos tooxtenq'a, chi k'ojk'ooq li qach'ool rik'in.

²⁷ Jwal us cho'q re li winq xkub'sinkil rib' chalen chaq sa' xsaajilal.

²⁸ Li winq tento tkanaaq xjunes ut ink'a' taawech'inq, naq rajom li Qaawa' chi jo'kanan.

²⁹ Tento tixkub'si xwankil toj toxrutz' li ch'och': mare anchal toj twanq royb'enihom.

³⁰ Chixk'ehaq li xko re li ani na'ajok sak'ok re, ut tixkuy li k'iila hob'e'k.

³¹ Xb'aan naq li Qaawa' ink'a' nokooxtz'eqtaana chi junajwa.

³² Us ta naxk'e xrahil qach'ool, ab'an naruxtaana wi' chik qu sa' xk'ab'a' li xnimal xrahom.

³³ Xb'aan naq ink'a' nasaho'k xch'ool chi rahob'tesink, chi moko chi xk'eeb'al eb' li ralal xk'ajol sa' raaxiik'.

³⁴ Li Qaawa' ink'a' nawulak chiru naq neke'rahob'tesiik li b'ak'b'ookeb' sa' tz'alam,

³⁵ chi moko naq namaq'e'k li xk'ulub' junaq poyanam, ut na'uxk a'an chiru li Nimajwal Yos.

³⁶ Wi ink'a' naraqmank aatin sa' tiikilal, ma ink'a' tab'i' ra sa' xch'ool li Qaawa'?

³⁷ Maa'ani naru tixb'aanu li k'aru ak xyehom, wi li Qaawa' ink'a' xyehok re.

³⁸ Naqak'ul li us ut li ink'a' us, xb'aan naq jo'kan naraj li Qaawa'.

³⁹ Ut wi laa'o tz'aqal aj maak, k'a'ut naq naraho'k qach'ool xb'aan li rahilal naqak'ul?

⁴⁰ Qak'ehaq reetal chi us li qayu'am, ut sutq'iiqo wi' chik rik'in li Yos.

⁴¹ Qawaklesiiq qach'ool ut tz'aamanqo chiru li xYos li choxa.

⁴² Xoomaakob'k ut xqaq'et laawaatin, at Qaawa'; ut laa'at ink'a' xakuy qamaak.

⁴³ K'ajo' laajosq'il! Xoohaarahob'tesi ut xasach li qayu'am chi ink'a' xawil xtoq'ob'aal qu.

⁴⁴ Xalan aawib' sa' choql re naq ink'a' taawab'i li qatij.

⁴⁵ Xoohaak'e sa' xutaan chiruheb' chixjunil li poyanam: chanchano li mul li maak'a' nokoo'ok wi'.

⁴⁶ Chixjunileb' li xik' neke'ilok qe nokoohe'xhob'.

⁴⁷ X'ok qaxiw, nokoosiksotk, xjuk'e'k li qawankil ut xoosache'k: a'an a'in li k'aru xootz'aqk.

⁴⁸ Chanchan roqha' li xya'al wu naq ninyaab'ak, xb'aan xsachik linraarookil tenamit.

⁴⁹ Ink'a' ninch'anaak chi yaab'ak, xb'aan naq maak'a' nak'ojob'ank inch'ool,

⁵⁰ toj reetal li Qaawa' taaril chaq xtoq'ob'aal qu sa' choxa.

⁵¹ Jwal ra xsa'eb' li wu xb'aan li rahilal xe'xk'ul li rixqilal lintenamit.

⁵² Eb' li xik' neke'ilok we xine'xchap chi maak'a' xyaalal, jo' nachape'k junaq xik'anel xul.

⁵³ Xine'xkut chi yo'yo sa' jun li jul ut xe'xtuub' li pek sa' inb'een.

⁵⁴ Li ha' xwulak toj sa' linjolom, ut laa'in xink'oxla: “Xin'oso'k”.

⁵⁵ Toj sa' xchamal li jul xinyaab'a chaq laak'ab'a', at Qaawa',

⁵⁶ ut laa'at xawab'i xyaab' linkux: “Maatz'ap laaxik chi rab'inkil lintij, naq ninpatz' intenq'ankil chawu”, chankin.

⁵⁷ Xinyaab'a laak'ab'a', ut xatjilok chink'atq: “Matxiwak!”, chankat we.

⁵⁸ At Qaawa', xinaatenq'a ut xakol linyu'am.

⁵⁹ Xak'e reetal li rahilal xe'xb'aanu we chi maak'a' inmaak; raqon aatin chiwix sa' tiikilal.

⁶⁰ Laa'at xawil naq xik' nikine'ril; xak'e reetal chixjunil li neke'xk'uub' re inrahob'tesinkil.

⁶¹ Xawab'i chanru nikine'xhob', at Qaawa', ut li k'aru neke'xk'uub' chiwix.

⁶² Laa'at nakanaw li neke'xye eb' li xik' neke'ilok we, naq chixjunil li kutan neke'xk'uub' rahilal chiwix.

⁶³ Chak'e reetal li k'aru neke'xb'aanu: junelik yookeb' chinhob'b'al.

⁶⁴ At Qaawa', eeqajun sa' xb'eeneb' jo' chanru xk'ulub'eb'.

⁶⁵ Cha'aalob'resi li xch'ooleb' ut chamajewaheb'.

⁶⁶ Xb'aan xnimal laajosq'il charahob'tesiheb' ut sach ruheb' sa' xb'een li ruuchich'och' a'in.