Jueces 9 - Q'eqchi Bible

Rokik laj Abimélek cho'q awab'ej

¹ Laj Abimélek, ralal laj Yerubahal, koho Sikem chi aatinak rik'ineb' li xkomon li xna' ut rik'in chixjunileb' li wankeb' sa' rochoch li xyuwa' li xna', ut kixye reheb':

² “B'aanuhomaq usilal, yehomaq a'in sa' xxikeb' chixjunileb' li xjolomileb' laj Sikem: «K'aru us cho'q eere: ma us naq eb' li lajeeb' xkaak'aal chi ralal laj Yerubahal te'taqlanq sa' eeb'een malaj us naq jun ajwi' taa'awab'ejinq?». Chijultiko'q ajwi' eere naq laa'in tz'aqal leekomon”, chan.

³ Toja' naq eb' li xkomon li xna' ke'xseeraq'i a'in reheb' chixjunil li xjolomileb' laj Sikem, ut ke'xk'ul xch'ool naq laj Abimélek taataqlanq sa' xb'eeneb' xb'aan naq ke'xye chirib'ileb' rib': “A'an tz'aqal qakomon”, chankeb'.

⁴ Ke'xchap lajeeb' xkaak'aal chi tumin plaat, xtuminal li rochochil laj Bahal-Berit, ut ke'xk'e re laj Abimélek. Chiru li tumin a'in laj Abimélek kixtojeb' winq ink'a' useb' xna'leb' re naq te'xik chirix. Koheb'

⁵ aran Ofrá, sa' rochoch li xyuwa', ut ke'xkamsiheb' li lajeeb' xkaak'aak chi ralal laj Yerubahal, riitz'ineb' rib' rik'in laj Abimélek, sa' xb'een jun chi pek. Ka'aj chik kikole'k laj Jotán, xch'iip laj Yerubahal, xb'aan naq kixmuq rib'.

⁶ Toja' naq ke'xch'utub' rib' chixjunileb' li xjolomileb' laj Sikem ut chixjunileb' laj Bet-Miló, ut ke'xxaqab' laj Abimélek cho'q awab'ej, chi xk'atq li ji re li xaqxookil pek li wank aran Sikem.

Li jaljookil ru aatin chirixeb' li che'

⁷ Naq laj Jotán kirab'i resil li ke'xb'aanu, kitaqe'k sa' xb'een li tzuul Karisín ut aran kixjap re chi xyeeb'al: “Ab'ihomaqin, ex xwinqilal Sikem, ut li Yos chi'ab'inq eere.

⁸ “Sa' jun kutan ke'xch'utub' rib' eb' li che' re xxaqab'ankil jun li awab'ej reheb', ut ke'xye re li oliiw: «Laa'ataq laj jolominel qe», chankeb'.

⁹ Kichaq'ok li oliiw ut kixye: «Ma tinkanab' tab'i' xk'eeb'al li aseeyt li nanimaak wi' ruheb' li yos ut eb' li winq, re naq tinxik chi xb'eeninkil wib' sa' xb'eeneb' li che'?», chan.

¹⁰ “Toja' naq eb' li che' ke'xye re li xche'el li iig: «Kim laa'at. Awab'ejin sa' qab'een», chankeb'.

¹¹ Ke'sumeek xb'aan li xche'el li iig: «Ma tinkanab' tab'i' linki'al ut linsahil u, re xik chi xb'eeninkil wib' sa' xb'eeneb' li che'?», chan.

¹² “Toja' naq eb' li che' ke'xye re li xtoonal li uub': «Kim laa'at, ut awab'ejin sa' qab'een», chankeb'.

¹³ Kichaq'ok li xtoonal li uub': «Ma tinkanab' tab'i' xk'eeb'al li b'iin li nak'ehok xsahilal xch'ooleb' li yos ut eb' li winq, re naq tinxik chi xb'eeninkil wib' sa' xb'eeneb' li che'?», chan.

¹⁴ “Sa' xraqik chixjunileb' li che' ke'xye re li k'ix: «Kim laa'at, ut awab'ejin sa' qab'een», chankeb'.

¹⁵ Ut li k'ix kixsumeheb': «Wi relik chi yaal naq xesik' wu re awab'ejink sa' eeb'een, kimqex chi hilank rub'el linmu. Wi ut ink'a' jo'kan, chi'elq xam wik'in ut chixk'at eb' li yaw re Líbano», chan.

¹⁶ “Ut anaqwan tinpatz' eere: ma sa' xyaalal xeb'aanu ut chi tiik ru leech'ool naq xexaqab' laj Abimélek cho'q awab'ej? Ma us xeb'aanu re laj Yerubahal ut li xjunkab'al? Ma usilal xeb'aanu re, jo' naq a'an kixb'aanu eere laa'ex?

¹⁷ Xb'aan naq linyuwa' kiyalok sa' eek'ab'a', ka'aj chik maa xkamk, yal re eekolb'al sa' ruq'eb' laj Madián.

¹⁸ A'ut laa'ex sa' li kutan a'in xeq'etq'eti eerib' chiru li xjunkab'al linyuwa', xekamsiheb' li lajeeb' xkaak'aal chi ralal sa' xb'een jun chi pek ut xexaqab' laj Abimélek cho'q awab'ej sa' xb'eeneb' li xjolomileb' laj Sikem, a' li xyum li xmun ixq, xb'aan naq nekeye naq a'an eekomon.

¹⁹ K'ehomaq reetal: wi laa'ex sa' li kutan a'in xexwank sa' xyaalal ut chi tiik ru leech'ool chiru laj Yerubahal ut li xjunkab'al, chisaho'q leech'ool sa' xk'ab'a' laj Abimélek ut a'an sahaq taxaq li xch'ool sa' eek'ab'a' laa'ex.

²⁰ Ab'an wi ink'a' jo'kan, chi'elq chaq xam rik'in laj Abimélek re xk'atb'al li xjolomileb' laj Sikem ut Bet-Miló. Jo'kan ajwi' chi'elq chaq xam rik'ineb' li xjolomileb' laj Sikem ut Bet-Miló ut chixk'ataq laj Abimélek”, chan.

²¹ Chirix chik a'an laj Jotán ki'elelik ut koxkol rib' aran Beher b'arwi' kikanaak xb'aan xxiw chiru laj Abimélek li ras.

Laj Abimélek kiyalok rik'ineb' laj Sikem

²² Oxib' chihab' ke'wank eb' laj Israel rub'el xwankilal laj Abimélek.

²³ Ab'an li Yos kixtaqla jun li raaxiik' sa' xyanq laj Abimélek ut eb' li xjolomileb' laj Sikem, ut eb' a'in ke'xb'alaq'i laj Abimélek

²⁴ re naq eeqajunb'ilaq li xkamikeb' li lajeeb' xkaak'aal ralaleb' laj Yerubahal, ut laj Abimélek tixtoj rix li maak kixb'aanu rochb'eeneb' li xjolomileb' laj Sikem li ke'tenq'ank re.

²⁵ Jo'kan naq eb' li xjolomileb' laj Sikem ke'xk'uub' xra'lenkil laj Abimélek sa' xb'eeneb' li tzuul ut ke'relq'a chixjunil li k'aru wank reheb' li neke'nume'k aran. Ut kiyehe'k resil re laj Abimélek.

²⁶ Sa' jun kutan laj Gahal, ralal laj Obed, rochb'eeneb' li xkomon, kichalk aran Sikem ut kixtaw usilal rik'ineb' li xjolomil li tenamit a'an.

²⁷ Eb' a'in koheb' sa' li xna'aj awimq chi sik'ok uub' ut ke'xyatz' re risinkil li xya'al. Chirix chik a'an ke'xtikib' ninq'ehik ut ke'ok sa' rochoch li xyoseb'. Ke'wa'ak, ke'uk'ak ut ke'xmajewa laj Abimélek.

²⁸ Toja' naq laj Gahal, ralal laj Obed, kixye: “Ani laj Abimélek ut aniho laa'o aj Sikem re naq took'anjekaq chiru? Ma maawa' tab'i' a'an li ralal laj Yerubahal? Ut laj Sebul, a'an aj tenq' re. Laa'o took'anjelaq chiruheb' laj Jamor, ralal laj Sikem, ab'an maajoq'e chiru laj Abimélek.

²⁹ Wi ta laa'in nintaqlank sa' eeb'een, ak xwaanilasi raj laj Abimélek; ak raj xinye naq tixkawresiheb' laj puub' re yalok qik'in”.

³⁰ Naq laj Sebul, li nataqlank sa' xb'een li tenamit, kirab'i resil li k'aru kixye laj Gahal, ralal laj Obed, k'ajo' naq kichalk xjosq'il,

³¹ ut sa' muqmu kixtaqla aj esileb' rik'in laj Abimélek re xyeeb'al re: “K'e reetal naq laj Gahal, ralal laj Obed, rochb'eeneb' li xkomon xe'k'ulun arin Sikem, ut yookeb' chi xk'amchi'inkil li tenamit re naq te'xq'etq'eti rib' chawu.

³² Jo'kan utan, waklin chaq chi q'oqyink, laa'at ut eb' li poyanam aawochb'een, ut muqumaq eerib' chire li tenamit.

³³ Eq'la, naq taa'elq chaq li saq'e, tatwakliiq ut tatxik sa' xb'een li tenamit. Ut naq taa'elq laj Gahal chak'ulb'al rochb'eeneb' li xpoyanam, b'aanu re li k'aru taawaj xb'aanunkil”.

³⁴ Jo'kan naq laj Abimélek kiwakliik chi q'eq rochb'een chixjunileb' li xpoyanam, ut koxe'xmuq rib' chire Sikem, jachinb'ileb' sa' kaahib' ch'uut.

³⁵ Naq ki'elk laj Gahal, ralal laj Obed, ut koxxaqliiq wan wi' li okeb'aal re li tenamit, laj Abimélek ut eb' laj puub' ke'elk chaq sa'eb' li na'ajej muqmuukeb' wi'.

³⁶ Naq laj Gahal kirileb', kixye re laj Sebul: “Ileb' li poyanam li yookeb' chaq chi kub'eek sa' li tzuul”, chan. Kichaq'ok laj Sebul ut kixye: “Maawa'eb' winq yookat chi rilb'al, yal mu li nak'utunk chiru li tzuul”, chan.

³⁷ Ab'an laj Gahal kixye wi' chik: “Ileb' li poyanam li yookeb' chaq chi kub'eek sa' li tzuul Li «xch'up li ruuchich'och'» xk'ab'a', ut jun ch'uuteb' chik sa' xb'ehil li xJi eb' laj q'e”, chan.

³⁸ Toja' naq laj Sebul kixye re: “Ma ink'a' tab'i' laa'at xaye: «Ani laj Abimélek naq tqak'anjela ru?». Ma maawa'eb' tab'i' a'an li poyanam tz'eqtaananb'ileb' aab'aan? Ayu ut yalon rik'ineb'”, chan.

³⁹ Laj Gahal kik'amok b'e chiruheb' laj Sikem chi yalok rik'in laj Abimélek.

⁴⁰ Ab'an laj Abimélek kiraanilasi laj Gahal, ut a'in ki'elelik chiru. Naab'aleb' ke'kamk chiru rokeb'aal li tenamit.

⁴¹ Laj Abimélek kikanaak chi wank Arumá, ut laj Sebul kiraanilasi laj Gahal ut li xkomoneb' re naq ink'a' chik te'wanq aran.

⁴² Sa' li kutan jun chik eb' laj Sikem koheb' sa' k'aleb'aal. Naq laj Abimélek kirab'i resil a'an,

⁴³ kixjachi eb' laj puub' sa' oxib' ch'uut ut koxmuq rib' sa' li k'aleb'aal, ut naq kirileb' li poyanam chi elk sa' li tenamit, kichalk sa' xb'eeneb' ut kixq'ax ruheb'.

⁴⁴ Laj Abimélek ut eb' li rochb'een ke'xkut rib' sa' xb'eeneb' li wankeb' sa' rokeb'aal li tenamit, a'ut li wiib' ch'uut chik ke'yalok ut ke'xq'ax ruheb' li wankeb' sa' k'aleb'aal.

⁴⁵ Chiru chixjunil li kutan a'an laj Abimélek kiyalok toj reetal kireechani li tenamit, ut kixkamsi chi ch'iich' jo'k'ihaleb' wankeb' aran. Chirix chik a'an kixsach ru li tenamit ut kiraw chi atz'am.

⁴⁶ Naq eb' laj Mikdal-Sikem ke'rab'i resil a'an, koxe'xmuq rib' sa' rochochil laj El-Berit.

⁴⁷ Kiyehe'k resil re laj Abimélek naq ch'utch'uukeb' chixjunil li xjolomileb' laj Mikdal-Sikem.

⁴⁸ Jo'kan naq rochb'een chixjunileb' laj puub' koho sa' xb'een li tzuul Salmón, kixchap jun li maal ut kixyok' jun li ruq' che'. Chirix chik a'an kixtaqsi, kixk'e sa' xb'een xtel ut kixye reheb' laj puub' li rochb'eeneb': “Seeb'ahomaq eerib'. Li k'aru xineeril chi xb'aanunkil, b'aanuhomaq ajwi' laa'ex”, chan.

⁴⁹ Chixjunileb' li winq ke'xyok' junjunq li ruq' xche'; chirix a'an ke'xtaaqe laj Abimélek, ke'xk'e li ruq'eb' li che' chirix li kab'l, ke'xloch xxamlel ut chi jo'kan ke'xkamsi chixjunileb' laj Mikdal-Sikem: wankeb' tana lajeek'aal rox o'q'ob' (1,000) chi winq ut ixq.

Xkamik laj Abimélek

⁵⁰ Moqon chik laj Abimélek koho Tebés, kixsut li tenamit ut kireechani.

⁵¹ Sa' li tenamit a'an wank jun nimla kab'l najt xteram, ut aran ke'xmuq rib' chixjunileb' li winq ut ixq, jo'wi' li xjolomileb' li tenamit. Ke'xtz'ap chaq chisa' ut ke'taqe'k sa' xb'een li kab'l.

⁵² Ab'an laj Abimélek kiwulak toj wan wi' li najt xteramil kab'l ut kixtikib' yalok. Kijilok chi xk'atq li okeb'aal re raj xk'eeb'al xxamlel.

⁵³ Toja' naq jun li ixq kixkut jun nimla ke'leb' sa' xb'een ut kijore'k li xjolom.

⁵⁴ Tikto laj Abimélek kixb'oq laj k'anjel chiru ut kixye re: “Isi laach'iich' ut kamsihin, re naq ink'a' te'xye chiwix naq ixq xkamsink we”, chan. Laj k'anjel chiru kixnumsi chi ch'iich', ut jo'ka'in kikamk laj Abimélek.

⁵⁵ Naq eb' laj Israel ke'ril naq kamenaq chik laj Abimélek, ke'sutq'iik wi' chik sa' li rochocheb'.

⁵⁶ Jo'ka'in naq li Yos kixq'ajkamu re laj Abimélek li ink'a' us kixb'aanu re li xyuwa' naq kixkamsiheb' li lajeeb' xkaak'aal (70) chi ras riitz'ineb'.

⁵⁷ Ut li Yos kixk'eheb' ajwi' chi xtojb'al rix li xmaakeb' chixjunileb' laj Sikem. Chi jo'kan kitz'aqlok ru rik'ineb' li xmajewahom laj Jotán, ralal laj Yerubahal.