Jueces 8 - Q'eqchi Bible

Naq laj Jedehón kixsach ruheb' laj Madián

¹ Eb' laj Efraín kaw ke'xwech'i laj Jedehón ut ke'xye re: “K'a' naq jo'ka'in xab'aanu qe: ink'a' xoohaab'oq naq xat-elk chi yalok rik'ineb' laj Madián?”, chankeb'.

² Ut laj Jedehón kixsumeheb': “K'aru xinb'aanu laa'in? Q'axal chik xeb'aanu laa'ex aj Efraín chiru li xqab'aanu laa'o.

³ Li Yos xq'axtesi sa' eeruq' li xjolomileb' laj Madián, a' laj Oreb ut laj Seheb. K'a' tawi' xinb'aanu laa'in re injuntaq'eetankil eerik'in!”, chan. Naq eb' laj Efraín ke'rab'i li raatin laj Jedehón, kich'anaak b'ayaq li xjosq'ileb'.

⁴ Laj Jedehón rochb'eeneb' li o'lajuk'aal ke'wulak chire li nima' Jordán ut ke'nume'k junpak'al, us ta tawajenaqeb' xb'aan xsik'inkileb' laj Madián.

⁵ Naq ke'wulak Sukot, kixye laj Jedehón reheb' li wankeb' aran: “B'aanuhomaq usilal, k'ehomaq xtzekemqeb' laj puub' wochb'een, xb'aan naq tawajenaqeb' ut yookin xsik'b'al laj Sébaj ut laj Salmuná, li wiib' chi awab'ej re Madián”, chan.

⁶ Ab'an eb' li xjolomileb' laj Sukot ke'xsume: “Ma ak xachap tab'i' laj Sébaj ut laj Salmuná re naq tqak'e xwaheb' laj puub' li wankeb' aawochb'een?”, chankeb'.

⁷ Toja' naq laj Jedehón kixye: “Maak'a' naxye. Naq li Qaawa' akaq xq'axtesiheb' sa' wuq' laj Sébaj ut laj Salmuná, tinsol leetib'el rik'in li k'ix li nawank sa' chaqich'och' ut rik'in pajl”, chan.

⁸ Ki'elk aran, koxtaqe'q Penuel, ut kixtz'aama wi' chik usilal chiruheb' jo' kixb'aanu aran Sukot. Ab'anan eb' laj Penuel ke'xye jo' li ke'xye xb'enwa eb' laj Sukot.

⁹ Jo'kan naq laj Jedehón kixye reheb': “Naq akaq xinq'axok u, tolinnumet'an li najt xteramil kab'l a'an”, chan.

¹⁰ Laj Sébaj ut laj Salmuná wankeb' aran Karkor rochb'eeneb' laj puub', wankeb' tana o'laju mil chi winq (15,000): ka'ajwi' eb' a'an li toj yo'yookeb' sa' xyanqeb' laj releb'l saq'e, xb'aan naq wankeb' tana waqk'aal mil (120,000) li ak ke'kamsiik.

¹¹ Laj Jedehón kinume'k chire li xnub'ajl li chaqich'och', sa' xjayal releb'l saq'e re Nóbaj ut Yokbohá, ut ki'ok chi yalok rik'ineb' laj Madián naq eb' a'in maak'a' sa' xch'ooleb'.

¹² Laj Sébaj ut laj Salmuná ke'elelik, ab'an laj Jedehón kixtaaqeheb' toj reetal kixchapeb' li wiib' chi awab'ej, a' laj Sébaj ut laj Salmuná, ut kixsach chixjunileb' laj puub'.

¹³ Moqon chik, chirix li nimla yalok, kisutq'iik chaq laj Jedehón, ralal laj Johás, ut kinume'k sa' li b'e naxik Jeres.

¹⁴ Aran kixchap jun li saaj al reheb' laj Sukot ut kixtitz' re ani xk'ab'a'eb' li xjolomileb' aj Sukot ut eb' li cheekel winq: wuqlaju xkaak'aaleb' (77) chi winq.

¹⁵ Toja' naq laj Jedehón koho rik'ineb' laj Sukot ut kixye reheb': “We' laj Sébaj ut laj Salmuná li xineehob' wi' naq xeye: «Ma ak xachap tab'i' laj Sébaj ut laj Salmuná re naq tqak'e xwaheb' laawochb'een li xe'tawak?»”.

¹⁶ Kixchapeb' li xcheekelaleb' li tenamit ut kixq'ir li xtib'eleb' laj Sukot rik'in li k'ix nawank sa' li chaqich'och' ut rik'in pajl.

¹⁷ Kixjuk' ajwi' li kab'l najt xteram li wank aran Penuel, ut kixkamsiheb' li wankeb' sa' li tenamit a'an.

¹⁸ Chirix chik a'an kixye re laj Sébaj ut laj Salmuná: “Chan neke'ilok eb' li winq li xekamsiheb' aran Tabor?”, chan reheb'. Ke'xsume: “Chanchaneb' laa'at neke'ilok. Chanchaneb' li ralal awab'ej chixjunileb'”, chankeb'.

¹⁹ Kichaq'ok laj Jedehón ut kixye: “Waseb' a'an, ralaleb' linna'. Jo'kan naq ninye eere sa' xk'ab'a' li Qaawa': wi ta ink'a' xekamsiheb', ink'a' raj texinkamsi”.

²⁰ Tikto kixye re laj Jéter li xb'een al: “Kim ut kamsiheb'”, chan. Ab'an li al ink'a' kirisi li xch'iich'; naxiwak xb'aan naq toj saaj chi us.

²¹ Toja' naq laj Sébaj ut laj Salmuná ke'xye re laj Jedehón: “Waklin laa'at ut kamsiho, xb'aan naq laa'at jun li winq q'axal kaw aawib'”, chankeb'. Kiwakliik laj Jedehón ut kixkamsiheb' laj Sébaj ut laj Salmuná, ut kixxok li xsahob' ruheb' li kameey li nawank sa' xkuxeb'.

Xraqik li xyu'am laj Jedehón

²² Chirix chik a'an eb' laj Israel ke'xye re laj Jedehón: “Laa'at chik tattaqlanq sa' qab'een jo'keb' ajwi' laawalal ut eb' laawi aamam, xb'aan naq xoohaakol sa' ruq'eb' laj Madián”, chankeb'.

²³ A'ut laj Jedehón kixsumeheb': “Moko laa'in ta tintaqlanq sa' eeb'een chi moko li walal. A' b'an li Qaawa' taataqlanq sa' eeb'een”, chan.

²⁴ Ut kixye wi' chik: “Jun ajwi' li nintz'aama cheru: li junjunq eere tixq'axtes we junaq matq'ab' li xreechani”, chan. (Xb'aan naq li ke'q'axe'k ru wankeb' xmatq'ab' oor, xb'aan naq aj Ismaeleb').

²⁵ Ke'chaq'ok ut ke'xye: “Chi anchal qach'ool tqak'e aawe”, chankeb'. Toja' naq laj Jedehón kixhel li xt'ikr chiru ch'och' ut aran ke'xk'e li matq'ab' li ke'reechani chixjunqaleb'.

²⁶ Li raalaleb' li matq'ab' oor ke'patz'mank, a'an numenaq ka'k'aal liib'r chi oor, chi ink'a' k'eeb'il sa' ajl li xsahob'eb' ru, eb' li ka'xik ut eb' li kaqi aq'eb' li neke'roksi li awab'ej re Madián, chi moko eb' li q'ol li wankeb' chi xkuxeb' li kameey.

²⁷ Rik'in li oor kiq'axtesiik re, laj Jedehón kixyiib' jun li efod ut kixk'e aran Ofrá, sa' li xtenamit. Ab'an chixjunileb' laj Israel ke'xmux li xpaab'aaleb' xb'aan li efod, li kikanaak jo' jun ra'al cho'q re laj Jedehón ut li xjunkab'al.

²⁸ Jo'ka'in naq ke'sache'k xwankil eb' laj Madián chiruheb' laj Israel ut ink'a' chik ke'xwaklesi rib'eb'. Chiru ka'k'aal chihab' eb' laj Israel ke'wank sa' tuqtuukilal, naq toj yo'yooq laj Jedehón.

²⁹ Laj Jedehón, ralal laj Johás, li Yerubahal ajwi' nayeemank re, kisutq'iik sa' rochoch ut aran kikanaak.

³⁰ Lajeeb' xkaak'aal (70) li ralal kiwank laj Jedehón, xb'aan naq naab'aleb' li rixaqil.

³¹ Kiwank ajwi' jalan chik li ixq aran Sikem, ut rik'in a'an kiyo'laak jun li ralal, aj Abimélek kixk'e cho'q xk'ab'a'.

³² Laj Jedehón, ralal laj Johás, ak tiix chik chi us naq kikamk. Ut kimuqe'k sa' li na'ajej kimuqe'k wi' laj Johás li xyuwa', aran Ofrá re Abiéser.

³³ Chirix li xkamik laj Jedehón eb' laj Israel ke'xmux wi' chik li xpaab'aaleb' rik'ineb' laj Bahal ut ke'xk'e laj Bahal-Berit cho'q xyoseb'.

³⁴ Kisachk sa' xch'ooleb' li Qaawa', a' li Yos li kikolok reheb' sa' ruq'eb' li xik' neke'ilok reheb' wankeb' chi xsutam.

³⁵ Ut ink'a' ke'xyoxi chiruheb' laj Yerubahal-Jedehón chixjunil li usilal li ke'xb'aanu reheb' laj Israel.