Jueces 3 - Q'eqchi Bible

Eb' li tenamit li ke'kanab'aak xb'aan li Yos aran Kanahán

¹ A'aneb' a'in li tenamit kixkanab'eb' li Qaawa' re xyalb'al rixeb' laj Israel, xb'aan naq wankeb' laj Israel li maji' yo'lajenaqeb' naq ki'uxk li yalok re reechaninkil Kanahán.

² Ke'kanab'aak xb'aan li Qaawa' re naq jo'k'ihaleb' laj Israel maji' rilomeb' li yalok, te'xtzol rib' chi yalok.

³ Ke'kanaak li oob' chi xninqal ru winq aj Filistea, chixjunileb' laj Kanahán, eb' laj Sidón ut eb' laj Hit li wankeb' sa'eb' li tzuul re Líbano, chalen chaq sa' li tzuul Bahal-Hermón toj wan wi' li rokeb'aal Jamat.

⁴ Chi jo'kan li Qaawa' kiraj xyalb'al rixeb' laj Israel re xnawb'al ma te'xpaab' li xchaq'rab' yeeb'il reheb' li xna' xyuwa'eb' xb'aan laj Moisés malaj ut ink'a'.

⁵ Jo'kan naq eb' laj Israel ke'xtikib' wank sa' xyanqeb' laj Kanahán, eb' laj Hit, eb' laj Amor, eb' laj Perés, eb' laj Jib ut eb' laj Jebús;

⁶ ke'sumlaje'k rik'in li xrab'ineb' ut ke'xk'ehatq li xrab'ineb' reheb' li ralaleb' li tenamit a'an, ut ke'xloq'oni ajwi' li xyoseb'.

Laj Otoniel

⁷ Eb' laj Israel ke'xb'aanu li k'aru ink'a' nawulak chiru li Qaawa', xb'aan naq kisachk sa' xch'ooleb' li Qaawa' li xYoseb', ut a' chik eb' laj Bahal ut lix Aserá ke'xloq'oni ru.

⁸ Jo'kan naq li Qaawa' kichalk xjosq'il sa' xb'eeneb' laj Israel ut kixq'axtesiheb' sa' ruq' laj Kusán Risatáhin, awab'ej re Edom, ut ke'k'anjelak waqxaqib' chihab' chiru li awab'ej a'an.

⁹ Toja' naq eb' laj Israel ke'xyaab'a xk'ab'a' li Qaawa' ut A'an kixwaklesi jun aj k'amol b'e re taakoloq reheb' chiruheb' li xik' neke'ilok reheb': a' laj Otoniel, ralal laj Kenás ut riitz'in laj Kaleb.

¹⁰ Li xmusiq' li Qaawa' kichalk sa' xb'een laj Otoniel ut a'an kikanaak cho'q aj k'amol xb'eheb' laj Israel: koho chi yalok ut li Qaawa' kixq'axtesi sa' ruq' a'an laj Kusán Risatáhin, awab'ej re Edom, li kiq'axe'k ru.

¹¹ Chiru ka'k'aal chihab' li tenamit kiwank sa' tuqtuukilal. Chirix chik a'an kikamk laj Otoniel, ralal laj Kenás.

Laj Ehud

¹² Eb' laj Israel ke'xb'aanu wi' chik li ink'a' nawulak chiru li Qaawa'; jo'kan naq li Qaawa' kixnimob'resi xwankil laj Eklón, awab'ej re Mohab, sa' xb'eeneb' laj Israel, xb'aan naq ke'xb'aanu li ink'a' nawulak chiru li Qaawa'.

¹³ Laj Eklón kixjunaji rib' rik'ineb' laj Amón ut laj Amalek, koho ut kixq'ax ruheb' laj Israel, ut kixchap Jerikó, li xTenamitul li kala'.

¹⁴ Chiru waqxaqlaju chihab' eb' laj Israel ke'wank rub'el xwankil laj Eklón, awab'ej re Mohab.

¹⁵ Toja' naq eb' laj Israel ke'xyaab'a xk'ab'a' li Qaawa' ut A'an kixwaklesi jun aj kolonel: laj Ehud, ralal laj Kerá, aj Benjamín, a'an jun li winq sik li xnim uq'. Sa' jun kutan eb' laj Israel ke'ab'enak chirix, re naq a'an tk'amoq re li tojleb' re laj Eklón, awab'ej re Mohab.

¹⁶ Ab'an laj Ehud kixyiib' jun ch'ina ch'iich' ka'pak'al xq'esnal, wan rox k'utub' li roq, ut kixb'ak' rub'el li raq', sa' xb'een li xnim a', xb'aan naq sik li xnim uq'.

¹⁷ Chirix chik a'an koxk'e li tojleb' re laj Eklón, awab'ej re Mohab, a'an jun li winq jwal nim xtib'el.

¹⁸ Ka'ajwi' kiraqe'k xq'axtesinkil li tojleb', laj Ehud kixchaq'rab'iheb' li ke'ochb'eenink re.

¹⁹ Ab'an naq kiwulak rik'ineb' li yiib'anb'il yos li wankeb' sa' xteepal Kilkal, kisutq'iik wi' chik ut kixye: “At awab'ej, wank k'aru nawaj xyeeb'al aawe aajunes”, chan. Kichaq'ok li awab'ej ut kixye: “Chineekanab' injunes”, chan. Tikto ke'elk chixjunileb' li wankeb' aran,

²⁰ ut li awab'ej kikanaak xjunes, k'ojk'o sa' li na'ajej wank taqe'q naxnumsi wi' li saq'ehil. Laj Ehud kijilok chi xk'atq ut kixye re: “Li aatin ok we xyeeb'al aawe, rik'in li Yos nachalk chaq”, chan. Toja' naq li awab'ej kixaqliik b'ar k'ojk'o wi',

²¹ ab'an laj Ehud kixye' li xtz'e uq', kixchap li xch'ina ch'iich' wank chi xk'atq ut kixch'ik chi kaw sa' xsa' li awab'ej.

²² Ki'ok ajwi' li xchapb'al li ch'iich', ut li xnimal xtib'el kimuquk re li ch'iich', xb'aan naq laj Ehud ink'a' kirisi a'an sa' li xsa' li awab'ej. Ut ki'elk li xk'amk'ot.

²³ Chirix chik a'an laj Ehud ki'elelik: kixtz'ap li okeb'aal, kixk'e sa' laaw ut kinume'k sa' li numleb'aal.

²⁴ Naq ak x'elk aran, ke'chalk eb' laj k'anjel chiru li awab'ej, ke'ril naq laawunb'il li rokeb'aal li na'ajej, ut ke'xye chirib'ileb' rib': “Ch'olch'o naq li awab'ej yo chi chu'uk sa' li na'ajej naxnumsi wi' li saq'ehil”, chankeb'.

²⁵ Ut ke'royb'eni toj reetal ke'ok xk'a'uxl, xb'aan naq ink'a' nateeliik li na'ajej. Toja' naq ke'xchap li laaw ut ke'xte: kamenaq chik ut jiljo chiru ch'och' naq ke'xtaw laj eechal reheb'!

²⁶ Naq eb' a'an yookeb' chi oyb'enink, laj Ehud ki'elelik, kixq'ax li na'ajej wankeb' wi' li yiib'anb'il yos ut koxkol rib' aran Sehirá.

²⁷ Naq kiwulak sa' xyanqeb' laj Israel, sa' li xtzuulul Efraín, kixyaab'asi li xukub' ut eb' laj Israel ke'kub'e chaq sa' li tzuul re chalk rik'in. Toja' naq kixk'e rib' chiruheb'

²⁸ ut kixye reheb': “Taaqehomaqin, xb'aan naq li Qaawa' ak xq'axtesi sa' leeruq' eb' laj Mohab li xik' neke'ilok eere”, chan. Eb' a'an ke'kub'e chaq, koxe'reechani li na'ajej junqre li nima' Jordán ut maajun ke'xkanab' chi nume'k.

²⁹ Sa' li kutan a'an ke'xkamsi tana lajeeb' mil chi winq, q'axal kaweb' rib' chixjunileb'. Maajun reheb' kikole'k.

³⁰ Sa' li kutan a'an laj Mohab kisache'k xwankil xb'aan laj Israel, ut li tenamit kiwank sa' tuqtuukilal chiru kaak'aal chihab'.

Laj Sankar

³¹ Chirix laj Ehud kichalk laj Sankar, ralal laj Anat, li kixkamsi lajeek'aal xkab' o'q'ob' (600) chi winq rik'in jun topleb' b'ooyx. A'an ajwi' kixkoleb' laj Israel.