Jueces 2 - Q'eqchi Bible

Li x'ánjel li Qaawa' aran Betel

¹ Naq li x'ánjel li Qaawa' ki'elk chaq Kilkal ut koho Betel, kixye reheb' laj Israel: “Laa'in kin'isink chaq eere Ejiipt ut kexwoksi sa' li ch'och' inyeechi'om reheb' leena' leeyuwa' naq kinye reheb': «Maajaruj tinq'et linSumwank eerik'in.

² Ab'anan tento naq laa'ex ink'a' teek'e eerib' sa' aatin rik'ineb' li wankeb' sa' li tenamit a'in, teejuk'i b'an li x'artaleb'», chankin. A'ut laa'ex ink'a' kerab'i xyaab' linkux. K'a'ut naq xeb'aanu a'an?

³ Jo'kan naq ninye eere naq ink'a' te'waanilasiheb' li tenamit a'in cheru; a'aneb' b'an te'rahob'tesinq eere, ut li xyoseb' a'anaq jun ra'al cho'q eere”.

⁴ Naq li x'ánjel li Qaawa' kiraqe'k chi xyeeb'al eb' li aatin a'in reheb' chixjunil laj Israel, eb' li tenamit ke'ok chi yaab'ak chi japjookeb' re.

⁵ Jo'kan naq ke'xk'e Bokím cho'q xk'ab'a' li na'ajej a'an, ut aran ke'mayejak chiru li Qaawa'.

Li xkamik laj Josué

⁶ Naq laj Josué kixchaq'rab'iheb' laj Israel, koheb' chi xjunjunqaleb' chi reechaninkil li xch'och'eb'.

⁷ Eb' li tenamit ke'k'anjelak chiru li Qaawa' jo' najtil yo'yo laj Josué rochb'eeneb' li cheekel winq li rilomeb' junxil chixjunil li sachb'ach'oolej uxb'il xb'aan li Qaawa' reheb' laj Israel.

⁸ Lajeeb' xwaqk'aal (110) chihab' wank re laj Josué, ralal laj Nun, laj k'anjel chiru li Qaawa', naq kikamk.

⁹ Kimuqe'k aran Timnat-Jeres, sa' li na'ajej kireechani chaq, chiru li xtzuulul Efraín, sa' xjayal releb'l iq' re li tzuul Kahás.

¹⁰ Ke'kamk ajwi' chixjunileb' li rech yu'amileb' laj Josué; ke'q'ajk ke'sutq'iik rik'ineb' li xxe'xtooneb', ut jalaneb' chik ke'yo'laak chirixeb' a'an: ink'a' neke'xnaw ru li Qaawa' chi moko xnawomeb' li kilajxb'aanu sa' xk'ab'a'eb' laj Israel.

Li xyaalalil li hu a'in

¹¹ Eb' laj Israel ke'xb'aanu li k'aru ink'a' nawulak chiru li Qaawa': ke'ok chi xloq'oninkileb' laj Bahal.

¹² Ke'xkanab' li Qaawa', li xYos eb' li xxe'toonil yuwa' li ki'isink chaq reheb' sa' li na'ajej Ejiipt, ut ke'ok chi xtaaqenkil li xyoseb' li tenamit wankeb' chi xsutam. Ke'xwiq'ib' rib' chiruheb' ut ke'xchiq' xjosq'il li Qaawa';

¹³ ke'xkanab' li Qaawa' ut ke'xloq'oni ru laj Bahal jo'wi' lix Astarté.

¹⁴ Jo'kan naq li Qaawa' kichalk xjosq'il sa' xb'eeneb' laj Israel. Kixq'axtesiheb' sa' ruq'eb' laj elq' li ke'maq'ok chixjunil li k'aru wank reheb', kixk'ayeb' sa' ruq'eb' li xik' neke'ilok reheb', li wankeb' chi nach', ut ink'a' chik ke'xkuy xkolb'aleb' rib' chiruheb'.

¹⁵ Yalaq b'ar neke'xik chi yalok eb' laj Israel, li ruq' li Qaawa' nachalk sa' xb'eeneb' re xrahob'tesinkileb', jo' chanru xyehom li Qaawa' sa' jurament. Makach'in li ra ke'xk'ul!

¹⁶ Toja' naq li Qaawa' kixwaklesiheb' aj k'amol b'e li ke'xkol li tenamit sa' ruq'eb' laj elq'.

¹⁷ Ab'anan chi moko chiruheb' laj k'amol xb'eheb' ke'ab'ink, koho b'an chik xch'ooleb' chirixeb' li jalanil yos ut ke'xwiq'ib' rib' chiruheb'. Sa' junpaat ke'xkanab' li xb'e li xna' xyuwa'eb' li neke'xk'e xch'ool chi xpaab'ankil li xtaqlahom li Qaawa', ut ink'a' ke'xkanesi reheb' a'an.

¹⁸ Naq li Qaawa' naxwaklesi junaq aj k'amol b'e, A'an ajwi' natenq'ank re. Jo' najtil yo'yooq laj k'amol b'e, li Qaawa' naxkoleb' laj Israel sa' ruq'eb' li xik' neke'ilok reheb', xb'aan naq naxtoq'ob'a ruheb' li neke'tz'uyink xb'aaneb' laj rahob'tesinel li neke'numtaak sa' xb'eeneb'.

¹⁹ Ab'an naq nakamk laj k'amol b'e, eb' laj Israel neke't'ane'k wi' chik sa' li maak, ut q'axal wi' chik yib'ru neke'xb'aanu chiruheb' li xna' xyuwa'eb': neke'xik chirixeb' li jalanil yos, neke'xloq'oni ut neke'xwiq'ib' rib' chiruheb'. Tik ink'a' neke'raj xkanab'ankil li xna'leb'eb' li xna' xyuwa'eb' chi moko li xmaa'usilaleb'.

²⁰ Jo'kan naq kichalk xjosq'il li Qaawa' sa' xb'een li tenamit Israel, ut kixye: “Li tenamit a'in ke'xq'et li sumwank kink'ojob' rik'ineb' li xna' xyuwa'eb'. Ink'a' ke'rab'i xyaab' linkux.

²¹ Jo'kan utan ink'a' twaanilasiheb' li poyanam li ink'a' kirisiheb' laj Josué naq toj maji' nakamk”, chan li Qaawa'.

²² Jo'ka'in naq li Qaawa' kiraj xyalb'al rixeb' laj Israel re rilb'al ma te'xtaaqe tana li chaab'il b'e malaj ut ink'a', jo' ke'xb'aanu chaq li xna' xyuwa'eb'.

²³ Jo'kan naq li Qaawa' ink'a' kirisiheb' sa' junpaat li tenamit li ink'a' xq'axtesihomeb' sa' ruq' laj Josué, kixkanab'eb' b'an chi wank sa' li xna'ajeb'.