Jueces 18 - Q'eqchi Bible

Eb' laj Dan

¹ Sa'eb' li kutan a'an maak'a'eb' chaq awab'ej aran Israel. Eb' li ralal xk'ajol laj Dan yookeb' chi xsik'b'al xna'ajeb' b'arwi' te'wanq, xb'aan naq toj maji' wank reechanihomeb' sa' xteepal Israel.

² Jo'kan naq eb' laj Dan ke'xsik' ru oob' chi winq kaweb' xch'ool sa' li xjunkab'aleb', ut ke'xtaqlaheb' chi rilb'al li tenamit ut xb'eeninkil. Ke'xye reheb': “Ayuqex ut k'ehomaq chaq reetal chanru li na'ajej”, chankeb'. Ke'elk b'i' aran Sorá ut Estahol ut ke'wulak sa' xtzuulul Efraín, nach' rik'in li rochoch laj Mikaías, ut aran ke'xnumsi li q'oqyink.

³ Nach' wankeb' li oob' chi winq rik'in li rochoch laj Mikaías; jo'kan naq ke'xnaw li xyaab' xkux li saaj al aj Leví, ke'jilok chi xk'atq ut ke'xye re: “K'aru yookat arin? Ani xk'amok chaq aawe sa' li na'ajej a'in? K'aru xsachk aawe arin?”, chankeb'.

⁴ Laj Leví kixsumeheb': “A'an a'in li xb'aanu we laj Mikaías: xinxk'ul cho'q aj tij ut naxk'e intojb'al”, chan.

⁵ Ut eb' li winq ke'xye re: “Patz' re li Yos ma us too'elq sa' li qab'e a'in”, chankeb'.

⁶ Kichaq'ok laj tij ut kixye reheb': “Mexk'oxlak, ayuqex sa' tuqtuukilal. Li Qaawa' texril chiru leeb'eenik”.

⁷ Toja' naq eb' li oob' chi winq koheb' ut ke'wulak Lahis. Aran ke'xk'e reetal naq eb' li xpoyanamil li na'ajej a'an wankeb' sa' xyaalal, jo' k'aynaqeb' wi' laj Sidón, ut k'ojk'ookeb' xch'ool chi maak'a' k'oxlak. Maak'a' namajelo'k reheb' ut maa'ani nach'i'ch'i'ink reheb'. Najt wankeb' rik'in Sidón ut ink'a' neke'xnaw rib' rik'ineb' laj Aram.

⁸ Toja' naq ke'sutq'iik chaq Sorá ut Estahol, b'arwi' wankeb' li xkomon, ut eb' a'in ke'xpatz' reheb': “K'aru li esil nekek'am chaq qe?”, chankeb'.

⁹ Ke'xye: “Xaqlinqex, yo'qeb' sa' xb'eeneb' a'an! Xqil li tenamit ut k'ajo' xchaq'al ru! K'a' naq chunchuukex arin chi maak'a' nekeye? Seeb'ahomaq eerib' chi xik chi reechaninkil li ch'och' a'an.

¹⁰ Naq texwulaq, toxeetaw jun li tenamit wank sa' xyaalal. Q'axal nim li na'ajej a'an ut li Yos ak xq'axtesihom sa' quq'. A'an jun li na'ajej b'arwi' wank jo'ch'inal jo'nimal li awimq natawmank sa' ruuchich'och'”.

¹¹ Jo'kan naq lajeek'aal xkab' o'q'ob' (600) chi winq li wankeb' xch'iich' ke'elk aran Sorá ut Estahol, sa' xteepal Dan.

¹² Ke'taqe'k ut koxe'hilanq Kiryat-Yeharín, sa' xteepal Judá. Jo'kan naq li na'ajej a'an “xMuheb'aaleb' laj Dan” naxk'ab'a'in toj anaqwan. Wank chirix Kiryat-Yeharín.

¹³ Ke'elk aran, koxe'nume'q sa' xb'een xtzuulul Efraín ut ke'wulak sa' rochoch laj Mikaías.

¹⁴ Toja' naq eb' li oob' chi aj k'ehol eetal ke'xye reheb' li xkomon: “Ma ink'a' nekenaw naq sa' li kab'l a'in wank jun efod, wankeb' kok' jalam u ut jun pak'b'il yos? K'oxlahomaq chi us k'aru teeb'aanu”, chankeb'.

¹⁵ Chirix chik a'an koheb' sa' rochoch li saaj al aj Leví, ke'ok aran ut ke'xk'e xsahil xch'ool.

¹⁶ Xaqxookeb' chire li okeb'aal li lajeek'aal xkab' o'q'ob' chi winq.

¹⁷ Eb' li oob' chi aj k'ehol eetal ke'taqe'k, ke'ok ut ke'xxok li efod, li kok' jalam u jo'wi' li pak'b'il yos. Ab'an xaqxo laj tij chire li okeb'aal rochb'eeneb' li lajeek'aal xkab' o'q'ob' (600) chi winq wankeb' xch'iich'.

¹⁸ Naq kiril laj tij naq li oob' chi winq ke'ok sa' rochoch laj Mikaías ut ke'xk'am li efod, li kok' jalam u jo'wi' li pak'b'il yos, kixye reheb': “K'aru yookex xb'aanunkil?”, chan.

¹⁹ “Matchoqink -chankeb' re-. Tz'ap xsawe ut kim chiqix. Laa'ataq qayuwa' ut aj tij chiqu. Ma ink'a' tab'i' us wank cho'q aj tij sa' jun ch'uutal chi ralal xk'ajol laj Israel chiru li k'anjelak chiru xjunkab'al jun chi winq ajwi'?”.

²⁰ Kisaho'k sa' xch'ool laj tij rik'in a'an; kixchap li efod, li kok' jalam u ut li pak'b'il yos, ut koho sa' xyanqeb' laj Dan.

²¹ Eb' a'in ke'xchap wi' chik xb'eheb' ut ke'xk'e chi uub'ej eb' li ixq, li kok'al, li ketomq ut chixjunil li k'aru wank reheb'.

²² Ak najt chik wankeb' rik'in li rochoch laj Mikaías naq a'in kixb'oqeb' li rechkab'al ut koheb' chi xsik'b'aleb' laj Dan

²³ ut ke'xjap re chirixeb'. Eb' a'an ke'xsutq'isi chaq rib' ut ke'xye re laj Mikaías: “K'aru nakak'ul naq japjo aawe chi jo'kan?”, chankeb'.

²⁴ Kichaq'ok laj Mikaías ut kixye: “Xemaq' chiwu linyos li kinyiib' laa'in; xek'am cherix laj tij li yo chi k'anjelak chiwu. Xkohex chi maak'a' xekanab' we, ut toj nekepatz' we k'aru xink'ul?”.

²⁵ Kisumeek: “Mat-eek'ank chik. Mare anchal wank junaq qe taajosq'o'q, tixkut rib' sa' eeb'een, ut tatkamsiiq laa'at jo'wi' laajunkab'al”.

²⁶ Naq laj Mikaías kixk'e reetal naq eb' a'an q'axal kaweb' rib', kisutq'iik sa' rochoch; ab'an eb' laj Dan koheb' wi' chik sa' li xb'eheb',

²⁷ ke'xk'am li pak'b'il yos yiib'anb'il xb'aan laj Mikaías ut, rochb'eeneb' laj tij, koheb' Lahis, a'an jun tenamit wank sa' tuqtuukilal ut maak'a' neke'xk'oxla. Ke'xkamsiheb' chi ch'iich' li xpoyanamil ut ke'xk'at li tenamit.

²⁸ Maajun kichalk chi xtenq'ankileb', xb'aan naq najt wankeb' rik'in Sidón ut ink'a' neke'raatina rib' rik'ineb' laj Aram. Lahis wank sa' li taq'a sa' xjayal Bet-Rejob. Chirix chik a'an eb' laj Dan ke'xwaklesi wi' chik li tenamit ut ke'kanaak chi wank aran.

²⁹ Ke'xjal ajwi' xk'ab'a' li tenamit: ink'a' chik Lahis naxk'ab'a'in anaqwan, Dan b'an ke'xk'e cho'q xk'ab'a' re xjultikankil laj Dan li xyuwa'eb', ralal laj Israel.

³⁰ Aran eb' laj Dan ke'xxaqab' li pak'b'il yos re te'xloq'oni. Laj Jonatán, ralal laj Kersón, ralal laj Moisés, jo'wi' eb' li ralal xk'ajol ke'k'anjelak cho'q aj tij chiruheb' li ralal xk'ajol laj Dan chalen toj naq ke'k'ame'k chi najt.

³¹ Ut li pak'b'il yos yiib'anb'il xb'aan laj Mikaías kiwank sa' xyanqeb' laj Dan, jo' najtil kiwank li rochoch li Yos aran Siló.