Jueces 17 - Q'eqchi Bible

Laj Mikaías ut laj Leví

¹ Kiwank jun li winq aran sa' xtzuulul Efraín, aj Mikaías xk'ab'a'.

² Sa' jun kutan kixye re li xna': “Naq x'elq'aak chawu o'lajuk'aal rox o'q'ob' (1,100) chi tumin plaat, laa'at xatz'aama maa'usilal sa' xb'een laj elq'. Laa'in xin'elq'ank re laatumin. We' li tumin wank wik'in, ut anaqwan tinq'axtesi aawe”, chan. Kichaq'ok li xna' ut kixye: “Li Qaawa' chi'osob'tesinq taxaq aawe!”, chan.

³ Toja' naq li winq kixq'axtesi li o'lajuk'aal rox o'q'ob' chi tumin plaat re li xna', ut a'in kixye: “Tinq'axtesi li tumin a'in re li Qaawa' sa' xk'ab'a' linyum. Twaj taayiib'amanq junaq pak'b'il yos”. Naq laj Mikaías kixq'ajsi li tumin re li xna',

⁴ a'in kixchap lajeek'aal (200) chi tumin plaat ut kixk'am rik'in jun aj tenol plaat. Aran kiyiib'amank jun pak'b'il yos li kik'ehe'k sa' rochoch laj Mikaías.

⁵ Sa' rochoch laj Mikaías wank jun tijob'aal. Kixyiib' jun efod jo'wi' xkok' yos, ut kixxaqab' jun li ralal cho'q aj tij.

⁶ Sa'eb' li kutan a'an maak'a'eb' chaq awab'ej aran Israel, ut li junjunq naxb'aanu li k'aru naraj xb'aanunkil.

⁷ Sa' li tenamit Belén wank jo' aj numel jun li saaj al aj Leví, xkomoneb' li ralal xk'ajol laj Judá.

⁸ Li saaj al a'an ki'elk sa' li tenamit Belén sa' xteepal Judá ut koho chi xsik'b'al jun li na'ajej b'arwi' truuq chi wank, ut chiru li xb'eenik kiwulak sa' xtzuulul Efraín, sa' rochoch laj Mikaías.

⁹ “B'ar xatchalk chaq?”, chu'uxk re xb'aan laj Mikaías. Kichaq'ok ut kixye: “Laa'in jun aj Leví. Xinchalk chaq Belén sa' xteepal Judá, ut yookin chi xsik'b'al junaq inna'aj b'arwi' tinwanq”, chan.

¹⁰ Kixye laj Mikaías: “Kanaaqat sa' wochoch, ut laa'ataq aj tij arin ut jo'qat jun li yuwa'b'ej cho'q we. Tink'e aawe lajeeb' chi tumin plaat rajlal chihab'. Tink'e ajwi' aawaq' ut aatzekemq”, chan.

¹¹ Kixk'ul xch'ool laj Leví kanaak rik'in li winq a'an, ut kiwank aran jo' jun reheb' li ralal.

¹² Laj Mikaías kixxaqab' li saaj al cho'q aj tij, ut a'in kikanaak chi wank aran.

¹³ Toja' naq laj Mikaías kixye: “Anaqwan ninnaw naq li Qaawa' trusila wu, xb'aan naq wank jun aj Leví wik'in cho'q aj tij”, chan.