Jueces 14 - Q'eqchi Bible

Naq kisumlaak laj Sansón

¹ Laj Sansón kikub'eek sa' li tenamit Timná ut aran kiril jun li ixq aj Filistea,

² ut naq kisutq'iik chaq, kixye re li xna' xyuwa': “Aran Timná xwil chaq jun li ixq aj Filistea. Nintz'aama usilal cheru, teetz'aama chaq li ixq a'an cho'q wixaqil”, chan.

³ Ab'anan li xna' xyuwa' ke'xye re: “K'a' naq xkohat chi xsik'b'al laawixaqil sa' xyanqeb' laj Filistea li ink'a' neke'xpaab' li Yos? Ma maak'a' tab'i' ixq sa' qayanq laa'o malaj sa' xyanqeb' chixjunileb' laj Israel?”. Ab'an laj Sansón kixsume li xyuwa': “K'am chaq a'an cho'q wixaqil, xb'aan naq a'an li nawulak chiwu”, chan.

⁴ Li xna' xyuwa' ink'a' neke'xnaw naq li na'leb' a'in rik'in li Qaawa' chalenaq chaq, xb'aan naq sa'eb' li kutan a'an eb' laj Filistea neke'taqlank sa' xb'eeneb' laj Israel ut li Yos yo chi xsik'b'al chanru naq eb' laj Israel te'ok chi yalok rik'ineb'.

⁵ Jo'kan naq laj Sansón kikub'eek Timná rochb'eeneb' li xna' xyuwa', ut naq kiwulak sa' xna'aj li awimq uub', kiril jun li ch'ina kaqkoj, yo chi wo'teek naq kichalk sa' xb'een.

⁶ Toja' naq li xMusiq' li Qaawa' ki'eechanink re laj Sansón ut, chi maak'a' wank sa' ruq', kixt'upi li kaqkoj kama' wi' nat'upimank junaq ch'ina chib'aat. Ab'anan ink'a' kixseeraq'i re li xna' xyuwa' li k'aru kixb'aanu.

⁷ Chirix chik a'an laj Sansón koho chi aatinak rik'in li ixq, ut li ixq kiwulak chiru laj Sansón.

⁸ Kinume'k wiib' oxib' kutan ut laj Sansón koho chi sumlaak rik'in li ixq. Naq yo chi xik, kijalb'ehin b'ayaq re rilb'al li kaqkoj kamenaq, ut aran sa' li xkakaaxt b'aqel li kaqkoj kixtaw jun xsok li seer ut wank ajwi' xya'al kab'.

⁹ Kixchap chi ruq', ut yo chi xlowb'al li xya'al kab', naq yo chi xik. Naq kiwulak wankeb' wi' li xna' xyuwa', kixk'e xya'al kab'eb' ut ke'xlow, ab'anan ink'a' kixye naq sa' xkakaaxt b'aqel kaqkoj kixxok.

¹⁰ Li xyuwa' koho sa' rochoch li ixq ut aran laj Sansón kixb'aanu jun ninq'e jo' k'aynaqeb' xb'aanunkil li saaj winq.

¹¹ Ab'an naq eb' laj Filistea ke'ril laj Sansón, ke'xxaqab' lajeeb' xka'k'aal saaj winq re te'wanq chi xk'atq.

¹² Toja' naq laj Sansón kixye reheb': “Tinye junaq aatin re teeq'ehi. Wi teeye we k'aru li xyaalal chiru li wuqub' kutan naq yooko chi ninq'ehik, tink'e eere lajeeb' xka'k'aal chi jut-aq' ut lajeeb' xka'k'aal chi chaab'il b'aatal.

¹³ Ab'an wi ink'a' nekexruuk xsumenkil, laa'ex tento teek'e we lajeeb' xka'k'aal chi jut-aq' ut lajeeb' xka'k'aal chi chaab'il b'aatal”, chan. Eb' a'an ke'xye: “Ye li taawaj tqaq'ehi, yooko chawab'inkil”, chankeb'.

¹⁴ Tikto laj Sansón kixye reheb': “Rik'in li nawa'ak ki'elk tzekemq, ut rik'in li q'axal kaw rib' kichalk li jwal ki'”, chan. Kinume'k oxib' kutan ut eb' li saaj winq toj maji' neke'ruuk xsumenkil k'aru xyaalal li aatin a'an.

¹⁵ Sa' xka li kutan ke'xye re li rixaqil laj Sansón: “Q'unb'esi laab'eelom re naq tixch'olob' chiqu xyaalal li aatin a'an. Wi ink'a' taab'aanu, taaqak'at li rochoch laayuwa' ut tatqak'at ajwi' laa'at. Malaj xooheeb'oq chaq yal re qelq'ankil?”, chankeb'.

¹⁶ Toja' naq li rixaqil laj Sansón taayaab'aq naq koho rik'in li xb'eelom ut kixye re: “Laa'at xik' nikinaawil ut ink'a' nikinaara. Xaye li q'ehiik traj reheb' lintenamit ut ink'a' xach'olob' chiwu k'aru xyaalal”, chan. Kichaq'ok laj Sansón ut kixye re: “Chi moko linna' linyuwa' xinch'olob' wi'. Ma toja' ta chik laa'at tinye aawe”, chan.

¹⁷ Ab'anan li ixq ink'a' kixkanab' yaab'ak chiru li wuqub' kutan kiwank wi' li ninq'e. Sa' xraqik, sa' xwuq li kutan, laj Sansón kixch'olob' chiru, xb'aan naq li ixq ink'a' naxkanab' xpatz'b'al re. Ut naq ak xnaw, li ixq koxye xyaalal reheb' li rech tenamitul.

¹⁸ Sa' xwuq li kutan, rub'elaj rokik li saq'e, eb' laj Filistea ke'xye re laj Sansón: “K'a' tawi' ru jwal ki' chiru li xya'al kab'? Ut k'a' ta wi' ru q'axal kaw rib' chiru li kaqkoj?”, chankeb'. Laj Sansón kixsumeheb': “Wi ink'a' ta xek'anjela linch'ina tuq'ixq wakax, ink'a' raj xexq'ehink”, chan.

¹⁹ Tikto ki'eechaniik xb'aan xMusiq' li Qaawa', koho Askalón ut aran kixkamsi lajeeb' xka'k'aal chi winq: kirisi li raq'eb' ut kixq'axtesiheb' reheb' li ke'q'ehink. Chirix a'an koho wi' chik sa' rochoch li xyuwa' chi k'ajo' xjosq'il,

²⁰ ut li rixaqil kik'eemank re jun li winq li kixk'oxla laj Sansón naq tz'aqal ramiiw.