Jueces 13 - Q'eqchi Bible

Naq kiyo'laak laj Sansón

¹ Eb' laj Israel ke'xb'aanu wi' chik li k'aru ink'a' nawulak chiru li Qaawa', ut li Qaawa' kixq'axtesiheb' sa' ruq'eb' laj Filistea chiru ka'k'aal chihab'.

² Aran Sorá kiwank jun li winq, xkomoneb' li ralal xk'ajol laj Dan, aj Manóhaj xk'ab'a'. Li rixaqil a'an xma'al ixq, maak'a' xkok'al.

³ Sa' jun kutan li x'ánjel li Qaawa' kixk'ut rib' chiru li ixq a'in ut kixye re: “Laa'at xma'al ixq ut maak'a' aakok'al;

⁴ ab'anan tatsiyanq ut taawanq jun aak'uula'al. Jo'kan naq chalen anaqwan chara aawib', mat-uk'ak b'iin chi moko k'ahil ha' ut ink'a' taatzeka li k'aru ink'a' naru xtzekankil,

⁵ xb'aan naq tatsiyanq ut taawanq jun aak'uula'al. Ink'a' taab'esmanq li rismal li xjolom xb'aan naq q'axtesinb'ilaq re li Yos cho'q nasireo, chalen sa' xsiyajik rik'in li xna'. A'an taatikib'anq xkolb'aleb' laj Israel sa' ruq'eb' laj Filistea”, chan.

⁶ Koho li ixq chi xyeeb'al re li xb'eelom: “Jun li xtaql li Yos xk'ulunk wik'in. K'ajo' naq x'ok ink'a'uxl xb'aan! Kama' li x'ánjel li Yos na'ilok. Moko xinpatz' ta b'ar xchalk chaq chi moko a'an xye we li xk'ab'a'.

⁷ Ab'anan xye we: «Tatsiyanq ut taawanq jun aak'uula'al. Chalen anaqwan mat-uk'ak b'iin chi moko k'ahil ha' ut maatzeka li k'aru ink'a' naru xtzekankil, xb'aan naq q'axtesinb'ilaq li k'uula'al re li Yos chalen chaq sa' xsiyajik toj sa' xkutankil li xkamik»”, chan.

⁸ Toja' naq laj Manóhaj kixyaab'a li xk'ab'a' li Qaawa' ut kixye: “Nintz'aama chawu, at Qaawa', taataqla wi' chik li winq a'an qik'in re naq tixch'olob' chiqu k'aru tqab'aanu rik'in li k'uula'al naq taayo'laaq”, chan.

⁹ Ut li Yos kixsume li xtij laj Manóhaj: li x'ánjel li Yos kik'ulunk wi' chik rik'in li ixq, naq wan chaq sa' k'aleb'aal ut laj Manóhaj li xb'eelom maa'ani chaq rochb'een.

¹⁰ Tikto koho li ixq sa' aanil re xyeeb'al resil re li xb'eelom: “K'e reetal, xk'ut wi' chik rib' li winq li kik'ulunk wik'in sa' li kutan xnume'k”, chan.

¹¹ Kixaqliik laj Manóhaj ut kixtaaqe li rixaqil toj reetal kiwulak wan wi' li winq, ut kixye re: “Ma laa'at li xat-aatinak rik'in li ixq a'in?”, chan. “Laa'in”, chan li x'ánjel li Yos.

¹² Toja' naq laj Manóhaj kixye re: “Naq taatz'aqloq ru laawaatin, k'aru tqab'aanu re li k'uula'al ut chanru naq tqak'iiresi?”, chan.

¹³ Kisumeek xb'aan li x'ánjel li Yos: “A'an tento tixra rib' chiru chixjunil li xinye re li ixq a'in.

¹⁴ Ink'a' naru tixyal li k'aru yiib'anb'il rik'in uub', chi moko naru taaruk' li b'iin ut li ha' nakaltesink. Ink'a' tixtzeka li k'aru tz'ajn ru, ut tento tixpaab' chixjunil li xinye re”, chan.

¹⁵ Toja' naq laj Manóhaj kixye re li x'ánjel li Qaawa': “Chakuy inmaak, matxik. Ink'uub'aq wan junaq aach'ina chib'aat”, chan.

¹⁶ Ab'an li x'ánjel li Qaawa' kichaq'ok ut kixye: “Us ta taamin wu chi kanaak, moko truuq ta tinyal laatzekemq. Ab'anan wi taawaj xkawresinkil junaq aak'atb'il mayej, yeechi'i chiru li Qaawa'”, chan. Xb'aan naq laj Manóhaj ink'a' naxnaw naq a'an li x'ánjel li Qaawa'.

¹⁷ Kixye laj Manóhaj re li x'ánjel li Qaawa': “Ani laak'ab'a' re naq jo'q'e taatz'aqloq ru laawaatin, taaqab'anyoxi chawu?”, chan.

¹⁸ Kichaq'ok li x'ánjel li Qaawa': “K'a' naq nakapatz' we link'ab'a'? A'an q'axal loq'”, chan.

¹⁹ Toja' naq laj Manóhaj kixchap li ch'ina chib'aat rochb'een li mayej, ut kixyeechi'i cho'q k'atb'il mayej sa' xb'een li pek, chiru li Qaawa' li nab'aanunk xchaq'alil ru sachb'ach'oolej.

²⁰ Ut kik'ulmank a'in chiru laj Manóhaj ut li rixaqil: naq li raq'xam li na'elk sa' xb'een li artal kitaqe'k sa' choxa, li x'ánjel li Qaawa' yo chi xik sa' li raq'xam. Toja' naq laj Manóhaj ut li rixaqil ke'xhupub' rib' sa' ch'och' chi loq'onink.

²¹ Naq kisachk li x'ánjel li Qaawa' chiruheb', laj Manóhaj kixk'e reetal naq a'an li x'ánjel li Qaawa'

²² ut kixye re li rixaqil: “Ch'olch'o naq tookamq, xb'aan naq xqil ru li Yos”, chan.

²³ Ab'an li ixq kixye: “Wi xraj ta qakamsinkil li Qaawa', ink'a' raj xk'ul li qak'atb'il mayej chi moko li qayeechi'om. Ink'a' raj xk'ut chiqu chixjunil li k'a'aq re ru a'in chi moko xye raj qe jo'nimal toja' xqab'i”, chan.

²⁴ Ut li ixq kiwank li xk'uula'al, aj Sansón kixk'e cho'q xk'ab'a'. Li ch'ina'al kik'iik ut li Qaawa' ki'osob'tesink re.

²⁵ Ut li xMusiq' li Qaawa' ki'ok chi eek'ank rik'in, aran wankeb' wi' li xmuheb'aaleb' laj Dan, sa' xyanq Sorá ut Estahol.