Jueces 11 - Q'eqchi Bible

Laj Jefté

¹ Laj Jefté, aj Galahad, a'an jun li winq kaw rib' chi yalok. A'an xyum jun aj yumb'eet, ut laj Galahad a'an li xyuwa'.

² Laj Galahad kiwank xkok'al rik'in li tz'aqal rixaqil ut, naq eb' a'in ke'k'iik, ke'raanilasi laj Jefté ut ke'xye re: “Laa'at maak'a' taaweechani sa' xjunkab'lal li qayuwa' xb'aan naq jalan ixq laana'”, chankeb'.

³ Jo'kan naq laj Jefté koho chi najt ut koxkanaaq sa' li na'ajej Tob. Aran ke'xch'utub' rib' rik'in laj Jefté jun ch'uut chi winq maak'a' xk'anjeleb', li neke'xik yalaq b'ar chi elq'ak rochb'een a'an.

⁴ Moqon chik eb' laj Amón ke'ok chi yalok rik'ineb' laj Israel.

⁵ Ut naq yookeb' chi yalok, eb' li xcheekelaleb' Galahad koxe'xsik' laj Jefté sa' li na'ajej Tob

⁶ ut ke'xye re: “Kim, laa'at tatjolominq qe re yalok rik'ineb' laj Amón”, chankeb'.

⁷ Ab'an laj Jefté kixsumeheb' li cheekel winq chi jo'ka'in: “Ma maawa' tab'i' laa'ex li xextz'eqtaanank we ut xineerisi chaq sa' rochoch linyuwa'? K'a' naq nikuleesik' anaqwan naq wankex sa' rahilal?”, chan.

⁸ Ut eb' a'an ke'xye: “A'in aj e naq xoochalk chasik'b'al anaqwan. Tqaj naq tatxik chiqix chi yalok rik'ineb' laj Amón, ut laa'ataq aj k'amol b'e sa' qayanq jo'k'ihalo li wanko sa' li na'ajej Galahad”, chankeb'.

⁹ “Us, maak'a' naxye -chan laj Jefté-. Wi teeraj naq tinsutq'iiq chaq chi yalok rik'ineb' laj Amón ut li Qaawa' tixq'axtesiheb' sa' wuq', laa'inaq laj jolominel eere”.

¹⁰ Ke'xye li xcheekelaleb' Galahad: “Li Qaawa' a'anaq testiiw sa' qayanq. Rahilal chaalel sa' qab'een wi ink'a' taaqab'aanu chixjunil li xaye!”, chankeb'.

¹¹ Toja' naq laj Jefté koho chirixeb', ut eb' li tenamit ke'xxaqab' a'an cho'q aj k'amol b'e ut aj jolominel. Aran Mispá laj Jefté kixye wi' chik chiru li Qaawa' chixjunil li aatin li ak xye.

¹² Chirix chik a'an kixtaqlaheb' aj esil rik'in li awab'ej re Amón re xyeeb'al: “K'aru xinb'aanu aawe naq taawaj chalk anaqwan chi yalok rik'in lintenamit?”.

¹³ Kichaq'ok li awab'ej re Amón ut kixye reheb' li xtaql laj Jefté: “Naq ke'elk chaq Ejiipt, eb' laj Israel ke'xmaq' chiqu li qana'aj chalen chaq sa' li nima' Arnón toj sa' li nima' Yabok ut Jordán. Jo'kan naq anaqwan tento teeq'axtesi wi' chik we sa' xyaalal”, chan.

¹⁴ Toja' naq laj Jefté kixtaqla wi' chik xyeeb'al re li awab'ej re Amón:

¹⁵ “Jo'ka'in xye laj Jefté: Eb' laj Israel ink'a' ke'xchap li xna'ajeb' laj Mohab chi moko ke'xmaq' li na'ajej reheb' laj Amón.

¹⁶ Naq ke'elk chaq Ejiipt, eb' laj Israel ke'b'eek sa' li chaqich'och' toj wan wi' li Palaw Suf ut ke'wulak Kadés.

¹⁷ Toja' naq ke'xtaqla aj esil rik'in li awab'ej re Edom re xyeeb'al re: «B'aanu usilal, kanab'o chi nume'k sa' laana'aj», chankeb'. Ab'an li awab'ej re Edom ink'a' kiraj. Ke'taqlaak ajwi' aj esil rik'in li awab'ej re Mohab, a'ut chi moko a'an kixkanab'eb' laj Israel chi nume'k aran. Jo'kan naq ke'kanaak Kadés.

¹⁸ Moqon chik sa' li chaqich'och' ke'xk'e q'oot chirix li na'ajej Edom ut Mohab, ut ke'wulak sa' xjayal releb'l saq'e re Mohab. Ke'hilank junpak'al li nima' Arnón, ab'an ink'a' ke'xq'ax li nima', xb'aan naq aran natiklaak li na'ajej Mohab.

¹⁹ Toja' naq eb' laj Israel ke'xtaqlaheb' aj esil rik'in laj Sijón, awab'ej re Amor, li wan chaq chi awab'ejil aran Jesbón, ut ke'xye re: «Kanab'o chi nume'k sa' laana'aj re toowulaq sa' li qach'och'», chankeb'.

²⁰ Ab'an laj Sijón ink'a' kixkanab'eb' laj Israel chi nume'k sa' li xna'aj, kixch'utub'eb' b'an chixjunileb' li xpoyanam, koxe'xk'ojob' li xmuheb'aaleb' aran Yahás ut ke'ok chi yalok rik'ineb' laj Israel.

²¹ Ab'anan li Qaawa', xYos laj Israel, kixq'axtesi laj Sijón ut chixjunileb' li xpoyanam sa' ruq' laj Israel, li kixq'ax ruheb' ut kireechani chixjunil li xna'ajeb' laj Amor li wankeb' aran.

²² Jo'kan naq eb' laj Israel ke'reechani chixjunil li xna'ajeb' laj Amor, chalen chaq sa' li nima' Arnón toj wan wi' li nima' Yabok, ut chalen chaq sa' li chaqich'och' toj sa' li nima' Jordán.

²³ “K'a'ut naq anaqwan taawaj xmaq'b'al chiqu li na'ajej li ak xrisihom li Qaawa', li xYos laj Israel, reheb' laj Amor ut ak xq'axtesihom qe chiqeechani?

²⁴ Ma ink'a' tab'i' ak wank aawe chixjunil li ch'och' li kixsi aawe laj Kamós laayos? Jo'kan ajwi' laa'o. Chixjunil li kixsi qe li Qaawa' li qaYos chi qeechani, a'an qe laa'o.

²⁵ Ma q'axal nim laawankil chiru laj Balak, ralal laj Sipor, awab'ej re Mohab? A'an maajun sut kichalk chi yalok rik'ineb' laj Israel.

²⁶ Ak wank o'lajuk'aal (300) chihab' rokikeb' laj Israel sa'eb' li tenamit Jesbón, Aroher ut sa' li xk'aleb'aaleb', jo'wi' sa' chixjunil li tenamit li wankeb' chi xka'pak'alil li nima' Arnón. K'a'ut naq ink'a' xapatz' li ch'och' a'an chiru li o'lajuk'aal chihab' a'in?

²⁷ Laa'in ink'a' xinmaakob'k chawu. Ab'anan laa'at ink'a' us yookat naq xatchalk chi yalok wik'in. Li Qaawa', laj Raqol aatin, chiraqoq aatin sa' xyanqeb' laj Israel ut eb' laj Amón”, chan laj Jefté.

²⁸ Ab'an li awab'ej re Amón ink'a' kixk'ul xch'ool li k'aru kixtaqla xyeeb'al laj Jefté.

Laj Jefté ut li xrab'in

²⁹ Toja' naq li xMusiq' li Qaawa' kikub'e chaq sa' xb'een laj Jefté; ut a'in kixb'eeni Galahad ut Manasés, kinume'k Mispá re Galahad ut chirix a'an ki'ok sa' xna'ajeb' laj Amón.

³⁰ Laj Jefté kixyeechi'i a'in sa' jurament re li Qaawa': “Wi taaq'axtesiheb' sa' wuq' eb' laj Amón,

³¹ laa'in tinmayeja chawu li xb'een taa'elq chaq sa' li wochoch chink'ulb'al naq tinsutq'iiq chaq sa' tuqtuukilal. K'atb'il mayej naq tinq'axtesi aawe”, chan.

³² Laj Jefté ki'ok sa' xna'ajeb' laj Amón re yalok rik'ineb', ut li Qaawa' kixq'axtesiheb' sa' ruq'.

³³ Kixq'ax ruheb' chalen chaq Aroher toj chi xk'atq Minit ut Abel-Keramín, ut kixchap junmay chi tenamit. Jo'ka'in naq eb' laj Amón ke'kanaak rub'el xwankilaleb' laj Israel.

³⁴ Naq laj Jefté kisutq'iik wi' chik Mispá sa' li rochoch, ki'elk chaq li xrab'in chi xk'ulb'al, yo chaq chi xajok ut chi xch'e'b'al li tzojtzoj ch'iich'. Jun ajwi' li xrab'in laj Jefté; chirix a'an maak'a' chik xkok'al.

³⁵ K'ajo' naq kiraho'k xch'ool laj Jefté naq kiril li xrab'in! Kixq'ich li raq' ut kixjap re chi xyeeb'al: “Toq'ob' wu, at inrab'in! K'ajo' xrahil linch'ool nachalk aab'aan! Laa'at xab'oq chaq jun nimla rahilal sa' inb'een, xb'aan naq wank k'aru xinyeechi'i re li Qaawa' ut anaqwan ink'a' naru tinq'et li waatin”, chan.

³⁶ Ut a'an kixsume: “At inyuwa', b'aanu we li k'aru xayeechi'i re li Qaawa', xb'aan naq A'an xk'ehok aawe naq xaq'ax ruheb' laj Amón, li xik' neke'ilok aawe”, chan li xrab'in laj Jefté.

³⁷ Chirix chik a'an kixye re li xyuwa': “Ab'anan nintz'aama usilal chawu, kanab'in chi xik wiib' pohaq sa'eb' li tzuul chi xyaab'ankil rix lintuq'ixqilal wochb'eeneb' li wamiiw”, chan.

³⁸ “Ayu”, chan li xyuwa'. Ut kixkanab' chi xik chiru wiib' po. Koho li ixqa'al rochb'een li rech tuq'ixqilal ut kixyaab'a rix li xtuq'ixqilal sa'eb' li tzuul.

³⁹ Naq ak xnume'k li wiib' po, kisutq'iik chaq rik'in li xyuwa', ut a'in kixb'aanu re jo' chanru yeechi'inb'il chaq chiru li Yos. Li ixqa'al ink'a' wanjenaq rik'in winq.

⁴⁰ Xb'aan a'an eb' laj Israel ke'xtikib' xb'aanunkil a'in: rajlal chihab' eb' li saaj ixq aj Israel neke'xik chi yaab'ak kaahib'aq kutan chirix li xrab'in laj Jefté aj Galahad.