San Juan 8 - Q'eqchi Bible

¹ Ab'an li Jesus koho sa' xb'een li tzuul Olivos.

² Toj eq'la kiwulak wi' chik sa' rochoch li Yos, ut chixjunil li tenamit ke'wulak rik'in: kik'ojlaak ut ki'ok chi xtzolb'aleb'.

³ Toja' naq eb' laj tz'iib' ut eb' laj pariseey ke'xk'am rik'in li Jesus jun li ixq kitawmank chaq chi xmuxb'al li xsumlajik; ke'xxaqab' sa' yiib'ej

⁴ ut ke'xye re li Jesus: —At Tzolonel, li ixq a'in xqataw chaq chi xmuxb'al li xsumlajik.

⁵ Laj Moisés kixk'e qataqlankil sa' li Chaq'rab' xkamsinkileb' chi pek eb' li ixq jo'keb' a'in. Laa'at k'aru nakaye?

⁶ Ke'xye a'in yal re xyalb'al rix, re xtawb'al k'aru te'xjit wi'. A'ut li Jesus kixk'utzub' rib' ut ki'ok chi tz'iib'ak sa' ch'och' rik'in ru'uj ruq'.

⁷ Eb' a'an neke'xpatz'ya re, jo'kan naq kixaqliik ut kixye reheb': —Ani eere laa'ex maak'a' xmaak, a'an xkutaq li xb'een pek.

⁸ Ut kixk'utzub' wi' chik rib', ki'ok chi tz'iib'ak sa' ch'och'.

⁹ Naq ke'rab'i li aatin a'in, ke'xtikib' elk chi xjunjunqaleb', xb'enwa eb' li cheekel winq, toj reetal naq ke'elk chixjunileb'; ut li Jesus kikanaak xjunes rochb'een li ixq li toj xaqxo sa' yiib'ej.

¹⁰ Kixaqliik li Jesus ut kixye re: —At ixq, b'ar wankeb'? Ma maa'ani xk'ehok aawe sa' tojb'amaak?

¹¹ Kichaq'ok a'an: —Maajun, Qaawa'. Ut li Jesus kixye re: —Chi moko laa'in tatink'e sa' tojb'amaak. Ayu ut chalen anaqwan matmaakob'k chik].

Li Jesus a'an li xsaqenk li ruuchich'och'

¹² Li Jesus kiraatinaheb' wi' chik li tenamit ut kixye reheb': —Laa'in li xsaqenk li ruuchich'och'. Li taataaqenq we, ink'a' taab'eeq sa' li aak'ab', wanq b'an li xsaqenk li yu'am rik'in.

¹³ Toja' naq eb' laj Pariseey ke'xye re: —Laa'at yal nakach'olob' aawib'; jo'kan naq laach'olob'ahom moko paab'ajel ta.

¹⁴ Li Jesus kixsumeheb' ut kixye: —Us ta ninch'olob' wib', ab'an li ninch'olob' a'an paab'ajel, xb'aan naq ninnaw b'ar xinchalk chaq ut b'ar xik we; a'ut laa'ex ink'a' nekenaw b'ar ninchalk ut b'ar xik we.

¹⁵ Laa'ex nekexraqok aatin jo' naraj li tz'ejwalej; laa'in maa'ani sa' aj b'een ninraqok aatin.

¹⁶ Ut wi tinraqoq aatin, linraqb'a aatin a'an tz'aqal yaal xb'aan naq moko wankin ta injunes, wochb'een b'an li kitaqlank chaq we.

¹⁷ Ut sa' leechaq'rab' tz'iib'anb'il naq li k'aru te'xye wiib'aq chi testiiw, a'an paab'ajel.

¹⁸ Laa'in nin'aatinak chiwix injunes wib'; jo'kan ajwi' li Yuwa'b'ej li kitaqlank chaq we, na'aatinak chiwix.

¹⁹ Toja' naq ke'xye re: —B'ar wank laaYuwa'? Kichaq'ok li Jesus ut kixye: —Ink'a' nekenaw wu chi moko nekenaw ru linYuwa'; wi ta nekenaw wu, nekenaw raj ajwi' ru linYuwa'.

²⁰ Eb' li aatin a'in kixye li Jesus sa' li xna'aj li mayej, naq yo chi xtzolb'aleb' li tenamit sa' rochoch li Yos. Ut maa'ani kichapok re xb'aan naq toj maji' nawulak li xhonalil.

Kaweb' xch'ool eb' laj Judiiy

²¹ Li Jesus kixye wi' chik reheb': —Xik we laa'in. Laa'ex tineesik', ut texkamq sa' leemaak. B'ar wi' xik we laa'in, ink'a' truuq texxik laa'ex.

²² Neke'xyehatq eb' laj Judiiy: —Malaj ut tixkamsi rib' naq naxye: «B'ar wi' xik we laa'in, ink'a' truuq texxik laa'ex»?

²³ Ut a'an kixye reheb': —Laa'ex aj taq'a, laa'in aj taqe'q. Laa'ex rehex li ruuchich'och' a'in, laa'in maawa'in re li ruuchich'och' a'in.

²⁴ Jo'kan naq xinye eere naq texkamq sa' leemaak xb'aan naq, wi ink'a' nekepaab' naq Laa'inin, texkamq sa' leemaak.

²⁵ Toja' naq ke'xye re: —Anihat pe' laa'at? Li Jesus kixsumeheb' ut kixye: —Chalen chaq sa' xtiklajik yookin chi xyeeb'al eere.

²⁶ Naab'al raj naru tinye cherix li tinraqoq wi' aatin, ab'an li kitaqlank chaq we a'an paab'ajel; ut li k'aru kiwab'i chaq rik'in, a'an li ninye re li ruuchich'och'.

²⁷ Eb' a'an ink'a' ke'xtaw ru naq yo chi raatinankileb' chirix li Yuwa'b'ej.

²⁸ Jo'kan naq li Jesus kixye reheb': —Akaq xetaqsi li K'ajolb'ej, toja' naq teenaw naq Laa'inin ut maak'a' ninb'aanu injunes wib', ninye b'an li k'aru kixk'ut chiwu li Yuwa'b'ej.

²⁹ Ut li kitaqlank chaq we wank wik'in: ink'a' xinxkanab' injunes, xb'aan naq junelik ninb'aanu li nawulak chiru.

³⁰ Ut naq yo chi aatinak chi jo'ka'in, naab'aleb' ke'paab'ank re.

Li Jesus ut laj Abrahán

³¹ Kixye li Jesus reheb' laj Judiiy li ke'paab'ank re: —Wi junelik eetz'ejwalihom eerib' rik'in li waatin, tz'aqal intzolomex;

³² teenaw li yaal ut li yaal taa'ach'ab'anq eere.

³³ Ke'chaq'ok eb' a'an: —Laa'o ralal xk'ajolo laj Abrahán. Maajun wa eechaninb'ilo xb'aan anihaq. Chan put ru naq nakaye laa'at: «Toxexwanq chi ach'ab'anb'il»? chankeb' re.

³⁴ Li Jesus kixsumeheb' ut kixye: —Relik chi yaal ninye eere: yalaq ani nab'aanunk re li maak, a'an eechaninb'il naq wank.

³⁵ Li na'eechaniik xb'aan anihaq, ink'a' nakanaak chi junajwa sa' li kab'l; a'ut li alalb'ej nakanaak chi junajwa.

³⁶ Jo'kan utan, wi li K'ajolb'ej texrach'ab', relik chi yaal naq ach'ab'anb'ilaqex.

³⁷ Ninnaw chi us naq ralal xk'ajolex laj Abrahán; ab'an nekeraj inkamsinkil xb'aan naq li waatin ink'a' naxtaw xna'aj sa' leech'ool.

³⁸ Laa'in ninye li wilom chaq rik'in li Yuwa'b'ej ut laa'ex nekeb'aanu li xerab'i rik'in leeyuwa'.

³⁹ Ke'chaq'ok eb' a'an: —Li qayuwa' a'an laj Abrahán! chankeb'. Li Jesus kixye reheb': —Wi ralal xk'ajolex laj Abrahán, b'aanuhomaq li kixb'aanu laj Abrahán!

⁴⁰ Ab'anan laa'ex nekeraj inkamsinkil xb'aan naq xinye eere li yaal li xwab'i chaq rik'in li Yos. A'ut laj Abrahán ink'a' kixb'aanu chi jo'kan!

⁴¹ Laa'ex nekeb'aanu li naxb'aanu leeyuwa'. Ke'xye ut re: —Laa'o ink'a' xooyo'laak sa' muxuk ib'; jun ajwi' li qayuwa': a'an li Yos!

⁴² Kixye li Jesus reheb': —Wi ta a' li Yos leeYuwa', nikineera raj, xb'aan naq rik'in li Yos kin'elk ut kinchalk chaq. Ink'a' kinchalk injunes wib'; a' li Yos, a'an li kitaqlank chaq we.

⁴³ K'a'ut naq ink'a' neketaw ru li waatinob'aal? Xb'aan naq ink'a' nekexruuk chi rab'inkil li waatin.

⁴⁴ Laa'ex rehex leeyuwa', a' laj tza, ut li naraj leeyuwa' a'an nekeraj xb'aanunkil. A'an aj kamsinel chalen chaq sa' xtiklajik, ut ink'a' kixkuy wank sa' li yaal, xb'aan naq maak'a' li yaal rik'in. Naq naxye li tik'ti', naxye li na'elk chaq rik'in, xb'aan naq aj tik'ti' ut xyuwa'il li tik'ti'.

⁴⁵ A'ut laa'in ink'a' nikineepaab', xb'aan naq ninye li yaal.

⁴⁶ Ani eere truuq taayehoq naq wank inmaak? Wi ninye li yaal, k'a'ut naq ink'a' nikineepaab'?

⁴⁷ Li ani nachalk rik'in li Yos narab'i li naxye li Yos; ut laa'ex ink'a' nekerab'i xb'aan naq moko rehex ta li Yos.

⁴⁸ Ke'chaq'ok eb' laj Judiiy: —Yaal ajwi' naqaye naq laa'at aj Samaria ut aj tza wank aawik'in, chankeb'.

⁴⁹ Kichaq'ok li Jesus ut kixye: —Maak'a' aj tza wik'in, nawoxloq'i b'an linYuwa' ut laa'ex ink'a' nekek'e inloq'al.

⁵⁰ Ab'an laa'in ink'a' ninsik' inloq'al; ak wank li nasik'ok re ut naraqok aatin.

⁵¹ Relik chi yaal ninye eere: wi junaq naxk'uula li waatin, ink'a' taaril li kamk chi junajwa.

⁵² Kiyehe'k ut re xb'aaneb' laj Judiiy: —Anaqwan naqanaw naq wank aj tza aawik'in. Laj Abrahán kikamk, jo'kaneb' ajwi' eb' li propeet, ut laa'at nakaye: «Wi junaq tixk'e xch'ool chirix li waatin, ink'a' tixyal li kamk chi junajwa».

⁵³ Ma q'axal nim tab'i' laawankil chiru li qayuwa' laj Abrahán li kikamk? Eb' li propeet ajwi' ke'kamk. Anihat naq nakaye aawib'?

⁵⁴ Kichaq'ok li Jesus ut kixye: —Wi ta laa'in ninnima inloq'al injunes wib', linloq'al maak'a' na'ok wi'. A' b'an linYuwa' naxnimob'resi inloq'al, a' li nekeye laa'ex: «A'an li qaYos»,

⁵⁵ us ta ink'a' nekenaw ru. Laa'in yaal naq ninnaw ru, ut wi tinye ta naq ink'a' ninnaw ru, laa'inaq raj aj tik'ti' jo' laa'ex. Ab'anan ninnaw ru ut nink'e inch'ool chirix li raatin.

⁵⁶ Laj Abrahán leeyuwa' k'ajo' naq kisaho'k sa' xch'ool chi xk'oxlankil rilb'al linKutan; kiril ut kisaho'k sa' xch'ool.

⁵⁷ Toja' naq eb' laj Judiiy ke'xye re: —Toj maak'a'at lajeeb' roxk'aal chihab' ut ak xawil ru laj Abrahán?

⁵⁸ Kixye li Jesus reheb': —Relik chi yaal ninye eere: toj maji'aq nayo'laak laj Abrahán, ak Laa'inin chaq.

⁵⁹ Toja' naq ke'xxok xpek re xkutb'al li Jesus; ab'an a'an kixmuq rib' ut ki'elk sa' rochoch li Yos.