San Juan 7 - Q'eqchi Bible

Li Jesus koho Jerusalén sa' li ninq'e ut kixtzoleb' li tenamit

¹ Chirix chik a'in li Jesus ki'ok chi b'eek Galilea, ut ink'a' naru taab'eeq Judea xb'aan naq eb' laj Judiiy yookeb' chi xsik'b'al chan raj ru te'xkamsi.

² Ak taanach'oq chaq li xninq'eheb' laj Judiiy, a' li xNinq'eheb' li Muheb'aal neke'xye re.

³ Kiyehe'k ut re xb'aaneb' li rech'alal: —Elen arin ut ayu Judea re naq te'ril ajwi' eb' laatzolom li xninqal ru b'aanuhom nalajaab'aanu,

⁴ xb'aan naq maajun naxb'aanu xk'anjel sa' muqmu, wi a'an naraj taanawe'q ru. Wi nakab'aanu a'in, k'ut aawib' chiru li ruuchich'och'.

⁵ Xb'aan naq chi moko eb' li rech'alal neke'paab'ank re.

⁶ Toja' naq kixye li Jesus reheb': —Toj maji' nawulak linhonal, a'ut leehonal laa'ex junelik wank cheruq'.

⁷ Li ruuchich'och' ink'a' naru xik' nekexril; a'ut laa'in xik' nikinril xb'aan naq nink'ut naq ink'a' us li xb'aanuhomeb'.

⁸ Taqenqex laa'ex sa' li ninq'e; laa'in ink'a' tintaqe'q sa' li ninq'e a'in xb'aan naq maji' natz'aqlok linhonal.

⁹ Naq kixye a'in, toj kikanaak Galilea.

¹⁰ Ut naq ke'taqe'k li rech'alal sa' li ninq'e, kitaqe'k ajwi' li Jesus: ab'an moko chi k'utk'u ta naq koho, chi muqmu b'an.

¹¹ Eb' laj Judiiy yookeb' chi xsik'b'al li Jesus sa' li ninq'e, ut neke'xyehatq: “B'ar wank a'an?”.

¹² Ut q'axal neke'hashotk eb' li poyanam chirix a'an. Wan te'yehoq: “Chaab'il winq a'an”. Wankeb' chik neke'xye: “Ink'a', naxb'alaq'iheb' b'an li tenamit”.

¹³ Ab'anan maa'ani na'aatinak chirix chi kutankil xb'aan xxiweb' chiruheb' laj Judiiy.

¹⁴ Sa' xyiitoq li ninq'e kitaqe'k li Jesus sa' rochoch li Yos ut ki'ok chi xtzolb'aleb' li tenamit.

¹⁵ Ut eb' laj Judiiy neke'xyehatq chi sachsookeb' xch'ool: —Chanru naq li winq a'in naxnaw chi us chi moko tzolb'il ta?

¹⁶ Kichaq'ok li Jesus ut kixye reheb': —Li k'aru nink'ut laa'in moko we ta, re b'an li kitaqlank chaq we.

¹⁷ Wi junaq traj xb'aanunkil li rajom li Yos, tixnaw ma re li Yos li nintzoleb' wi' malaj yal injunes wib' nin'aatinak.

¹⁸ Ani na'aatinak yal xjunes rib', a'an naxsik' naq taak'eemanq xloq'al; ab'an li naxsik' xloq'al li kitaqlank chaq re, a'an paab'ajel ut maak'a' b'alaq'ik rik'in.

¹⁹ “Ma maawa' tab'i' laj Moisés li kik'ehok eere li Chaq'rab'? Ut maajun eere napaab'ank re li Chaq'rab'. K'a'ut naq teeraj inkamsinkil?”.

²⁰ Ke'chaq'ok li tenamit: —Aj tza wank aawik'in! Ani taa'ajoq aakamsinkil, chankeb'.

²¹ Li Jesus kixsumeheb' ut kixye: —Jun ajwi' xnimal inb'aanuhom xinb'aanu ut chejunilex sachso leech'ool xexkanaak.

²² Laj Moisés kixk'e eere li sirkunsisyon (moko xchalk ta a'in rik'in laj Moisés, rik'ineb' b'an leexe'toonil yuwa') ut laa'ex sa' sábado nekeb'aanu li sirkunsisyon.

²³ Wi nab'aanumank li sirkunsisyon re junaq winq sa' sábado re naq ink'a' taaq'etmanq li xChaq'rab' laj Moisés, k'a'ut naq nekexjosq'o'k wik'in naq xink'irtasi chi xjunxaqalil jun li winq sa' sábado?

²⁴ Mexraqok aatin a' yaal chanru nekeril, chexraqoq b'an aatin sa' tiikilal.

Ma a'an a'in li Kriist?

²⁵ Wankeb' aj Jerusalén ke'yehok: —Ma maawa' tab'i' a'in li neke'raj xkamsinkil?

²⁶ K'ehomaq reetal: yo chi aatinak chi kutankil ut maak'a' neke'xye re. Malaj ut eb' li xb'eenil xe'xnaw chi tz'aqal naq a'an li Kriist?

²⁷ Ab'anan a'in naqanaw b'ar nachalk chaq, a'ut naq tol'elq li Kriist, maa'ani taanawoq re b'ar ta taachalq.

²⁸ Toja' naq li Jesus, naq yo chi xtzolb'aleb' li tenamit sa' rochoch li Yos, kixye chi kaw xyaab' xkux: —Yaal naq nekenaw wu ut nekenaw b'ar xinchalk chaq, ab'an ink'a' xinchalk injunes wib', wank b'an li tz'aqal kitaqlank chaq we, a' li ink'a' nekenaw ru laa'ex.

²⁹ Laa'in ninnaw ru xb'aan naq rik'in ninchalk chaq ut a'an kitaqlank chaq we.

³⁰ Ke'raj raj xchapb'al, ab'an maa'ani kixtaqsi li ruq' sa' xb'een, xb'aan naq toj maji' nawulak li xhonalil.

Li Jesus kixye naq xik re

³¹ Naab'aleb' sa' xyanqeb' li tenamit ke'paab'ank re, yookeb' chi xyeeb'al: —Naq taak'ulunq li Kriist, ma tixb'aanu naab'al chik xninqal eetalil chiru li xb'aanu a'in?

³² Eb' laj Pariseey ke'rab'i naq eb' li tenamit neke'xyehatq a'in chirix li Jesus; jo'kan naq ke'xtaqla eb' li xtaql chi xchapb'al.

³³ Kixye ut li Jesus: —Toj tinwanq chik kach'inaq eerik'in, toja' naq tinxik rik'in li kitaqlank chaq we.

³⁴ Tineesik' ut ink'a' tineetaw, ut b'arwi' wanqin laa'in ink'a' texruuq chi xik laa'ex.

³⁵ Toja' naq eb' laj Judiiy ke'xye chirib'ileb' rib': —B'ar anchal taaxik a'an naq ink'a' tooruuq xtawb'al? Malaj taaxik ta rik'ineb' laj Griego li xe'xcha'cha'i rib'eb', re naq tixtzoleb'?

³⁶ K'aru xyaalal li aatin kixye: «Tineesik' ut ink'a' tineetaw, ut b'arwi' wanqin laa'in, ink'a' texruuq chi xik laa'ex»?

Li Jesus kixyeechi'i li ha' nak'ehok yu'am

³⁷ Sa' roso'jik li ninq'e, sa' xnimal xkutankil, kixye li Jesus chi xaqxo ut chi kaw xyaab' xkux: “Li taachaqiq re, chalqaq wik'in, ut li napaab'ank we, chi'uk'aq.

³⁸ Jo' naxye li Santil Hu: Xnima'il yo'yookil ha' te'elq rik'in”.

³⁹ Kixye a'in chirix li Musiq'ej li te'xk'ul eb' li te'paab'anq re: sa' li kutan a'an toj maak'a' li Musiq'ej xb'aan naq li Jesus toj maji' nanimaak xloq'al.

Ke'ok wi' chik chi xwech'b'al rix ani li Jesus

⁴⁰ Naq ke'rab'i eb' li aatin a'in, wan sa' xyanqeb' li tenamit ke'yehok: —A'an tz'aqal li propeet.

⁴¹ Wankeb' chik ke'yehok: —A'an a'in li Kriist. Ab'an wankeb' ajwi' ke'yehok: —Ma aran tab'i' Galilea taachalq li Kriist?

⁴² Ma ink'a' tab'i' naxye li Santil Hu naq li Kriist taachalq chaq sa' xyanqeb' li ralal xk'ajol laj David, sa' li k'aleb'aal Belén, b'arwi' kiwank laj David?

⁴³ Jo'kan naq kichalk jun jachok ib' sa' xyanqeb' li tenamit sa' xk'ab'a' li Jesus.

⁴⁴ Wankeb' ke'raj raj xchapb'al, ab'anan maa'ani kixtaqsi li ruq' chi xb'een.

⁴⁵ Naq eb' laj k'aak'alenel li ke'taqlaak chi xchapb'al li Jesus ke'sutq'iik rik'ineb' li Xb'eenileb' aj tij jo'wi' rik'ineb' laj Pariseey, ke'yehe'k re: —K'a'ut naq ink'a' xek'am chaq?

⁴⁶ Ke'chaq'ok eb' laj k'aak'alenel: —Maajun junaq winq na'aatinak jo' na'aatinak li winq a'an, chankeb'.

⁴⁷ Ke'sumeek xb'aaneb' laj Pariseey: —Ma xexb'alaq'iik ajwi' chaq laa'ex?

⁴⁸ Ma wank tab'i' junaq reheb' li xb'eenil malaj junaq aj Pariseey li xpaab'ank re?

⁴⁹ A'ut eb' li poyanam a'in li ink'a' neke'xnaw li Chaq'rab', a'aneb' xb'alb'aheb' ru.

⁵⁰ Jun xkomoneb' a'an, a' laj Nikodemo li kiwulak rik'in li Jesus xb'enwa, kixye reheb':

⁵¹ —Ma naraqok tab'i' aatin li qaChaq'rab' sa' xb'een junaq winq chi toj maji' na'ab'iik a'an ut maji' nanawmank li naxb'aanu?

⁵² Ke'chaq'ok ut ke'xye re: —Ma laa'at ajwi' aj Galilea? Tz'ili rix ut taak'e reetal naq maajun propeet na'elk chaq Galilea.

Li ixq li kixmux xsumlajik

⁵³ [Ut li junjunq koho sa' rochoch.