San Juan 4 - Q'eqchi Bible

Li Jesus sa' xyanqeb' laj Samaria

¹ Eb' laj Pariseey ke'rab'i resil naq li Jesus q'axal naab'aleb' naxq'unb'esiheb' xch'ool chi ok cho'q xtzolom ut naxkub'siheb' xha', q'axal naab'aleb' chik chiruheb' li yookeb' chi taaqenk re laj Jwan

² (moko a' ta li Jesus nakub'sink ha', a'eb' b'an li xtzolom).

³ Naq li Jesus kixnaw a'an, ki'elk Judea ut koho wi' chik Galilea.

⁴ Naq yo chi xik Galilea, tento naq taanume'q Samaria.

⁵ Jo'kan naq kiwulak sa' jun tenamit sa' xteepal Samaria, Sikar xk'ab'a', nach' rik'in li na'ajej kixk'e laj Jakob re laj José li ralal.

⁶ Aran wank li yo'leb'aal ha' re laj Jakob. Kitawaak li Jesus chi b'eek, jo'kan naq kik'ojlaak chire li yo'leb'aal ha'. Ak xwa'leb'o'k tana.

^7-8 Eb' li xtzolom ak xkoheb' chik sa' li tenamit chi xloq'b'al xtzekemqeb'. Toja' naq jun li ixq aj Samaria kiwulak chi risinkil xha', ut li Jesus kixye re: —K'e b'ayaq wuk'a'.

⁹ Li ixq aj Samaria kixye re: —Chan put ru naq laa'at aj judiiy nakapatz' aawuk'a' we laa'in ixq aj Samaria? Xb'aan naq eb' laj Judiiy ink'a' neke'raatina rib' rik'ineb' laj Samaria.

¹⁰ Kichaq'ok li Jesus ut kixye: —Wi nakanaw ta li xsimaatan li Yos ut ani li nayehok aawe: «K'e b'ayaq wuk'a'», laa'at raj xapatz' aawuk'a' re ut a'an tixk'e raj aawe yo'yookil ha'.

¹¹ Kixye li ixq re: —Qaawa', maak'a' k'aru taawisi wi' li ha' ut cham li jul: b'ar put taataw li yo'yookil ha'?

¹² Ma nim tab'i' laawankil chiru li qayuwa' laj Jakob, li kixk'e qe li yo'leb'aal ha' a'in b'arwi' ki'uk'ak a'an, eb' li ralal xk'ajol ut li xketomq?

¹³ Kichaq'ok li Jesus ut kixye: —Chixjunil li taa'uk'uq re li ha' a'in, taachaqiq wi' chik re,

¹⁴ a'ut li taa'uk'uq re li ha' tink'e laa'in, maajoq'e chik taachaqiq re: li ha' tink'e laa'in wanq rik'in jo' jun yu'amha' nab'ululnak re li junelik yu'am.

¹⁵ Kiyehe'k ut re xb'aan li ixq: —Qaawa', k'e we li ha' a'in re naq ink'a' chik taachaqiq we chi moko tinchalq chik arin chi risinkil inha'.

¹⁶ Li Jesus kixye re: —Ayu, b'oq chaq laab'eelom ut chalqat wi' chik arin.

¹⁷ Kichaq'ok li ixq: —Maak'a' inb'eelom. —Us xaye naq maak'a' aab'eelom -chan li Jesus re-.

¹⁸ Xb'aan naq oob' aab'eelom xwank ut li wank aawik'in anaqwan moko aab'eelom ta; rik'in a'in xaye li yaal.

¹⁹ Kixye li ixq re: —Qaawa', nink'e reetal naq laa'at propeet.

²⁰ Eb' li qana' qayuwa' xe'loq'onink sa' xb'een li tzuul a'in ut laa'ex nekeye naq li na'ajej b'arwi' tento li loq'onink a'an Jerusalén.

²¹ Li Jesus kixye re: —At ixq, paab' li ninye: Taawulaq xq'ehil naq chi moko sa' xb'een li tzuul a'in chi moko Jerusalén teeloq'oni ru li Yuwa'b'ej.

²² Laa'ex nekeloq'oni li b'arwan ink'a' nekenaw; laa'o naqaloq'oni li naqanaw, xb'aan naq li kolb'a ib' rik'ineb' laj Judiiy nachalk chaq.

²³ Ab'anan chalk re xq'ehil (ak xk'ulunk ajwi') naq eb' li tz'aqal aj loq'oninel te'xloq'oni ru li Yuwa'b'ej sa' musiq'ej ut rik'in li yaal, xb'aan naq jo'ka'in naraj li Yuwa'b'ej naq taaloq'oniiq ru.

²⁴ Li Yos a'an musiq'ej, ut eb' li neke'loq'onink tento te'loq'oninq rik'in Musiq'ej ut rik'in li yaal.

²⁵ Kixye li ixq re: —Ninnaw naq tol'elq li Mesiiy, a' li Kriist neke'xye re; ut naq taachalq a'an, tixk'ut chiqu chixjunil.

²⁶ Li Jesus kixye re: —Laa'inin, li yookin chi aatinak aawik'in.

²⁷ Aka' chik eb' li xtzolom ke'wulak, ke'sachje'k xch'ool chi rilb'al naq li Jesus yo chi aatinak rik'in jun li ixq. Ab'an maajun kiyehok re: “K'aru taawaj re?”, malaj: “K'a'ut naq nakat-aatinak rik'in?”.

²⁸ Li ixq kixkanab' li xkuk, koho sa' aanil sa' li tenamit ut koxye reheb' li wankeb' aran:

²⁹ —Kimqex chi rilb'al jun li winq xye we chixjunil linb'aanuhom. Malaj a'an ta li Kriist?

³⁰ Jo'kan naq eb' li wankeb' sa' li tenamit a'an, ke'elk chaq ut koheb' wan wi' li Jesus.

³¹ Naq toj maji' neke'wulak aran, eb' li xtzolom ke'ok chi relajinkil ru: —At Tzolonel, wa'in.

³² Ab'anan li Jesus kixye reheb': —Laa'in wank jun intzekemq li ink'a' nekenaw laa'ex.

³³ Eb' li xtzolom ke'xyehatq chirib'ileb' rib': —Malaj ani xk'amok chaq xwa?

³⁴ Kixye li Jesus reheb': —Lintzekemq a'an naq tinb'aanu li rajom li kitaqlank chaq we ut tink'e chi yaalo'k ru li xk'anjel.

³⁵ Ma ink'a' tab'i' nekeye laa'ex: «Kaahib' po chik maa nawulak xq'ehil li q'olok»? Ut laa'in ninye eere: Taqsihomaq leerilob'aal ut ilomaq li awimq; ak xq'ano'k, ak us chik xq'olb'al.

³⁶ Laj q'olonel naxk'ul li xtojb'al ut naxxok ru li awimq re li junelik yu'am; jo'kan naq laj awinel ut laj q'olonel neke'saho'k sa' xch'ool chi xkab'ichaleb'.

³⁷ Xb'aan naq rik'in a'in natz'aqlok ru li aatin: «Jun na'awok ut jalan chik naq'olok».

³⁸ Laa'in xexintaqla chi q'olok b'arwi' ink'a' xetawasi eerib' laa'ex. Jalaneb' xe'xtawasi rib' ut laa'ex chik xexyalok xsahil li xk'anjeleb'.

³⁹ Naab'aleb' aj Samaria ke'xpaab' li Jesus sa' li tenamit a'an, xb'aan raatin li ixq li xch'olob': “Xye we chixjunil linb'aanuhom”.

⁴⁰ Naq eb' laj Samaria ke'wulak wan wi' li Jesus, ke'relaji ru chi kanaak rik'ineb'. Ut kikanaak aran wiib' kutan.

⁴¹ Ut q'axal naab'aleb' chik ke'paab'ank re sa' xk'ab'a' li raatin li Jesus,

⁴² ut neke'xyehatq re li ixq: —Anaqwan naqapaab' moko xb'aan ta li k'aru xaye qe. Laa'o tz'aqal xqab'i ut naqanaw naq a'an tz'aqal laj Kolol re li ruuchich'och'.

Kik'irtasiik li ralal jun aj k'anjel chiru li awab'ej

⁴³ Naq ak xnume'k li wiib' kutan, ki'elk aran ut koho Galilea:

⁴⁴ a' ajwi' li Jesus kiyehok xyaalal naq junaq propeet ink'a' k'eeb'il xloq'al sa' li xtenamit.

⁴⁵ Naq kiwulak Galilea, kik'ule'k xb'aaneb' laj Galilea, xb'aan naq ak rilomeb' chixjunil li kilajxb'aanu chaq Jerusalén sa' li ninq'e naq ke'wulak ajwi' eb' a'an.

⁴⁶ Kiwulak wi' chik Kanahán, sa' xteepal Galilea b'arwi' kixjaltesi li ha' cho'q b'iin. Ut jun li winq aj k'anjel chiru li awab'ej wank li ralal yaj aran Kafarnaúm.

⁴⁷ Kirab'i resil naq li Jesus ki'elk chaq Judea ut wank chik Galilea, koho rik'in ut kirelaji ru re taakub'eeq Kafarnaúm chi xk'irtasinkil li ralal xb'aan naq kamk re.

⁴⁸ Kixye li Jesus re: —Wi ink'a' nekeril eetalil ut sachb'ach'oolej, ink'a' nekepaab'.

⁴⁹ Ut laj k'anjel chiru li awab'ej kixye re: —Qaawa', kub'en chi junpaat, xb'aan naq kamk re linkach'in.

⁵⁰ Kichaq'ok li Jesus ut kixye: —Ayu, yo'yo laawalal. Li winq kixpaab' li aatin kiyehe'k re xb'aan li Jesus ut koho.

⁵¹ Ak yo chi kub'eek naq ke'chalk eb' li xmoos chi xk'ulb'al ut ke'xye resil re naq yo'yo li ralal!

⁵² A'an kixpatz' reheb' jo'q'e honal xtikib' usaak. —Ewer, jun honal xb'een wa'leb' xkanab'aak xb'aan li tiq.

⁵³ Li yuwa'b'ej kixk'e reetal naq sa' li honal a'an kiyehe'k re xb'aan li Jesus: “Yo'yo laawalal”. Ut kixpaab' a'an ut chixjunileb' li wankeb' sa' rochoch.

⁵⁴ Li xkab' eetalil a'in kixb'aanu li Jesus naq ki'elk Judea ut kiwulak Galilea.