San Juan 20 - Q'eqchi Bible

Kiril ut kixpaab'

¹ Sa' li xb'een kutan re li xamaan, saqewk re, toj q'oqyink ajwi', koho lix María aj Magdala sa' li muqleb'aal ut kiril naq isinb'il chik li pek chire li muqleb'aal.

² Koho sa' aanil wankeb' wi' laj Simón Pedro ut li jun chik xtzolom li Jesus li q'axal raaro xb'aan, ut koxye reheb': —Xe'risi li Qaawa' sa' li muqleb'aal ut ink'a' naqanaw b'ar ta xe'xk'e.

³ Ke'elk laj Pedro ut li rech tzolonelil, ut koheb' wan wi' li muqleb'aal.

⁴ Koheb' sa' aanil chi xkab'ichaleb', ab'an li xtzolom jun chik q'axal kaw ki'aanilak chiru laj Pedro, koxq'ax ut xb'enwa kiwulak sa' li muqleb'aal.

⁵ Kixk'utzub' rib' ut kiril eb' li b'atleb' t'ikr sa' ch'och', ab'anan moko ki'ok ta.

⁶ Kiwulak ajwi' laj Simón Pedro toj chi ixb'ej, ki'ok sa' li muqleb'aal, ut kiril eb' li b'atleb' t'ikr sa' ch'och'

⁷ ut li sut kilane'k wi' li xjolom: moko wank ta sa' xyanqeb' li b'atleb' t'ikr, soq'so b'an sa' jalan chi na'ajej.

⁸ Toja' naq ki'ok ajwi' li tzolom jun chik, li kiwulak xb'enwa wan wi' li muqleb'aal; kiril ut kixpaab'.

⁹ Xb'aan naq toj maji' ajwi' neke'xtaw ru li Santil Hu li naxye naq tento taawakliiq chi yo'yo sa' xyanqeb' li kamenaq.

¹⁰ Chirix chik a'in eb' li xtzolom ke'sutq'iik sa' rochocheb'.

Li Jesus kixk'ut rib' chiru lix María aj Magdala

¹¹ Lix María toj wank chi xk'atq li muqleb'aal, yo chi yaab'ak. Ut naq yo chi yaab'ak, kixk'utzub' rib' chi ilok sa' li muqleb'aal,

¹² ut kiril wiib'eb' li ánjel, saq li raq'eb', k'ojk'ookeb' b'arwi' kijilib'aak li Jesus: jun chi xjolom ut jun chi roq.

¹³ —At ixq, k'a' naq nakatyaab'ak? chankeb' re. Kichaq'ok a'an ut kixye reheb': —Xb'aan naq xe'xxok linQaawa' ut ink'a' ninnaw b'ar ta xe'xk'e.

¹⁴ Naq kixye a'in, kixsutq'isi rib' chirix ut kiril li Jesus xaqxo aran; ab'an ink'a' naxnaw naq a'an li Jesus.

¹⁵ —At ixq, k'a' naq nakatyaab'ak? Ani nakasik'? chu'uxk re xb'aan li Jesus. Sa' xch'ool lix María naq a'an laj ilol awimq; jo'kan naq kixye re: —Wa', wi laa'at xatk'amok re, ye we b'ar xak'e ut laa'in toxinxok chaq.

¹⁶ Kixye li Jesus re: —María! A'an kixsutq'isi rib' ut kixye re sa' aatinob'aal hebreo: —Rabbuní! (naraj naxye: “At Tzolonel!”).

¹⁷ Li Jesus kixye re: —Minaab'ay, xb'aan naq toj maji' nintaqe'k rik'in li Yuwa'b'ej. Ayu wankeb' wi' li wiitz'in ut ye reheb': «Taqe'k we rik'in linYuwa' ut eeYuwa' ajwi' laa'ex, rik'in linYos ut eeYos ajwi' laa'ex».

¹⁸ Koho lix María aj Magdala ut koxye reheb' li xtzolom li Jesus naq kiril ru li Qaawa'; koxye ajwi' chixjunil li kiyehe'k re xb'aan.

Li Jesus kixk'ut rib' chiruheb' li xtzolom

¹⁹ Ewu sa' ajwi' li kutan a'an, li xb'een kutan re li xamaan, naq tz'aptz'ookeb' li rokeb'aal li na'ajej b'ar wankeb' wi' li xtzolom xb'aan xxiweb' chiruheb' laj Judiiy, kiwulak li Jesus, kixk'e rib' sa' xyiheb' ut kixye reheb': —Chiwanq taxaq eerik'in li tuqtuukil usilal!

²⁰ Ut naq kixye a'in, kixk'uteb' li ruq' ut li xk'atq xsa' chiruheb'. Ke'saho'k sa' xch'ool eb' li xtzolom naq ke'ril ru li Qaawa'.

²¹ Toja' naq kixye wi' chik li Jesus reheb': —Chiwanq taxaq eerik'in li tuqtuukil usilal. Jo' naq xinxtaqla chaq li Yuwa'b'ej, jo'kan ajwi' naq texintaqla laa'in.

²² Ut naq kixye a'in, ki'apunk sa' xb'eeneb' ut kixye reheb': —K'ulumaq li Santil Musiq'ej.

²³ Eb' li teekuy teesach li xmaakeb', kuyb'ilaq sachb'ilaqeb' li xmaak; eb' li ink'a' teekuy teesach li xmaakeb', ink'a' ajwi' kuyb'ilaq sachb'ilaqeb' li xmaak.

Li Jesus ut laj Tomás

²⁴ Jun reheb' li Kab'laju, a' laj Tomás, Lut nayeemank re, moko wank ta sa' xyanqeb' naq kik'ulunk li Jesus. Naq kiyehe'k re xb'aaneb' li rech tzolonelil: “Xqil ru li Qaawa'”,

²⁵ a'an kixye reheb': —Wi ink'a' twil sa' ruq' li reetalil li klawx, wi ink'a' tinch'ik li ru'uj wuq' sa' xna'aj li klawx ut wi ink'a' tinch'ik li wuq' sa' li xk'atq xsa', ink'a' tinpaab'.

²⁶ Waqxaqib'aq kutan xnumik a'an, wankeb' wi' chik sa' kab'l eb' li xtzolom ut laj Tomás wank sa' xyanqeb'. Kiwulak li Jesus chi tz'aptz'ookeb' li okeb'aal, kixk'e rib' sa' xyiheb' ut kixye: —Chiwanq taxaq eerik'in li tuqtuukil usilal!

²⁷ Chirix chik a'an kixye re laj Tomás: —Jiq chaq arin li ru'uj laawuq' ut il li wuq'. Jiq chaq laawuq' ut ch'ik sa' xk'atq insa', ut maak'e aawib' chi maak'a' aapaab'aal, aj paab'anelaqat b'an.

²⁸ Kichaq'ok laj Tomás ut kixye: —At inQaawa', at inYos!

²⁹ Li Jesus kixye re: —Toj xinaawil naq xapaab'. Us xaq reheb' li maak'a' xe'ril ut xe'xpaab'.

K'a' aj e naq tz'iib'anb'il li hu a'in

³⁰ Toj naab'al chik xninqal ru eetalil kixb'aanu li Jesus chiruheb' li xtzolom, ink'a' tz'iib'anb'ileb' sa' li hu a'in.

³¹ A'ut eb' a'in tz'iib'anb'ileb' re naq yooqex chi xpaab'ankil naq li Jesus a'an li Kriist, li Ralal li Yos, ut rik'in xpaab'ankil taawanq eeyu'am sa' xk'ab'a' A'an.