San Juan 14 - Q'eqchi Bible

Kawaq eech'ool!

¹ “Misachk eech'ool chi k'oxlak. Chepaab' li Yos ut chineepaab' ajwi' laa'in.

² Sa' rochoch linYuwa' wank naab'al li na'ajej; wi ta ink'a' jo'kan, ink'a' raj xinye eere naq xik we chi xkawresinkil leena'aj.

³ Ut akaq xkohin ut xinkawresi chaq leena'aj, tinchalq wi' chik ut texink'am wik'in re naq b'ar wanqin laa'in, aran ajwi' wanqex laa'ex.

⁴ Ut b'ar wi' xik we laa'in, laa'ex ak nekenaw li xb'ehil”.

⁵ Kixye laj Tomás re: —Qaawa', ink'a' naqanaw b'ar xik aawe. Chan put ru naq tqanaw li b'e?

⁶ Kixye li Jesus re: —Laa'in li b'e, li yaal ut li yu'am. Maa'ani naxik rik'in li Yuwa'b'ej, wi ink'a' ta sa' ink'ab'a'.

⁷ Wi nekenaw wu laa'in, teenaw ajwi' ru linYuwa'; ut chalen anaqwan nekenaw chik ru ut eerilom ru.

⁸ Laj Felipe kixye re: —Qaawa', k'ut chiqu li Yuwa'b'ej ut taak'ojlaaq qach'ool.

⁹ Kixye li Jesus re: —Ak junxil nin'ok sa' eeyanq, a Felipe. Ma toj maji' nakanaw wu? Li x'ilok wu, xril ru li Yuwa'b'ej. K'a' put naq nakaye laa'at: «K'ut chiqu li Yuwa'b'ej»?

¹⁰ Ma ink'a' nakapaab' naq laa'in wankin rik'in li Yuwa'b'ej ut li Yuwa'b'ej wank wik'in? Eb' li aatin li ninye eere, moko injunes ta wib' naq ninye; a' li Yuwa'b'ej li wank wik'in, a'an li nab'aanunk re li k'anjel.

¹¹ Paab'omaq naq laa'in wankin rik'in li Yuwa'b'ej ut li Yuwa'b'ej wank wik'in. Wi ink'a', paab'omaq sa' xk'ab'a'eb' li xninqal ru inb'aanuhom.

¹² Relik chi yaal ninye eere: ani napaab'ank we, a'an ajwi' tixb'aanu li xninqal b'aanuhom li ninb'aanu laa'in, ut q'axal ninqeb' chik chiruheb' a'in tixb'aanu, xb'aan naq xik we rik'in li Yuwa'b'ej.

¹³ Ut chixjunil li teetz'aama sa' ink'ab'a', laa'in tinb'aanunq re, re naq li Yuwa'b'ej taanimaaq xloq'al rik'in li K'ajolb'ej.

¹⁴ Wi wank k'aru teetz'aama sa' ink'ab'a', laa'in tinb'aanunq re.

Li Musiq'ej re li yaal

¹⁵ “Wi nikineera, teepaab' linchaq'rab',

¹⁶ ut laa'in tintz'aamanq tin'elajinq chiru li Yuwa'b'ej, ut a'an tixtaqla chaq jun chik aj K'ojob'anel ch'ool re naq twanq eerik'in chi junelik:

¹⁷ a' li Musiq'ej re li yaal, li ink'a' naru taak'ule'q xb'aan li ruuchich'och' xb'aan naq ink'a' na'ile'k chi moko nanawe'k ru xb'aan. A'ut laa'ex nekenaw ru xb'aan naq wank sa' eeyanq ut taawanq eerik'in.

¹⁸ “Ink'a' texinkanab' eejunes jo' maak'a' leena' leeyuwa': tinchalq wi' chik eerik'in.

¹⁹ Sa' jun k'amok chik li ruuchich'och' ink'a' chik taaril wu, a'ut laa'ex teeril wu xb'aan naq yo'yookin ut yo'yooqex ajwi' laa'ex.

²⁰ Sa' li kutan a'an teenaw naq laa'in wankin rik'in linYuwa', ut laa'ex wankex wik'in ut laa'in eerik'in.

²¹ Ani aj ik'in wankeb' linchaq'rab', wi naxpaab' li neke'xye, a'an li narahok we. Ut li narahok we, taarahe'q xb'aan linYuwa'; ut laa'in ajwi' tinra ut tink'ut wib' chiru”.

²² Kiyehe'k ut re xb'aan laj Judas (maawa' laj Judas Iskariote): —Qaawa', k'aru xk'ulmank naq chiqu chik laa'o taak'ut aawib' ut ink'a' chiru li ruuchich'och'?

²³ Kichaq'ok li Jesus ut kixye: —Ani narahok we, tixk'e xch'ool chirix li waatin; linYuwa' taarahoq re, toochalq rik'in ut tqak'ojob' qana'aj rik'in.

²⁴ Ani ink'a' nikinxra ink'a' naxk'e xch'ool chirixeb' li waatin, ut li aatin nekerab'i moko we ta, re b'an li Yuwa'b'ej li kitaqlank chaq we.

²⁵ “Xinye eere a'in naq toj wankin sa' eeyanq.

²⁶ Ab'an laj K'ojob'anel ch'ool, a' li Santil Musiq'ej li tixtaqla chaq li Yuwa'b'ej sa' ink'ab'a', a'an textzol chirix chixjunil ut tixjultika eere chixjunil li xinye eere.

Li tuqtuukil usilal k'eeb'il xb'aan li Jesus

²⁷ “Li tuqtuukil usilal ninkanab' eerik'in, lintuqtuukil usilal nink'e eere; ink'a' nink'e eere kama' naxk'e li ruuchich'och'. Misachk eech'ool chi k'oxlak, chi moko chexxiwaq.

²⁸ Xerab'i naq xinye eere: «Xik we ut tinchalq wi' chik eerik'in». Wi ta nikineera, nasaho'k raj sa' eech'ool naq tinxik rik'in li Yuwa'b'ej, xb'aan naq li Yuwa'b'ej nim xwankil chiwu.

²⁹ Ninye eere anaqwan, naq toj maji' nak'ulmank, re naq, jo'q'e taak'ulmanq, teepaab'.

³⁰ “Ink'a' chik najt tin'aatinaq eerik'in, xb'aan naq chalk re laj Taqlanel sa' xb'een li ruuchich'och' a'in. Maak'a' xwankil sa' inb'een;

³¹ ab'anan tento tixnaw li ruuchich'och' naq ninra li Yuwa'b'ej ut ninb'aanu li xinxtaqla wi' chaq. Xaqlinqex anaqwan ut elqo arin.