San Juan 1 - Q'eqchi Bible

Sa' xtiklajik

¹ Sa' xtiklajik ak wan chaq li Aatin, ut li Aatin wan chaq rik'in li Yos, ut li Aatin a'an chaq Yos.

² A'an wan chaq sa' xtiklajik rik'in li Yos.

³ Chixjunil ki'uxmank sa' xk'ab'a' a'an ut maak'a' k'a' re ru kiwank chi maak'a' ta a'an.

⁴ Rik'in wan chaq li yu'am ut li yu'am a'an chaq li xsaqenkeb' li poyanam;

⁵ li saqenk nalemtz'unk sa' li aak'ab', ut li aak'ab' ink'a' kinumtaak sa' xb'een.

⁶ Kol'elq jun li winq taqlanb'il chaq xb'aan li Yos, aj Jwan xk'ab'a'.

⁷ A'an kichalk cho'q aj yehol yaal chirix li saqenk re naq chixjunileb' te'paab'anq xb'aan.

⁸ Moko a'an ta li saqenk, a'an b'an taqlanb'il chaq chi xyeeb'al ani tz'aqal li saqenk.

⁹ Li tz'aqal saqenk li naxkutanob'resi chixjunileb' yo chaq chi chalk sa' ruuchich'och'.

¹⁰ Ak wan chaq sa' ruuchich'och', ut li ruuchich'och' ki'uxk sa' xk'ab'a', ab'an li ruuchich'och' ink'a' kixnaw ru.

¹¹ Sa' rochoch kik'ulunk, ut eb' li wankeb' sa' li rochoch ink'a' ke'xk'ul.

¹² A'ut chixjunileb' li ke'k'uluk re, kixk'e reheb' wank cho'q ralal xk'ajol li Yos, a'eb' li neke'paab'ank re:

¹³ eb' a'in ink'a' ke'yo'laak rik'in kik', chi moko rik'in li naraj li tz'ejwalej malaj ut rik'in rajom junaq winq, rik'in b'an li Yos yo'lajenaqeb'.

¹⁴ Ut li Aatin kitz'ejwalo'k ut kixk'ojob' li xmuheb'aal sa' qayanq, ut laa'o xqaka'ya li xloq'al k'eeb'il re xb'aan li Yuwa'b'ej jo' xloq'al li jun chi K'ajolb'ej nujenaq chi usilal ut chi yaal.

¹⁵ Laj Jwan kixch'olob' li yaal chirix ut kixye chi kaw xyaab' xkux: “A'an a'in li xinye: Li taachalq chiwix, a'an nim xwankil chiwu xb'aan naq ak wan chaq chiwu”.

¹⁶ Rik'in li xnimal xnujenaqil, xqak'ul qe chiqajunilo: q'axal numtajenaq li rusilal kihoye'k sa' qab'een!

¹⁷ Xb'aan naq li Chaq'rab' k'eeb'il chaq qe sa' xk'ab'a' laj Moisés, a'ut li usilal ut li yaal xk'ulunk sa' xk'ab'a' li Jesus li Kriist.

¹⁸ Li Yos maajun sut ki'ile'k ru xb'aan anihaq: li K'ajolb'ej jun chirib'il li kisutq'iik rik'in li Yuwa'b'ej, a'an kolk'utb'esinq re chiqu.

Li kixch'olob' laj Jwan aj kub'sihomha'

¹⁹ A'an a'in li yaal kixch'olob' laj Jwan naq eb' laj Judiiy ke'xtaqla chaq toj Jerusalén aj tij ut aj Leví chi xpatz'b'al re: “Anihat laa'at?”.

²⁰ Kixye tz'aqal chi kutankil ut ink'a' kixmuq: —Maawa'in li Kriist.

²¹ Ke'xpatz' wi' chik re: —Anihat put laa'at? Ma laa'at laj Elías? Laj Jwan kixye: —Maawa'in. —Ma laa'at li propeet? chankeb' wi' chik re. Kixsumeheb' ut kixye: —Ink'a'.

²² Toja' naq ke'xye re: —Anihat put laa'at chi jo'kanan, re naq toxqaye reheb' li xe'taqlank chaq qe? K'aru taaye chawix?

²³ Kixye laj Jwan: —Laa'in li xyaab' kuxej naxjap chaq re sa' li chaqich'och': «Tiikob'resihomaq xb'e li Qaawa'», jo' kixye li propeet Isaías.

²⁴ Sa' xyanqeb' li ke'taqlaak chaq aran, wankeb' ajwi' aj Pariseey.

²⁵ Ut ke'xpatz' re: —K'a' put naq nakatkub'sink ha', wi maawa'at li Kriist, chi moko laj Elías, chi moko li propeet?

²⁶ Laj Jwan kixsumeheb' ut kixye: —Laa'in ninkub'sink ha' yal rik'in ha', ab'an sa' eeyanq wank jun li ink'a' nekenaw ru:

²⁷ a' li yo chaq chi chalk chiwix, ut laa'in moko ink'ulub' ta xhitb'al xk'aamal li xxaab'.

²⁸ A'in kik'ulmank Betania, junpak'al li nima' Jordán, b'arwi' laj Jwan yo chi kub'sink ha'.

²⁹ Sa' li kutan jun chik laj Jwan kiril li Jesus yo chi chalk rik'in, ut kixye: “Wahe' li xKarneer li Yos li naxkuy xmaak li ruuchich'och'.

³⁰ A'an a'in li xinye: «Chiwix laa'in taachalq jun winq li xq'axonk chiwu, xb'aan naq ak wan chaq chiwu».

³¹ Ut laa'in ink'a' ninnaw chaq ru, ab'anan xinchalk chi kub'sink ha' re naq taak'utb'esiiq a'an chiruheb' laj Israel”.

³² Laj Jwan kixch'olob' xyaalal li k'aru kiril, ut kixye: “Xinka'ya li Musiq'ej yo chaq chi kub'eek sa' choxa kama' junaq mukuy, ut kolkanaaq sa' xb'een.

³³ Laa'in ink'a' ninnaw chaq ru, ab'an li kitaqlank chaq we chi kub'sink ha' xye we: «Li taawil wi' chi kub'eek li Musiq'ej ut tolkanaaq sa' xb'een, a'an li taakub'sinq ha' rik'in Santil Musiq'ej».

³⁴ Laa'in wilom ru ut nin'aatinak chirix naq a'an li Ralal li Yos”.

Eb' li xb'een xtzolom li Jesus

³⁵ Sa' li kutan jun chik wan wi' chik laj Jwan aran rochb'een wiib'eb' li xtzolom.

³⁶ Naq yo chi nume'k li Jesus, kixka'ya ut kixye: —Ilomaq li xKarneer li Yos!

³⁷ Naq ke'rab'i xyeeb'al a'in, eb' li wiib' xtzolom laj Jwan ke'xtaaqe li Jesus.

³⁸ Li Jesus kixsutq'isi rib' ut kixk'e reetal naq yo xtaaqenkil: —K'aru nekesik'? chan reheb'. Eb' a'an ke'xye re: —Rabbí, b'ar nakathilank? Li aatin “Rabbí” nararaj naxye “At Tzolonel”.

³⁹ Kixye li Jesus reheb': —Kimqex ut toxeeril. Koheb' ut koxe'ril b'ar nahilank. Ut ke'kanaak rik'in chiru li kutan a'an: ak kaahib' honal tana re ewu.

⁴⁰ Laj Andrés, riitz'in laj Simón Pedro, a'an jun reheb' li wiib' ke'ab'ink re laj Jwan chi aatinak ut ke'xtaaqe li Jesus.

⁴¹ A'an koxtaw xb'enwa laj Simón li ras, ut kixye re: —Xqataw li Mesiiy (chi jalb'il ru naraj naxye: li Kriist).

⁴² Ut kixk'am wan wi' li Jesus. Li Jesus kixka'ya ut kixye re: —Laa'at laj Simón, ralal laj Jwan; Sefas chik taak'ab'a'in (naraj naxye: Pek).

⁴³ Sa' li kutan jun chik kiraj li Jesus xik Galilea. Koxtaw laj Felipe ut kixye re: —Taaqehin.

⁴⁴ Laj Felipe a'an aj Betsaida, xtenamit laj Andrés ut laj Pedro.

⁴⁵ Laj Felipe koxtaw laj Natanael ut kixye re: —Xqataw li tz'iib'anb'il chaq resil sa' li Chaq'rab' xb'aan laj Moisés, jo'wi' xb'aaneb' li propeet: a' li Jesus, ralal laj José, a' laj Nazaret.

⁴⁶ Kichaq'ok laj Natanael ut kixye: —Ma wank tab'i' b'ayaq rusilal Nazaret? Laj Felipe kixye re: —Kim ut toxaawil.

⁴⁷ Li Jesus kiril naq laj Natanael yo chi nach'ok, ut kixye: —We' chaq jun tz'aqal aj Israel li maak'a' b'alaq'ik rik'in.

⁴⁸ Laj Natanael kixpatz' re: —Chanru naq nakanaw wu? Kichaq'ok li Jesus ut kixye: —Toj maji' nakatxb'oq laj Felipe, naq wankat chaq rub'el xche'el li iig, xatwil.

⁴⁹ Kichaq'ok laj Natanael: —At Tzolonel, laa'at li Ralal li Yos, laa'at li xReyeb' laj Israel, chan re.

⁵⁰ Kichaq'ok li Jesus ut kixye: —Ma yal xb'aan naq xinye aawe: «Xatwil rub'el xche'el li iig», nakapaab'? Toj taawil chik xkomon xninqal ru na'leb' chiruheb' a'in.

⁵¹ Ut kixye wi' chik re: —Relik chi yaal ninye eere: teeril li choxa chi teetooq ut eb' li x'ánjel li Yos yooqeb' chi taqe'k ut chi kub'eek sa' xb'een li K'ajolb'ej.