Josué 9 - Q'eqchi Bible

Li sumwank rik'ineb' laj Gabahón

¹ Ke'rab'i resil a'in chixjunileb' li awab'ej li wankeb' arin chaq re li nima' Jordán, sa' rokeb'l saq'e, sa' k'iche' jo' wi' sa'eb' li taq'ahil ch'och', chire li Nimla Palaw toj sa' xsutam Líbano.

² Toja' naq eb' laj Hit, eb' laj Amor, eb' laj Kanahán, eb' laj Perés, eb' laj Jib ut eb' laj Jebús ke'xjunaji rib' re yalok rik'in laj Josué ut eb' laj Israel.

³ Ab'an naq eb' laj Gabahón ke'xnaw k'aru kixb'aanu laj Josué rik'ineb' li tenamit Jerikó ut Ay,

⁴ ke'xk'uub' ru chanru naq te'xb'alaq'iheb' laj Israel. Koheb' ut ke'xk'amatq chaq xtzekemqeb'. Ke'xk'eheb' q'eel t'ikr chirixeb' li xb'uur ut tz'uum-kuk q'eel, pejel ut ka'b'ojb'ilatq.

⁵ Ke'xk'e q'eel perxaab' chi roqeb' xiitinb'ileb', ut ke'xk'e ajwi' q'eel aq'ej chirixeb'. Chixjunil li xwaheb', a'an chaqi ut murinb'ilatq.

⁶ Naq ke'wulak wan wi' laj Josué, sa' xmuheb'aaleb' laj Israel aran Kilkal, ke'xye reheb': “Laa'o xoochalk chaq sa' najtil tenamit; k'ehomaq eerib' sa' sumwank qik'in”, chankeb'.

⁷ Ke'chaq'ok eb' laj Israel ut ke'xye reheb' laj Jib: “Mare anchal nach' arin wankex. Chanru naq tqab'aanu junaq sumwank eerik'in laa'ex?”, chankeb'.

⁸ Ab'an eb' a'an ke'xye re laj Josué: “Laa'o aamoos”. Ut laj Josué kixpatz' reheb': “Anihex ut b'ar xexchalk chaq?”.

⁹ “Sa' najtil tenamit xoochalk chaq sa' xk'ab'a' li Qaawa' laaYos -chankeb'-. Xqab'i resil li kilajxb'aanu chaq aran Ejiipt,

¹⁰ jo'wi' chixjunil li kixb'aanu reheb' li wiib' chi awab'ej aj Amor junpak'al li nima' Jordán, a' laj Sijón, awab'ej re Jesbón, ut laj Og, awab'ej re Basán, li kiwank aran Astarot.

¹¹ Jo'kan naq eb' li qacheekal winqul ut chixjunileb' li wankeb' sa' li qatenamit xe'xye qe: «Xokomaq li tzekemq taak'anjelaq eere re leeb'eenik. Ayuqex chi xk'ulb'aleb' ut yehomaq reheb': Laa'o eemoos», chankeb'. K'ehomaq b'i' eerib' sa' sumwank qik'in.

¹² Li wa a'in tiq naq xqak'uub' chaq sa' li qochoch, sa' li kutan koo'elk wi' chaq chek'ulb'al. Ut anaqwan kaw ut kok' much' aj chik.

¹³ Chek'e reetal: eb' li tz'uum-kuk a'in ak'eb' naq xqanujob'resi chaq, ut anaqwan q'eeleb' chik chi us. Jo'kan ajwi' li qaxaab' ut li qab'aatal xe'q'eelo'k xb'aan xnajtil li b'eek”.

¹⁴ Toja' naq eb' laj jolominel ke'xyal xtzekemqeb' laj Gabahón, ab'an ink'a' ke'patz'ok re li Qaawa'.

¹⁵ Ut laj Josué kixk'uub' jun sumwank rik'ineb', ut kixye li raatin naq ink'a' tixkamsiheb'. Jo'kan ajwi' ke'xye sa' jurament li ninqeb' xwankil sa' li komonil.

¹⁶ Ab'an oxejeraq chik a'an, eb' laj Israel ke'xnaw naq nach' wankeb', moko najt ta wank li xna'ajeb'.

¹⁷ Jo'kan naq ke'elk sa' li xmuheb'aaleb' ut sa' rox li kutan ke'wulak sa' li tenamiteb' Gabahón, Kefirá, Beherot ut Kiryat-Yeharín.

¹⁸ Ab'an ink'a' ke'xkamsiheb' xb'aan naq jo'kan yeeb'il chaq sa' jurament xb'aaneb' laj jolominel re li komonil, sa' xk'ab'a' li Qaawa' xYos laj Israel. Toja' naq k'ajo' naq chixjunil li tenamit ke'xwech' rixeb' laj jolominel!

¹⁹ Ut chixjunileb' laj jolominel ke'xch'olob' chiru li komonil: “Qayehom a'in sa' jurament sa' xk'ab'a' li Qaawa', xYos laj Israel; jo'kan naq ink'a' naru neke'qach'e'.

²⁰ Maak'a' naru tqab'aanu reheb', re naq ink'a' taachalq xjosq'il li Yos sa' qab'een sa' xk'ab'a' li jurament xqaye”, chankeb'.

²¹ Eb' laj jolominel ke'xye ajwi': “Yo'yooqeb', ab'anan a'anaqeb' aj si'inel ut aj b'eelam ha' reheb' li komonil”, chankeb'.

²² Toja' naq laj Josué kixb'oqeb' laj Gabahón ut kixye reheb': “K'a'ut naq xooheeb'alaq'i? K'a'ut naq xeye qe naq jwal najt wankex qik'in, ut sa' qayanq pe' wankex?

²³ Majewanb'ilaqex b'i' ut maajaruj teekanab' k'anjelak jo' aj si'inel ut aj b'eelam ha' sa' rochoch linYos”, chan.

²⁴ Ut eb' a'an ke'xye re laj Josué chi jo'ka'in: “Nawb'il qab'aan laa'o aamoos li xtaqlahom li Qaawa' laaYos cho'q re laj Moisés aj k'anjel chiru. Kixye naq tixq'axtesi eere chixjunil li na'ajej a'in ut tixsach ruheb' jo'k'ihaleb' wankeb' arin sa' leek'ulunik. Jo'kan naq q'axal xooxiwak chirix li qayu'am ut xqab'aanu a'an.

²⁵ Anaqwan we'ko sa' laawuq'. B'aanu qik'in li k'aru taawaj; b'aanu li nakak'oxla naq us xb'aanunkil”, chankeb'.

²⁶ Laj Josué kixb'aanu li yeeb'il reheb': kixkoleb' sa' ruq'eb' laj Israel re naq ink'a' te'kamsiiq,

²⁷ ab'an kixk'eheb' chi k'anjelak jo' aj si'inel ut aj b'eelam ha' cho'q re li komonil ut li x'artal li Qaawa', sa' li na'ajej li tixsik' ru li Qaawa'. Ut chalen toj anaqwan a'an ajwi' li k'anjel neke'xb'aanu.