Josué 7 - Q'eqchi Bible

Laj Akán kimaakob'k chiru li Yos

¹ Ab'an eb' laj Israel ke'xq'et li xtaqlahom laj Josué. Laj Akán, ralal laj Karmí, ri xmam laj Sabdí, xxikin i laj Séraj, sa' xteepal Judá, kixxok cho'q re li k'aru ak q'axtesinb'il re sache'k. Jo'kan naq k'ajo' naq kijosq'o'k li Qaawa' sa' xb'eeneb' laj Israel.

² Wankeb' winq ke'taqlaak xb'aan laj Josué toj Ay, nach' rik'in Bet-Abén, sa' releb'l saq'e sa' xjayal Betel: “Ayuqex ut k'ehomaq chaq reetal li tenamit Ay”, chu'uxkeb' re. Eb' a'an ke'elk Jerikó, koheb' ut ke'xk'e reetal li tenamit Ay.

³ Chirix chik a'an, naq ke'sutq'iik chaq, ke'xye re laj Josué: “Moko aajel ta ru naq te'xik chixjunileb' chi yalok rik'ineb' laj Ay. Tz'aqal naq te'xik wiib' malaj oxib' milaq chi winq. Maach'i'ch'i'i chixjunileb' li poyanam rik'in xtaqlankileb' toj aran, xb'aan naq ink'a' k'iheb' laj Ay”, chankeb'.

⁴ Jo'kan naq koheb' toj Ay oxib' mil tana chi winq, ab'anan ke'elelik chiruheb' laj Ay.

⁵ Ke'kamsiik tana waqlaju xka'k'aalaq chi winq xb'aaneb' laj Ay, ut eb' li xkomon ke'aanilasiik chirix li tenamit, toj Sebarín, ut ke'sache'k sa' li kub'sink. Jo'kan naq ke'ch'inank xch'ool eb' laj Israel ut ke'ok xxiw.

⁶ Toja' naq laj Josué kixq'ich li raq', kixhupub' rib' chiru li xLoq'laj Kaax li Qaawa' toj ki'ewuuk ut, rochb'eeneb' li cheekel winq, ke'xk'e pojtz' sa' xjolomeb'.

⁷ Chirix chik a'an kixye laj Josué: “At inQaawa', k'a' naq xak'e li tenamit a'in chi nume'k junpak'al li nima' Jordán yal re qaq'axtesinkil sa' ruq'eb' laj Amor ut re qasachb'al? Us raj naq xookanaak chaq junpak'al li nima' Jordán!

⁸ Chakuy inmaak, at Qaawa'. K'aru truuq tinye anaqwan, xb'aan naq eb' laj Israel xe'elelik chiruheb' li xik' neke'ilok reheb'?

⁹ Naq eb' laj Kanahán jo'wi' chixjunileb' li wankeb' sa' li na'ajej a'in te'xnaw a'an, te'xjunaji chaq rib' sa' qab'een ut te'xsach chi junajwa li qak'ab'a' sa' ruuchich'och'. Wi jo'kan taaqak'ul, k'aru taab'aanu laa'at re xkolb'al rix laaloq'al?”, chan laj Josué.

¹⁰ Ut li Qaawa' kixsume ut kixye: —Xaqlin! K'a'ut naq hupuukat aran sa' ch'och'?

¹¹ Eb' laj Israel xe'maakob'k ut xe'xq'et li Sumwank xinb'aanu rik'ineb'. Jun chik: xe'xchapatq cho'q reheb' li k'aru ak q'axtesinb'il chi sache'k. Xe'relq'a, xe'xmuq ut xe'xk'e a'an sa' xyanq li k'aru reheb'.

¹² Jo'kan naq eb' laj Israel ink'a' te'xkuy sa' ruq'eb' li xik' neke'ilok reheb'; te'eleliq b'an chiruheb', xb'aan naq relik chi yaal xk'ulub'eb' naq te'sache'q. Wi laa'ex ink'a' teesach ru li k'aru xexok, ink'a' chik tinwanq eerik'in.

¹³ Xaqlin b'i', kawresi xch'ooleb' li tenamit ut ye reheb': Santob'resiiq eerib' re wulaj, xb'aan naq jo'ka'in xye li Qaawa', xYos laj Israel: «At Israel, sa' eeyanq wank li tz'i'b'eetalil. Jo'kan naq ink'a' truuq teekuy sa' ruq'eb' li xik' neke'ilok eere, wi ink'a' nekerisi sa' eeyanq li k'aru tento raj xsachmank».

¹⁴ Jo'kan utan, wulaj eq'la toleek'ut eerib' chi teep. Li teep sik'b'il ru inb'aan tolxk'ut rib' chi kok' ch'uut. Li ch'ina ch'uut sik'b'il ru inb'aan tolxk'ut rib' chi junq kab'alil. Li junkab'al sik'b'il ru inb'aan tento te'nume'q chiwu li junjunq chi winq re li junkab'al a'an.

¹⁵ Ut li winq li xxokok re li k'aru tento raj xsachmank, taak'ate'q rochb'een chixjunil li k'aru wank re, xb'aan naq xq'et li xSumwank li Qaawa' ut xb'aanu li ink'a' us sa' xyanqeb' laj Israel, chan li Qaawa'.

¹⁶ Jo' wulajaq chik laj Josué kiwakliik toj eq'la; kixtaqlaheb' laj Israel chi xk'utb'al rib'eb' chi teep, ut kisik'e'k ru li xteepal laj Judá.

¹⁷ Toja' naq kixtaqlaheb' laj Judá chi xk'utb'al rib'eb' chi kok' ch'uut, ut kisik'e'k ru li xch'uutal laj Séraj. Chirix chik a'an kixtaqlaheb' laj Séraj chi nume'k chi junq kab'alil, ut kisik'e'k ru li xjunkab'al laj Sabdí.

¹⁸ Ut naq ke'nume'k chi xjunjunqaleb' li ralal xk'ajol laj Sabdí, li Yos kixk'ut naq laj Akán, ralal laj Karmí, ri xmam laj Sabdí ut xxikin i laj Séraj, sa' xteepal Judá, wank xmaak.

¹⁹ Toja' naq laj Josué kixye re laj Akán: “At walal, chanima xloq'al li Qaawa', xYos laj Israel; chaterq'usi li xk'ab'a'. Ye we k'aru xab'aanu ut maamuq chiwu”, chan.

²⁰ Laj Akán kixsume laj Josué ut kixye: “Relik chi yaal naq laa'in xinmaakob'k chiru li Qaawa', xYos laj Israel. A'an a'in li xinb'aanu:

²¹ sa' xyanq li k'aru xqachap sa' li tenamit Jerikó xwil jun li ch'ina'usil t'ikr re Senahar, lajeeb'k'aal chi tumin plaat ut numenaq tana jun liib'r chi oor, k'ajo' naq xe'wulak chiwu; ut xink'uulaheb' cho'q we. Muqb'ileb' sa' ch'och' anaqwan, sa' xyi linmuheb'aal, ut chi rub'el wank li tumin plaat”, chan.

²² Tikto laj Josué kixtaqla wiib' oxib' li xtaql li koheb' sa' aanil sa' li muheb'aal a'an, ut ke'xtaw chixjunil li kixmuq laj Akán; ut li tumin plaat wank chi rub'el.

²³ Ke'risi sa' li muheb'aal, ke'xk'am chiru laj Josué ut chiruheb' chixjunil laj Israel, ut koxe'xk'e chiru li Qaawa'.

²⁴ Toja' naq laj Josué rochb'een chixjunileb' laj Israel ke'xchap laj Akán, ralal laj Séraj, rochb'een li plaat, li t'ikr, li oor, eb' li ralal xk'ajol, eb' li xwakax, li xb'uur, li xkarneer, li xmuheb'aal ut chixjunil li k'aru wank re, ut ke'xk'am sa' xtaq'ahil Akor.

²⁵ Ut aran kixye laj Josué: “K'a' naq xak'am chaq li nimla rahilal a'in sa' qab'een? A' ajwi' li rahilal a'in chikanaaq sa' aab'een sa' li kutan a'in”, chan. Ut laj Akán kiteniik chi pek rochb'een chixjunileb' li xkomon aj Israel; chirix chik a'an ke'k'ate'k.

²⁶ Ke'xtuub' naab'al li pek sa' xb'een, ut eb' li pek a'an toj wankeb' anaqwan. Toja' naq kich'anaak xjosq'il li Qaawa'. Jo'kan naq li na'ajej a'an, xTaq'ahil li Rahilal nayeemank re chalen toj anaqwan.