Josué 5 - Q'eqchi Bible

Xxiweb' li tenamit

¹ Chixjunileb' li awab'ej re Amor li wankeb' junpak'al li nima' Jordán, sa' rokeb'l saq'e, ut chixjunileb' li awab'ej re Kanahán li wankeb' sa' xjayal li palaw ke'rab'i resil naq li Qaawa' kixchaqihob'resi li nima' Jordán re naq eb' laj Israel te'nume'q junpak'al. K'ajo' naq ke'ok xxiw ut ke'ch'inank xch'ool chiruheb' laj Israel.

Li sirkunsisyon ut li Paswa

² Toja' naq li Qaawa' kixye re laj Josué: “Taayiib' wiib' oxib'aq aach'iich' rik'in q'esnal pek ut taab'aanu wi' chik li sirkunsisyon reheb' laj Israel”, chan.

³ Laj Josué kixyiib'eb' li ch'iich' rik'in q'esnal pek ut kixb'aanu li sirkunsisyon reheb' laj Israel sa' xb'een li tzuul Aralot.

⁴ Kixb'aanu chi jo'ka'in xb'aan naq chixjunileb' li winq li ke'elk chaq Ejiipt, a'eb' li kaweb' rib' chi yalok, maak'a'eb' chik: ke'kamk chaq sa' li chaqich'och' chiru li xb'eenikeb' chirix li relikeb' chaq Ejiipt.

⁵ Chixjunileb' li winq li ke'elk chaq Ejiipt uxb'il li sirkunsisyon reheb'; ab'an li yo'lajenaqeb' sa' li chaqich'och', chirix li relikeb' chaq Ejiipt, toj maji' uxb'il li sirkunsisyon reheb'.

⁶ Chiru ka'k'aal chihab' ke'b'eek eb' laj Israel sa' li chaqich'och' toj reetal ke'kamk chixjunileb' li winq elenaqeb' chaq Ejiipt ut kaweb' rib' chi yalok. Ink'a' ke'ab'ink chiru li Qaawa' ut A'an kixye reheb' sa' jurament naq ink'a' te'ril li ch'och' k'ajo' xq'emal, yeechi'inb'il reheb' li xna' xyuwa'eb'.

⁷ A'eb' chik li ralal xk'ajoleb' ke'kanaak cho'q reeqajeb' xb'aan naq jo'kan yeeb'il xb'aan li Yos. Laj Josué kixb'aanu li sirkunsisyon reheb' xb'aan naq maji' uxb'il reheb' chiru li xb'eenikeb'.

⁸ Ut naq ak xk'ulumeb' li sirkunsisyon chixjunileb', ke'kanaak sa' li xmuheb'aaleb' chi hilank toj ke'k'iraak.

⁹ Toja' naq li Qaawa' kixye re laj Josué: “Sa' li kutan a'in xwisi sa' eeb'een leexutaan kitiklaak chaq Ejiipt”, chan. Jo'kan naq Kilkal xk'ab'a' li na'ajej a'an chalen toj anaqwan.

¹⁰ Eb' laj Israel ke'hilank Kilkal ut aran ewu ke'xninq'ehi li Paswa sa' li kaalaju xb'e li po, sa' xtaq'ahil Jerikó.

¹¹ Eweraq chik li Paswa, sa' ajwi' li kutan a'an, ke'xtzeka xb'een sut ru li rawimq li tenamit: a' li wa ink'a' yuub'il jo'wi' li ru li triiw chi k'ilinb'il.

¹² Jo' wulajaq chik kilajk li maná, naq ke'xtikib' xtzekankil ru li rawimq li tenamit. Eb' laj Israel ink'a' chik ke'wank xmaná ut a' chik li ru li rawimq li ch'och' Kanahán ke'xtzeka chiru li chihab' a'an.

¹³ Naq laj Josué nach' chik wank rik'in Jerikó, kiril jun li winq xaqxo chiru, wank xch'iich' maak'a' rochoch sa' ruq'. Laj Josué kinach'ok rik'in ut kixye re: “Ma qakomonat laa'at malaj xkomoneb' li xik' neke'ilok qe?”, chan re.

¹⁴ Kichaq'ok a'an ut kixye: “Ink'a', laa'in b'an aj jolominel reheb' li xk'iila ánjel li Qaawa'. Toja' xinchalk”, chan. Toja' naq laj Josué kixhupub' rib', kixloq'oni ut kixye re: “Laa'in aamoos, wa'. K'aru taawaj tinb'aanu?”, chan.

¹⁵ Ut li najolomink reheb' li xk'iila ánjel li Qaawa' kixsume laj Josué: “Isi laaperxaab' chawoq xb'aan naq li na'ajej wankat wi' a'an loq'”, chan. Ut laj Josué kixb'aanu jo' kiyehe'k re.