Josué 3 - Q'eqchi Bible

Eb' laj Israel ke'nume'k junpak'al li nima' Jordán

¹ Laj Josué kiwakliik eq'la ut, rochb'een chixjunileb' laj Israel, ke'elk Sitín ut ke'wulak wan wi' li nima' Jordán. Ab'anan ink'a' ke'nume'k junpak'al; toj ke'kanaak chi hilank aran.

² Oxib'aq kutan chik, eb' laj jolominel ke'xsuti li na'ajej li yookeb' wi' chi hilank

³ ut ke'xye li taqlahom a'in reheb' li tenamit: “Naq teeril li xLoq'laj Kaaxil li Sumwank paqonb'il xb'aaneb' laj tij aj Leví, tex'elq sa' li na'ajej wankex wi' ut texxik chirix.

⁴ Chi jo'kan teenaw k'a' chi b'ehul teek'am, xb'aan naq toj maajun wa numenaqex sa'eb' li na'ajej a'in. Ab'an mexjilok chi xk'atq li Loq'laj Kaax, chexwanq b'an mer hiil rik'in a'an”, chankeb'.

⁵ Ut laj Josué kixye reheb' li tenamit: “Ch'ajob'resihomaq eerib' xb'aan naq wulaj li Qaawa' tixb'aanu sachb'ach'oolej sa' eeyanq”, chan.

⁶ Kixye ajwi' reheb' laj tij: “Chapomaq li xLoq'laj Kaaxil li Sumwank ut numenqex chiruheb' li tenamit”, chan reheb'. Eb' laj tij ke'xchap li xLoq'laj Kaaxil li Sumwank ut ke'q'axonk chiruheb' li tenamit.

⁷ Toja' naq li Qaawa' kixye re laj Josué: “Chalen anaqwan tinnimob'resi laawankil chiruheb' chixjunil laj Israel. Chi jo'kan te'xnaw naq wankin aawik'in jo' naq kinwank rik'in laj Moisés.

⁸ Laa'at taak'e li taqlahom a'in reheb' laj tij li yookeb' chi k'amok re li xLoq'laj Kaaxil li Sumwank: «Naq texwulaq chire li nima' Jordán, texxaqliiq aran, sa' li ha'»”.

⁹ Ut laj Josué kixye reheb' laj Israel: “Jilonqex chaq ut ab'ihomaq li raatin li Qaawa' leeYos.

¹⁰ Rik'in a'in teenaw naq li yo'yookil Yos wank sa' eeyanq ut A'an ajwi' taa'isinq reheb' laj Kanahán, eb' laj Hit, eb' laj Jib, eb' laj Perés, eb' laj Kirkás, eb' laj Amor ut eb' laj Jebús sa' li na'ajej texnume'q wi'.

¹¹ Chek'e reetal, li xLoq'laj Kaax li Qaawa', laj Eechal re chixjunil li ruuchich'och', k'amol b'ehaq cheru naq texnume'q junpak'al li nima' Jordán.

¹² Jo'kan b'i' sik'omaqeb' ru kab'laju chi winq, junjunq sa' xyanqeb' li junjunq chi xteepaleb' laj Israel.

¹³ Naq eb' laj tij li yookeb' chi k'amok re li xLoq'laj Kaax li Qaawa', laj Eechal re chixjunil li ruuchich'och', te'ok sa' li nima' Jordán, li ha' tixjach rib' chirib'il rib': li roq li ha' nachalk chaq taqe'q taaxaqliiq ut tixtuub' rib'”, chan laj Josué.

¹⁴ Toja' naq eb' laj Israel ke'elk sa'eb' li xmuheb'aaleb' re nume'k junpak'al li nima' Jordán. Ut eb' laj tij li yookeb' chi k'amok re li xLoq'laj Kaaxil li Sumwank, a'aneb' laj k'amol b'eheb' chiruheb'.

¹⁵ Ab'anan naq eb' laj tij ke'ok sa' li nima' ut li roqeb' ke'xch'e' li ha' chire li nima' Jordán (sa' xq'ehil li q'olok nab'ut'irk li nima' Jordán),

¹⁶ li roq li ha' nachalk chaq taqe'q kixaqliik ut kixtuub' rib', nach' rik'in li tenamit Adám li wank chi xk'atq li tenamit Sartán; ut li ha' li naxik taq'a sa' li palaw re Arabá (Atz'aminb'il Palaw ajwi' nayeemank re), ink'a' chik naxik, kixjach b'an rib' rik'in li wank taqe'q. Toja' naq li tenamit ke'nume'k junpak'al, sa' xka'yab'aal Jerikó.

¹⁷ Eb' laj tij li yookeb' chi k'amok re li xLoq' laj Kaaxil li Sumwank, xaqxookeb' sa' xyi li nima' naq yookeb' chi nume'k chixjunileb' laj Israel. Ut chaqi li ch'och' li xaqxookeb' wi'.