Josué 24 - Q'eqchi Bible

Li nimla ch'utam aran Sikem

¹ Laj Josué kixch'utub' chixjunileb' li xteepaleb' laj Israel aran Sikem; kixb'oqeb' li xcheekal winqul laj Israel, eb' laj k'amol b'e, eb' laj raqol aatin ut eb' laj tz'iib', ut chiru li Qaawa'

² kixye reheb' chixjunil li tenamit: “A'in xyehom li Qaawa' xYos laj Israel: Chire li nima' Éwfrates ke'wank chaq junxil eb' leexe'toonil yuwa', laj Téraj, jo'wi' laj Abrahán ut laj Najor li ralaleb', ut ke'xloq'oni ru eb' li jalanil yos.

³ Chire li nima' Éwfrates kinchap laj Abrahán leeyuwa' ut kink'e chi xb'eeninkil chixjunil li na'ajej Kanahán. Kinnaab'alob'resi eb' li ralal xk'ajol rik'in xk'eeb'al xb'enwa laj Isahak cho'q ralal.

⁴ Chirix chik a'an kink'e wiib' li ralal laj Isahak: a'aneb' laj Jakob ut laj Esaú. Laj Esaú kink'e chireechani li tzuul Seír, ab'an laj Jakob rochb'eeneb' li ralal xk'ajol koheb' Ejiipt.

⁵ Toja' naq kintaqla laj Moisés ut laj Aharón, ut kinrahob'tesiheb' laj Ejiipt rik'in li xninqal eetalil kinb'aanu sa' xyanqeb'. Moqon chik ke'wisi chaq aran.

⁶ Naq kiwisiheb' leena' leeyuwa' aran Ejiipt, laa'ex kexwulak wan wi' li palaw. Eb' laj Ejiipt ke'xtaaqiheb' leena' leeyuwa' rik'ineb' b'eleb'aal ch'iich' ut aj puub', toj wan wi' li Kaqi Palaw.

⁷ Toja' naq ke'xyaab'a xk'ab'a' li Qaawa' ut A'an kixk'e jun li choql k'ajo' xq'oqyinkal ru sa' eeyanq laa'ex ut eb' laj Ejiipt. Kixq'aplusi li palaw sa' xb'eeneb', ut a'an kinuq'uk reheb'. Laa'ex keril rik'in leeru li kinb'aanu aran Ejiipt. Chirix chik a'an najt kexwank chaq sa' li chaqich'och'.

⁸ “Moqon kexwoksi sa' xch'och'eb' laj Amor junpak'al li nima' Jordán: eb' a'an ke'yalok eerik'in, ab'an laa'in kinq'axtesiheb' sa' eeruq'; jo'kan naq koxereechani li xch'och'eb' ut kinsach ruheb' cheru.

⁹ Moqon chik kiwakliik laj Balak, ralal laj Sipor, awab'ej re Mohab, re yalok rik'ineb' laj Israel, ut kixtaqla xb'oqb'al laj Balaham, ralal laj Pehor, re naq texmajewa.

¹⁰ Ab'anan ink'a' kiwaj rab'inkil laj Balaham toj reetal kexrosob'tesi, ut chi jo'kan kexinkol sa' ruq' laj Balak.

¹¹ “Toja' naq keq'ax chaq li nima' Jordán ut kexwulak Jerikó. Eb' laj Jerikó, eb' laj Amor, eb' laj Perés, eb' laj Kanahán, eb' laj Hit, eb' laj Kirkás, eb' laj Jib ut eb' laj Jebús ke'yalok eerik'in, ab'an laa'in keb'inq'axtesi sa' eeruq'.

¹² Eb' li wiib' chi awab'ej aj Amor ke'elelik cheru xb'aaneb' li ch'ub' kintaqla sa' xb'eeneb'. Moko laa'ex ta li kex'isink reheb' rik'in leech'iich' chi moko rik'in leesimaj.

¹³ Kink'e eere jun li ch'och' ink'a' keriila rix; kink'e eere eb' li tenamit ink'a' eek'ojob'ahom; ab'an anaqwan wankex chisa' ut neketzeka li uub' ut li aseytuun li ink'a' eerawom.

¹⁴ “Jo'kan utan chexiwa ru li Qaawa' ut chexk'anjelaq chiru chi chaab'il ut chi tiik ru leech'ool. Chekanab'eb' li yos li ke'xloq'oni leexe'toonil yuwa' chire li nima' Éwfrates ut aran Ejiipt, ut chexk'anjelaq chiru li Qaawa'.

¹⁵ A'ut wi ink'a' naxk'ul eech'ool k'anjelak chiru li Qaawa', sik'omaq ru anaqwan ani chi aj u teeraj k'anjelak: ma li xyoseb' leexe'toonil yuwa' li ke'xloq'oni chaq chire li nima' Éwfrates, malaj chiru li xyoseb' laj Amor b'arwi' wankex anaqwan. Laa'in ut linjunkab'al took'anjelaq chiru li Qaawa'”, chan laj Josué.

¹⁶ Toja' naq ke'chaq'ok li tenamit ut ke'xye: “Ink'a' taxaq tqakanab' li Qaawa' re k'anjelak chiruheb' li jalanil yos.

¹⁷ Xb'aan naq li Qaawa' li qaYos, a'an ki'isink chaq qe ut eb' li qana' qayuwa' sa' li na'ajej Ejiipt, b'arwi' koowank chaq chi munil. A'an kib'aanunk re xninqal eetalil chiqu ut kooxkol sa' li qab'eenik ut sa'atqeb' chixjunil li tenamit koonume'k wi'.

¹⁸ Jo'wi' anchal, li Qaawa' kiraanilasiheb' chiqu chixjunileb' li tenamit ut eb' laj Amor li ke'wank sa' li na'ajej a'in. Ch'olch'o ru naq laa'o ajwi' took'anjelaq chiru li Qaawa' xb'aan naq a'an li qaYos”, chankeb'.

¹⁹ Ab'an laj Josué kixye reheb' li tenamit: “Laa'ex ink'a' texruuq chi k'anjelak chiru li Qaawa', xb'aan naq a'an santil Yos, a'an jun Yos aj sowen li ink'a' texkuy rik'in leeq'etq'etil chi moko tixkuy leemaak.

²⁰ Wi laa'ex teekanab' li Qaawa' re k'anjelak chiruheb' li jalanil yos, li Qaawa' tixtaqla chaq rahilal sa' eeb'een ut tixsach eeru, us ta ak xb'aanu naab'al usilal eere”, chan.

²¹ Ke'chaq'ok li tenamit ut ke'xye re laj Josué: “Ink'a' taak'ulmanq chi jo'kan. Laa'o took'anjelaq chiru li Qaawa'”, chankeb'.

²² Toja' naq laj Josué kixye reheb' li tenamit: “Laa'ex testiiw cherix, naq xesik' ru li Qaawa' re k'anjelak chiru”, chan. Ke'chaq'ok ut ke'xye: “Laa'o testiiw”, chankeb'.

²³ Kixye laj Josué: “Isihomaqeb' b'i' sa' eeyanq li jalanil yos ut k'ehomaq eech'ool rik'in li Qaawa', xYos laj Israel”.

²⁴ Ut li tenamit ke'xye re laj Josué: “A' li Qaawa' li qaYos taaqak'anjela ru ut chiru A'an toopaab'anq”, chankeb'.

²⁵ Sa' li kutan a'an laj Josué kixk'ojob' jun li sumwank rik'in li tenamit; kixchaq'rab'iheb' ut kixk'e xtaqlankileb' aran Sikem.

²⁶ Laj Josué kixtz'iib'a eb' li aatin a'in sa' xHuhil li xChaq'rab' li Yos. Chirix chik a'an kixchap jun nimla pek ut kixxaqab' aran, chi roq li ji li wank sa' li xloq'laj ochoch li Qaawa',

²⁷ ut kixye reheb' chixjunil li tenamit: “Chek'e reetal, li pek a'in a'inaq testiiw chiqix, xb'aan naq xrab'i chixjunil li aatin kixye li Qaawa' chiqix laa'o. A'anaq testiiw cherix, re naq ink'a' teetz'eqtaana leeYos”, chan.

²⁸ Ut laj Josué kixchaq'rab'iheb' li tenamit ut kixtaqlaheb' sa' li xjunjunq chi ch'och'.

Li xkamik laj Josué

²⁹ Chirix chik chixjunil a'in, kikamk laj Josué, ralal laj Nun, laj k'anjel chiru li Qaawa'. Lajeeb' xwaqk'aal (110) chihab' wank re naq kikamk.

³⁰ Ke'xmuq sa' li reechanihom, aran Timnat-Séraj, li wank sa'eb' li xtzuulul Efraín, sa' xjayal releb'l iq' re li tzuul Kahás.

³¹ Eb' laj Israel ke'k'anjelak chiru li Qaawa' naq toj yo'yo laj Josué. Jo'kan ajwi' ke'xb'aanu chiruheb' li cheekal winqeb' li toj ke'kanaak naq kikamk laj Josué, a'eb' li neke'nawok re chixjunil li xninqal xb'aanuhom li Qaawa' cho'q reheb' laj Israel.

³² Li xb'aqel laj José li ke'xk'am chaq toj Ejiipt eb' li ralal xk'ajol laj Israel, kimuqmank aran Sikem, sa' li ch'och' kixloq' laj Jakob rik'ineb' li ralal laj Jamor, xyuwa' laj Sikem, chiru o'k'aal chi tumin, ut kikanaak moqon cho'q reechanihomeb' li ralal laj José.

Li xkamik laj Elehasar

³³ Laj Elehasar ajwi', ralal laj Aharón, kikamk ut ke'xmuq aran Kibat. Li tenamit a'an wank sa' xyanqeb' li xtzuulul Efraín ut kik'ehe'k re laj Pinjás, ralal laj Elehasar.