Josué 20 - Q'eqchi Bible

Eb' li tenamit te'xkol wi' rib' eb' laj kamsinel ras riitz'in

¹ Li Qaawa' kiraatina laj Josué ut kixye re:

² “Taaye reheb' laj Israel naq te'xsik' ruheb' li tenamit li te'xkol wi' chaq rib', jo' kinye re laj Moisés.

³ Sa'eb' li tenamit a'an tixmuq chaq rib' li ani xkamsink junaq ras riitz'in chi ink'a' rajom xch'ool; aran truuq toxkol rib' chiru laj eeqajunel kik'.

⁴ Naq taaxik sa' junaq reheb' li tenamit a'an, toxxaqliiq chire li okeb'aal ut toxch'olob' k'aru xb'aanu, reheb' li xcheekal winqul li tenamit. Ut eb' a'an te'xk'ul laj kamsinel ras riitz'in sa' li xtenamiteb' ut te'xk'e junaq rochoch re naq twanq sa' xyanqeb'.

⁵ Wi li rech'alal li kamenaq taawulaq aran chi xsik'b'al, ink'a' taaq'axtesimanq li winq li xkamsi li ras riitz'in, xb'aan naq moko rajom ta xch'ool naq xb'aanu a'an ut moko xik' ta naril junxilaj.

⁶ Li winq a'in taakanaaq sa' li tenamit a'an toj taaraqe'q aatin chirix xb'aaneb' li komonil ut toj taakamq li xYuwa'il aj tij li wanq sa'eb' li kutan a'an. Chirix a'an truuq taasutq'iiq wi' chik sa' li na'ajej ki'elk wi' chaq, a' li xtenamit ut li rochoch”, chan li Qaawa'.

⁷ Toja' naq eb' laj Israel ke'xsik' ruheb': Kadés re Galilea sa' li xtzuulul Neftalí; Sikem sa' li xtzuulul Efraín; Kiryat-Arbá malaj Hebrón, sa' li xtzuulul Judá.

⁸ Junpak'al li nima' Jordán, sa' xjayal releb'l saq'e re Jerikó, ke'xsik' ruheb': Béser, sa' xteepal Rubén sa' li chaqich'och', sa' li taq'a ru; Ramot aran Galahad, sa' xteepal Gad, ut Golán aran Basán, sa' xteepal Manasés.

⁹ A'aneb' a'in li tenamit xaqab'anb'ileb' cho'q reheb' chixjunileb' laj Israel, jo'wi' cho'q reheb' laj ab'l tenamit li wanqeb' sa' xyanqeb'. Aran truuq tixkol rib' yalaq ani xkamsink junaq ras riitz'in chi ink'a' rajom xch'ool. Chi jo'kan ink'a' taakamsiiq xb'aaneb' li rech'alal li kamenaq, toj taaraqe'q aatin chirix xb'aaneb' li komonil.