Josué 18 - Q'eqchi Bible

Li wuqub' chik chi teep

¹ Chixjunil li komonil reheb' li ralal xk'ajol laj Israel ke'ch'utlaak Siló ut aran ke'xxaqab' li Loq' laj Muheb'aal. Ak wank chixjunil li na'ajej rub'el xwankileb'.

² Ab'anan toj wankeb' wuqub' chik chi teep sa' xyanqeb' laj Israel li maji' xk'ulumeb' li xch'och'eb'.

³ Jo'kan naq laj Josué kixye reheb' laj Israel: “Jo' najtil chik toj yooqex chi xb'ayb'al eerib' re xchapb'al li ch'och' ak xk'ehom eere li Qaawa', li xYos leexe'toonil yuwa'?

⁴ Sik'omaqeb' ru ox oxaq chi winq sa' li junq teep, re naq teb'intaqla chi xb'eeninkil li tenamit. Chi jo'kan truuq tqajek'i li ch'och' naq te'sutq'iiq chaq, a' yaal k'aru li rilomeb'.

⁵ Eb' li winq a'an te'xjachi li ch'och' sa' wuqub' jachal. Eb' laj Judá te'kanaaq sa' xna'ajeb', sa' xjayal rokeb'l iq', ut eb' li ralal xk'ajol laj José te'kanaaq sa' xna'ajeb', sa' xjayal releb'l iq'.

⁶ Naq ak xejachi li ch'och' sa' wuqub' jachal, teetz'iib'a reetalil ut teek'am chaq wik'in re naq tinb'uuli rix arin, chiru li Qaawa' li qaYos.

⁷ Eb' laj Leví ink'a' taak'ehe'q xch'och'eb' sa' eeyanq, xb'aan naq li k'anjelak cho'q aj tij chiru li Qaawa' a'an li reechanihomeb'. Eb' laj Gad ut eb' laj Rubén ut li xyiijachil xteepal laj Manasés ak xk'ulumeb' li xna'ajeb' sa' xjayal releb'l saq'e, junpak'al li nima' Jordán, a' li ch'och' li kik'ehe'k reheb' xb'aan laj Moisés, laj k'anjel chiru li Qaawa'”, chan laj Josué.

⁸ Eb' li winq li ke'sik'e'k ru chi xtz'iib'ankil reetalil li na'ajej ke'xchap xb'eheb', ut laj Josué kixye reheb': “Ayuqex, b'eenihomaq chixjunil li na'ajej ut tz'iib'ahomaq reetalil. Chirix a'an texsutq'iiq chaq wik'in ut laa'in tinb'uuli rix li ch'och' cho'q eere arin Siló, chiru li Qaawa'”, chan.

⁹ Eb' a'an koheb', ke'xb'eeni chixjunil li na'ajej, ke'xtz'iib'a reetalil li ch'och' sa' wuqub' jachal ut ke'sutq'iik chaq rik'in laj Josué, sa' li xmuheb'aaleb' aran Siló.

¹⁰ Toja' naq laj Josué kixb'uuli rix li na'ajej aran Siló, chiru li Qaawa', ut kixjek'i li ch'och' sa' xyanqeb' laj Israel.

Li xteepal laj Benjamín

¹¹ Naq ak xe'xb'uuli rix li na'ajej, eb' li ralal xk'ajol laj Benjamín ke'xk'ul li na'ajej li wank sa' xyi li xch'och'eb' li ralal xk'ajol laj Judá ut li ralal xk'ajoleb' laj José.

¹² Li xnub'ajl sa' releb'l iq' natiklaak wan wi' li nima' Jordán, nataqe'k sa' xjayal releb'l iq' re Jerikó, toj naxtaw li k'iche' sa' rokeb'l saq'e, ut nokox'elq sa' li chaqich'och' re Bet-Abén.

¹³ Chirix chik a'an li nub'ajl naxik sa' rokeb'l iq' re Lus (Betel ajwi' nayeemank re) ut nakub'eek Atrot-Adar, sa' xb'een li tzuul li wank sa' rokeb'l iq' re Bet-Jorón taq'a.

¹⁴ Aran li nub'ajl naxb'ach' rib' sa' rokeb'l saq'e toj sa' rokeb'l iq', chalen sa' li tzuul li wank sa' rokeb'l iq' re Bet-Jorón ut nawulak Kiryat-Bahal (Kiryat-Yeharín ajwi' nayeemank re), xtenamiteb' li ralal xk'ajol laj Judá. A'an a'in li nub'ajl li wank sa' rokeb'l saq'e.

¹⁵ Li nub'ajl li wank sa' rokeb'l iq' natiklaak sa' xmaril Kiryat-Yeharín, naxik Gasín ut nokox'elq chi xk'atq li yo'leb'aal ha' re Neftohaj.

¹⁶ Chirix chik a'an nakub'eek sa' xmaril li tzuul li wank chiru li xtaq'ahil Ben-Hinón, sa' releb'l iq' re li xTaq'ahil Refaín, nakub'eek sa' li xtaq'ahil Hinón, sa' rokeb'l iq' wankeb' wi' laj Jebús, ut nakub'eek wi' chik toj En-Rokel.

¹⁷ Aran naxb'ach' rib' sa' xjayal releb'l iq', na'elk En-Semes ut naxik sa' xsutam li pek li wank sa' xjayal li taqsink re Adumín; nakub'eek wan wi' li saqoonak re laj Boján, ralal laj Rubén;

¹⁸ nanume'k sa' releb'l iq' re Bet-Arabá ut nakub'eek toj Arabá;

¹⁹ nokoxnume'q sa' releb'l iq' re Bet-Joklá ut nokoxraqe'q sa' releb'l iq' re li Atz'aminb'il Palaw, b'arwi' nokox'okaq roq li nima' Jordán. A'an a'in li nub'ajl li wan chaq sa' rokeb'l iq'.

²⁰ Li nima' Jordán a'an chaq li xnub'ajl sa' rokeb'l saq'e. A'an chaq li reechanihomeb' li ralal xk'ajol laj Benjamín, rochb'eeneb' li xnub'ajl, a' yaal chanru li xk'ihal li junjunq chi ch'uut.

²¹ Li xtenamiteb' li xteepal laj Benjamín chi ch'uutal a'aneb' a'in: Jerikó, Bet-Joklá, Emek-Kesís,

²² Bet-Arabá, Semaráhin, Betel,

²³ Abín, Pará, Ofrá,

²⁴ Kefar-Amoná, Ofní, Gabá: kab'laju chi tenamit rochb'eeneb' xk'aleb'aaleb'.

²⁵ Gabahón, Ramá, Beherot,

²⁶ Mispá, Kefirá, Mosá,

²⁷ Rekem, Irpehel, Taralá,

²⁸ Selá-Jalef, Jebús (naraj naxye: Jerusalén), Kibehá ut Kiryat: kaalaju chi tenamit rochb'eeneb' xk'aleb'aaleb'. A'an a'in li reechanihomeb' li ralal xk'ajol laj Benjamín, chi ch'uutal.