Josué 17 - Q'eqchi Bible

Li xteepal laj Manasés

¹ Li xteepal laj Manasés kitz'aqk na'ajej sa' xk'ab'a' naq a'an xb'een ralal laj José. Laj Makir aj puub', xb'een ralal laj Manasés ut xyuwa' laj Galahad, kireechani Galahad ut Basán.

² Jo'kan ajwi' ke'tz'aqk na'ajej eb' li xkomon li ralal xk'ajol laj Manasés, chi ch'uut: eb' li ralal xk'ajol laj Abiéser, eb' li ralal xk'ajol laj Jélek, eb' li ralal xk'ajol laj Asriel, eb' li ralal xk'ajol laj Sikem, eb' li ralal xk'ajol laj Jéfer ut eb' li ralal xk'ajol laj Semidá. A'aneb' a'in li ralal xk'ajol laj Manasés, a' li xb'een ralal laj José.

³ Ab'anan laj Selofjad, ralal laj Jéfer, ralal laj Galahad, ralal laj Makir, ralal laj Manasés, maak'a' chaq ralal, ka'ajwi' xrab'in wankeb'. A'aneb' a'in li xk'ab'a'eb': lix Majlá, xNohá, xJoklá, xMilká ut xTirsá.

⁴ Eb' a'an ke'xk'ut rib' chiru laj Elehasar laj tij, chiru laj Josué, ralal laj Nun, ut chiruheb' li xjolomileb' li tenamit, ut ke'xye: “Li Qaawa' kixchaq'rab'i laj Moisés naq chixk'ehaq qach'och' sa' xyanqeb' li qas qiitz'in”, chankeb'. Jo'kan naq laj Josué kixk'e xch'och'eb' sa' xyanqeb' li rech'alal li xyuwa'eb', jo' chanru xyehom li Qaawa'.

⁵ Jo'ka'in naq eb' laj Manasés ke'xk'ul lajeeb' jachal chik li ch'och' sa' xb'een li tenamit Galahad ut Basán, li wankeb' sa' releb'l saq'e re li nima' Jordán,

⁶ xb'aan naq eb' li xrab'in laj Manasés ke'k'ehe'k xch'och'eb', jo' chanru naq ke'xk'ul xch'och'eb' li winq. Li na'ajej Galahad kik'ehe'k reheb' li ralal junch'ol chik laj Manasés.

⁷ Li na'ajej li kik'ehe'k re li xteepal laj Manasés a'an Mikmetat, chi xk'atq Aser, sa' xjayal Sikem. Chirix chik a'an li nub'ajl naxik sa' xseeb'al, toj Yasib, sa' li xyo'leb'aal ha' re Tapúhaj.

⁸ Li na'ajej Tapúhaj re chaq Manasés naq kiwank, ab'an li tenamit Tapúhaj sa' li xnub'ajl Manasés reheb' chaq li ralal xk'ajol laj Efraín.

⁹ Moqon li xnub'ajl nakub'eek junqre li nima' re Kaná. Sa' rokeb'l iq' re li nima' a'an wankeb' chaq li xtenamit laj Efraín, xtz'aqob' li wank re laj Efraín sa' xyanqeb' li xtenamit laj Manasés. Jo'kan naq li xch'och' laj Manasés wan chaq sa' releb'l iq' re li nima' ut nokoxraqe'q sa' li palaw.

¹⁰ Li na'ajej li wank sa' rokeb'l iq' a'an chaq re laj Efraín, ut li wank sa' releb'l iq' a'an chaq re laj Manasés, ut li xnub'ajl a'an chaq li palaw; naxk'ul rib' li xna'ajeb' rik'in li xna'aj laj Aser sa' releb'l iq' ut li xna'aj laj Isakar sa' releb'l saq'e.

¹¹ Laj Manasés kixk'ul ajwi' eb' li tenamit a'in sa' xch'och'eb' laj Isakar ut laj Aser: Betsán rochb'eeneb' li xk'aleb'aal; Iblehán rochb'eeneb' li xk'aleb'aal; Dor rochb'eeneb' li xk'aleb'aal; Tanak ut Mejido rochb'eeneb' li xk'aleb'aal, ut jun rox raqal re Néfet.

¹² Eb' li ralal xk'ajol laj Manasés ink'a' ke'ruhank chi xchapb'al eb' li tenamit a'an; jo'kan naq eb' laj Kanahán ke'kanaak sa'eb' li tenamit a'an.

¹³ Ab'an naq ke'xkawu rib'eb' laj Israel, ke'xk'eheb' laj Kanahán sa' kawil k'anjel, us ta ink'a' ke'ruuk risinkileb' aran.

Eb' laj José ke'reechani li k'iche'

¹⁴ Sa' jun kutan eb' li ralal xk'ajol laj José ke'aatinak rik'in laj Josué ut ke'xye re: “K'a'ut naq ink'a' k'i li qana'aj xak'e qe? Laa'o naab'alo xb'aan naq li Qaawa' ki'osob'tesink qe”, chankeb'.

¹⁵ Kichaq'ok laj Josué ut kixye: “Wi laa'ex naab'alex, ayuqex sa' li k'iche' ut t'anomaq eb' li loq'laj che' sa' xch'och'eb' laj Perés ut eb' laj Refait, xb'aan naq q'axal laatz' cho'q eere li na'ajej re Efraín”, chan.

¹⁶ Ke'chaq'ok eb' li ralal laj José ut ke'xye: “Yaal ajwi'. Moko tz'aqal ta li k'iche' cho'q qe. Ab'an sa' li ru taq'a chixjunileb' laj Kanahán wankeb' xb'eleb'aal ch'iich' re yalok, yiib'anb'ileb' rik'in ch'iich': eb' laj Kanahán li wankeb' Betsán ut sa' li xsutam, jo' ajwi' eb' li wankeb' sa' xtaq'ahil Jisrehel”, chankeb'.

¹⁷ Toja' naq laj Josué kixye reheb' li ralal xk'ajol laj José, laj Efraín ut laj Manasés: “Laa'ex jun nimla tenamit ut jwal kaw eerib'. Jo'kan naq moko jun jachal ta teereechani,

¹⁸ eerehaq aj b'an wi' li tzuul li k'iche' ru. T'anomaqeb' li che', ut chi jo'kan teereechani chixjunil li na'ajej a'an. Teerisiheb' laj Kanahán, us ta wankeb' xb'eleb'aal ch'iich' yiib'anb'ileb' rik'in ch'iich' ut q'axal kaweb' rib'”, chan laj Josué.