Josué 14 - Q'eqchi Bible

Laj Josué kixjek'i li na'ajej Kanahán

¹ A'an a'in li ch'och' re Kanahán li ke'xk'ul eb' laj Israel cho'q reechanihomeb', jo' chanru kik'ehe'k reheb' xb'aan laj Elehasar, laj tij, ut laj Josué, ralal laj Nun, ut xb'aaneb' ajwi' li xjolomileb' li junkab'al sa' li xteepaleb' laj Israel.

² Li ch'och' a'in kijek'imank chi b'uulinb'il sa' xyanqeb' li b'eleeb' chi teep ut li xyiijachil xteepal laj Manasés, jo' chanru kixye li Qaawa' re laj Moisés.

³ Laj Moisés ak xk'ehom xch'och'eb' laj Rubén, eb' laj Gad ut li xyiijachil xteepal laj Manasés aran, junpak'al li nima' Jordán; ab'an eb' laj Leví maak'a' xk'ulumeb' chaq.

⁴ Eb' li ralal xk'ajol laj Josué ke'xjunaji rib' sa' wiib' teep: a'aneb' a'in li xteepal laj Manasés ut li xteepal laj Efraín. Ab'an ink'a' kik'ehe'k xch'och'eb' laj Leví: ka'ajwi' ke'xk'ul kok' na'ajej b'arwi' te'wanq ut te'xk'iiresi li xketomqeb'.

⁵ Eb' laj Israel ke'xjek'i li ch'och' jo' tz'aqal kiyehe'k re laj Moisés xb'aan li Qaawa'.

Li xch'och' laj Kaleb

⁶ Naq eb' li ralal xk'ajol laj Judá ke'jilok chi xk'atq laj Josué aran Kilkal, laj Kaleb, ralal laj Jefuné aj Kenís, kixye re: “Ak nakanaw li xyehom li Qaawa' re laj Moisés, laj k'anjel chiru li Yos, naq ki'aatinak chawix laa'at ut chiwix laa'in aran Kadés-Barné.

⁷ Ka'k'aal chihab' wank we naq laj Moisés, laj k'anjel chiru li Qaawa', kinxtaqla chaq Kadés-Barné chi rilb'al li ch'och' a'in. Ut naq kinsutq'iik, kinch'olob' chiru li k'aru wilom chaq, kinye resil chi tz'aqal re ru.

⁸ Laa'in kinwank chi tiik linch'ool chirix li Qaawa' linYos, us ta eb' li was wiitz'in li koheb' wochb'een ke'xch'ina xch'ooleb' li tenamit.

⁹ Sa' li kutan a'an laj Moisés kixye li jurament a'in: «Relik chi yaal naq li ch'och' li xyeq' laawoq a'anaq aaweechanihom ut reechanihomeb' laawalal aak'ajol chi junelik, xb'aan naq xataaqe li Qaawa' linYos chi tiik aach'ool», chan.

¹⁰ K'e reetal chanru naq li Qaawa' xk'e inyu'am jo' xyeechi'om sa' jurament. Wank oob' roxk'aal chihab' xyeeb'al a'in re laj Moisés naq toj yookeb' chaq chi b'eek sa' li chaqich'och' eb' laj Israel, ut anaqwan oob' ro'k'aal chihab'in chik.

¹¹ Ab'anan toj kaw wib' jo' sa' li kutan a'an naq kinxtaqla laj Moisés: chalen sa' li kutan a'an toj wank inmetz'ew re yalok ut re b'eek.

¹² Jo'kan naq nintz'aama chawu naq taak'e we li tzuul a'in anaqwan, jo' yeeb'il chaq we sa' li kutan a'an. Ak nakanaw naq wankeb' aran laj Anak; wankeb' ajwi' ninqi tenamit li yo'oon wankeb' chi yalok. Wi li Qaawa' wanq wik'in, twaanilasiheb', jo' xyehom we li Qaawa'”, chan laj Kaleb.

¹³ Toja' naq laj Josué kirosob'tesi laj Kaleb, ralal laj Jefuné, ut kixk'e Hebrón chi reechani.

¹⁴ Jo'kan naq Hebrón toj chalen sa' li kutan a'in kikanaak cho'q reechanihom laj Kaleb, ralal laj Jefuné aj Kenís, xb'aan naq kixtaaqe li Qaawa', xYos laj Israel, chi junelik.

¹⁵ Li xb'een xk'ab'a' Hebrón, a'an chaq Kiryat-Arbá. Arbá a'an chaq li winq jwal najt roq sa' xyanqeb' laj Anak. Ut naq kiraqe'k li nimla yalok a'in, chixjunil li na'ajej kiwank sa' tuqtuukilal.