Josué 11 - Q'eqchi Bible

Laj Josué kixq'ax ru laj Jabín ut eb' li neke'okenk chirix

¹ Naq laj Jabín, awab'ej re Jasor, kixnaw chixjunil a'an, kixtaqla resil re laj Yobab, awab'ej re Merón, jo'wi' re li awab'ej re Simrón ut re Aksap,

² ut reheb' li awab'ej li wankeb' sa' xjayal releb'l iq', sa' xyanqeb' li tzuul, sa' li ru taq'a li wank sa' xjayal rokeb'l iq' re Kinéret, sa' Taq'a ru ut sa' xyanqeb' li tzuul li wankeb' sa' rokeb'l saq'e re Dor.

³ Kixtaqla ajwi' xyeeb'al resil reheb' laj Kanahán li wankeb' chaq sa' releb'l saq'e ut rokeb'l saq'e, reheb' laj Amor, eb' laj Jib, eb' laj Perés ut eb' laj Jebús sa' xyanqeb' li tzuul, reheb' laj Jib chiru li tzuul Hermón, sa' li tenamit Mispá.

⁴ Chixjunileb' li awab'ej a'in koheb' rochb'eeneb' chixjunileb' laj puub', k'ajo' xk'ihaleb', kama' li samahib' chire li palaw, rochb'eeneb' ajwi' naab'aleb' li kawaay ut eb' li b'eleb'aal ch'iich'.

⁵ Chixjunileb' a'in ke'xjunaji rib' ut koxe'hilanq chire li ha' re Merón re yalok rik'ineb' laj Israel.

⁶ Tojo' naq li Qaawa' kixye re laj Josué: “Matxiwak xb'aan naq wulaj, sa' ajwi' li honal a'in, te'kamq chixjunileb' chiruheb' laj Israel. Ut laa'at taatoq roqeb' li xkawaayeb' ut taak'e xxamlel li xb'eleb'aal ch'iich'eb'”, chan li Yos.

⁷ Jo'kan naq laj Josué rochb'een chixjunileb' laj puub' koxe'xtaweb' chi maak'a' sa' xch'ooleb', chire li ha' re Merón.

⁸ Li Qaawa' kiq'axtesink reheb' sa' ruq'eb' laj Israel. Ke'xq'ax ruheb' ut ke'raanilasiheb' toj wan wi' li Nimla Sidón ut Misrepot ut, sa' xjayal releb'l saq'e, toj sa' xtaq'ahil Mispá. Ke'xsach ruheb': maajun chik kikanaak chi yo'yo.

⁹ Laj Josué kixb'aanu jo' kiyehe'k re xb'aan li Qaawa': kixtoq roqeb' li xkawaayeb' ut kixk'at li xb'eleb'aal ch'iich'eb'.

¹⁰ Sa'eb' li kutan a'an Jasor a'an chaq li nimla tenamit sa' xb'eeneb' chixjunileb' li tenamit a'an. Jo'kan naq laj Josué rochb'eeneb' laj puub' koxe'xchap li tenamit a'an ut ke'xkamsi chi ch'iich' li x'awab'ejeb'.

¹¹ Ke'xkamsi chi ch'iich' jo'k'ihaleb' li wankeb' xyu'am aran; ke'xsach ru li tenamit chi junajwa, ke'xk'at ut maajun chik kikanaak chi yo'yo.

¹² Jo'kan ajwi' kixb'aanu laj Josué rik'ineb' chixjunil li tenamit a'an: kixchapeb', kixchap ajwi' li x'awab'ejeb' ut kixkamsiheb' chi ch'iich'; kixsach ruheb' jo' xtaqlahom laj Moisés, laj k'anjel chiru li Qaawa'.

¹³ Ab'an maajun reheb' li tenamit li wankeb' sa' xb'een b'ool kik'ate'k xb'aaneb' laj Israel; ka'ajwi' Jasor kik'atmank xb'aan laj Josué.

¹⁴ Ke'xkamsi chi ch'iich' jo'k'ihaleb' li wankeb' xyu'am sa'eb' li tenamit a'an; maajun kikanaak chi yo'yo, ut ke'reechani chixjunil li k'a'aq re ru jo'wi' li xketomqeb'.

¹⁵ Jo' tz'aqal kixye li Qaawa' re laj Moisés laj k'anjel chiru, jo'kan ajwi' naq kichaq'rab'iik laj Josué xb'aan laj Moisés, ut kixb'aanu chi tz'aqal re ru: maajun reheb' li aatin yeeb'il xb'aan li Qaawa' re laj Moisés ink'a' ta kixb'aanu.

¹⁶ Laj Josué kireechani chixjunil li na'ajej sa' xyanqeb' li tzuul, li Nejeb, chixjunil li ch'och' re Gosen, Arabá, li Taq'a ru, jo'eb' ajwi' li tzuul ut li ru taq'a re Israel.

¹⁷ Chalen chaq sa' li T'ojochil Tzuul li wank sa' xb'een Seír, toj Bahal-Gad sa' xtaq'ahil Líbano, sa' xtoon li tzuul Hermón, kixchap chixjunileb' li awab'ej ut kixkamsiheb'.

¹⁸ Najt kiyalok laj Josué rik'ineb' chixjunileb' li awab'ej a'in.

¹⁹ Maajun tenamit ke'xk'e rib'eb' sa' tuqtuukilal rik'ineb' laj Israel: ka'ajwi' eb' laj Jib li wankeb' aran Gabahón. Ut chixjunileb' li junch'ol chik rik'in yalok koxe'reechani.

²⁰ Li Qaawa' kixk'e xkawilaleb' xch'ool chixjunileb' li tenamit a'an re yalok rik'ineb' laj Israel, re naq te'sache'q ru chi junajwa, jo' kixye li Qaawa' re laj Moisés.

²¹ Sa'eb' li kutan a'an laj Josué kixsach chixjunileb' laj Anak li wankeb' sa' xyanqeb' li tzuul aran Debir, Anab, jo'wi' sa' xyanqeb' li xtzuulul Judá ut Israel.

²² Maajun aj Anak kikanaak sa' li xtenamiteb' laj Israel; ka'ajwi' aran Gasa, Gad ut Asdod ke'kanaak.

²³ Laj Josué kireechani chixjunil li na'ajej kama' yeeb'il re laj Moisés xb'aan li Qaawa', ut kixq'axtesi reheb' laj Israel cho'q reechanihomeb', a' yaal chanru xmaatan li junjunq chi teep. Ut naq kiraqe'k li nimla yalok a'in, chixjunil li na'ajej kiwank sa' tuqtuukilal.