Josué 10 - Q'eqchi Bible

Eb' laj Israel ke'xq'ax ruheb' laj Amor

¹ Laj Adonisédek, awab'ej re Jerusalén, kirab'i resil naq laj Josué kixchap ut kixsach ru Ay, ut kixb'aanu re li tenamit a'an jo'wi' re li x'awab'ej jo' kixb'aanu xb'enwa re Jerikó ut li x'awab'ej. Kirab'i ajwi' resil naq eb' laj Gabahón ke'xk'am rib' sa' tuqtuukilal rik'ineb' laj Israel ut wankeb' chik sa' xyanqeb' a'an.

² K'ajo' naq kixiwak laj Adonisédek, xb'aan naq Gabahón a'an jun nimla tenamit jo' xk'ulub'eb' li awab'ej, ut jwal nim chiru Ay; jo'kan ajwi' chixjunileb' li xwinqul q'axal kaweb' rib'.

³ Tojo' naq laj Adonisédek, awab'ej re Jerusalén, kixtaqla xyeeb'al re laj Ohán, awab'ej re Hebrón, re laj Pirán, awab'ej re Yarmut, re laj Yapía, awab'ej re Lakix, ut re laj Debir, awab'ej re Eklón:

⁴ “Chalqex arin ut chineetenq'a chi xq'axb'al ruheb' laj Gabahón, xb'aan naq xe'xk'e rib' sa' tuqtuukilal rik'in laj Josué ut eb' laj Israel”, chan laj Adonisédek.

⁵ Jo'kan naq ke'xjunaji rib' li oob' chi awab'ej aj Amor li wankeb' chaq sa'eb' li tenamit Jerusalén, Hebrón, Yarmut, Lakix ut Eklón, rochb'eeneb' chixjunileb' laj puub'. Koheb' chi yalok rik'ineb' laj Gabahón, ke'xxaqab' rib' chiruheb' ut ke'xsut li tenamit.

⁶ Toja' naq eb' laj Gabahón ke'xtaqla xyeeb'al re laj Josué toj aran Kilkal b'arwi' wankeb' li xmuheb'aaleb' laj Israel: “Moohaakanab' qajunes. Kim arin chi junpaat, choohaakol ut choohaatenq'a laa'o aamoos, xb'aan naq chixjunileb' li awab'ej aj Amor li wankeb' chaq sa' k'iche' xe'xjunaji rib' sa' qab'een”.

⁷ Kitaqe'k chaq laj Josué toj Kilkal rochb'een chixjunileb' laj puub' li yo'oon wankeb' chi yalok.

⁸ Ut li Qaawa' kixye re laj Josué: “Maaxiwa ruheb' xb'aan naq xink'eheb' sa' laawuq'; maajun reheb' truuq taakuyuq sa' aawuq'”, chan.

⁹ Toja' naq laj Josué ki'elk chaq Kilkal, kib'eek jun q'oqyink ut kichalk sa' xb'eeneb' chi maak'a' sa' xch'ooleb'.

¹⁰ Li Qaawa' kixk'eheb' chi elelik chiruheb' laj Israel: k'ajo' naq kixsacheb' aran Gabahón! Kixtaaqiheb' sa' li b'e nataqe'k sa' li tenamit Bet-Jorón, ut wankeb' ajwi' ke'kamsiik Aseká ut Makedá.

¹¹ Ut naq yookeb' chi elelik chiruheb' laj Israel sa' li kub'sink re Bet-Jorón, li Qaawa' kixtaqla chaq naab'al li saqb'ach, chanchan ninqi pek, sa' xb'eeneb' toj chalen sa' xb'ehel Aseká, ut ke'kamk. Jwal naab'aleb' chik li ke'kamk xb'aan li saqb'ach chiru li ke'kamsiik xb'aaneb' laj Israel rik'in ch'iich'.

¹² Naq li Qaawa' kixq'axtesiheb' laj Amor sa' ruq'eb' laj Israel, laj Josué kiraatina li Qaawa' chiruheb' laj Israel ut kixye re: “At saq'e, xaqlin sa' xb'een Gabahón, ut laa'at, at po, xaqlin sa' xtaq'ahil Ayalón”, chan.

¹³ Ut li saq'e jo'wi' li po ke'xaqliik toj reetal li tenamit ke'reeqajuniheb' li xik' neke'ilok reheb'. Ma ink'a' tab'i' tz'iib'anb'il a'in sa' xHuhil li Tiik xch'ool? Li saq'e kixaqliik sa' xyi li choxa, kach'in chik maa jun kutan, ut ink'a' kixseeb'a rib' chi ok.

¹⁴ Maajun sut kik'ulmank chi jo'kan jo' li kik'ulmank sa' li kutan a'an, chi moko junxil chi moko moqon: li Qaawa' kirab'i xyaab' xkux jun li winq, xb'aan naq li Qaawa' kiyalok sa' xk'ab'a'eb' laj Israel.

¹⁵ Chirix chik a'an laj Josué ut eb' laj Israel ke'sutq'iik chaq Kilkal sa' li xmuheb'aaleb'.

¹⁶ Ut eb' li oob' chi awab'ej a'an ke'elelik ut koxe'xmuq rib' sa' li ochoch pek aran Makedá.

¹⁷ Ab'anan moqon ke'tawe'k chi muqmuukeb' sa' li ochoch pek a'an ut kiyeemank resil re laj Josué.

¹⁸ Kichaq'ok laj Josué ut kixye: “Tolk'osihomaq ninqi pek chiru li ochoch pek ut k'ehomaqeb' winq chi xk'aak'alenkil.

¹⁹ Ab'an laa'ex meekanab' xik chirixeb' li xik' neke'ilok eere ut cheram li xb'eheb' re naq ink'a' te'ok sa' li xtenamiteb', xb'aan naq li Qaawa' leeYos xk'eheb' sa' leeruq'”, chan.

²⁰ Naq laj Josué ut eb' laj Israel ke'xq'ax ut ke'xsach ru chi junajwa eb' laj Amor, toja' naq eb' li ke'kanaak chi yo'yo ke'elelik ut koxe'okaq sa'eb' li xtenamit.

²¹ Ab'an eb' laj Israel ke'sutq'iik chaq rik'in laj Josué chi maak'a' reek'eb', sa' li xhilob'aaleb', aran Makedá, ut maa'ani kiwech'ok rixeb' laj Israel.

²² Tojo' naq kixye laj Josué: “Tehomaq li okeb'aal re li ochoch pek, isihomaq li oob' chi awab'ej a'an ut k'amomaq chaq”, chan.

²³ Ut jo'kan ke'xb'aanu: ke'risi chaq li oob' chi awab'ej, a' li awab'ej re Jerusalén, li awab'ej re Hebrón, li awab'ej re Yarmut, li awab'ej re Lakix ut li awab'ej re Eklón.

²⁴ Naq ak wankeb' chik rik'in laj Josué, a'in kixb'oq chixjunileb' laj Israel ut kixye reheb' li xjolomileb' laj puub' li neke'ochb'eenink re: “Jilonqex chaq ut k'ehomaq leeroq sa' xb'een xkuxeb' li awab'ej a'an”, chan. Ut jo'kan ke'xb'aanu.

²⁵ “Mexxiwak -chan laj Josué reheb'- chi moko chich'inanq leech'ool; kawaq b'an leech'ool ut yalomaq eeq'e, xb'aan naq jo'ka'in tixb'aanu li Qaawa' rik'ineb' chixjunil li xik' neke'ilok eere”.

²⁶ Chirix chik a'an kixkamsiheb' ut kixtaqla xt'uyub'ankileb' sa' ru'uj oob' li che'; ut aran ke'kanaak chi t'uyt'u toj ewu.

²⁷ Sa' xhonalil rokik li saq'e, laj Josué kixye naq te'kub'siiq eb' li kamenaq sa' ru'ujeb' li che' re naq te'kute'q sa' li ochoch pek b'arwi' ke'xmuq rib'eb'. Ut jo'kan ke'xb'aanu. Ke'xk'e ajwi' ninqi pek chire li ochoch pek, ut aran wankeb' chalen toj anaqwan.

²⁸ Sa' ajwi' li kutan a'an laj Josué kixchap Makedá. Kixkamsi chi ch'iich' li awab'ej ut chixjunileb' li poyanam: kixk'eheb' chi sache'k chi junajwa chixjunil li wankeb' xyu'am aran. Maajun chik kikanaak chi yo'yo sa' li tenamit a'an. Laj Josué kixb'aanu re li awab'ej re Makedá jo' kixb'aanu re li awab'ej re Jerikó.

²⁹ Moqon chik, rochb'een chixjunileb' laj Israel, ke'elk Makedá, koheb' Libná ut ke'ok chi yalok aran.

³⁰ Li Qaawa' kixq'axtesi ajwi' li tenamit a'an sa' ruq'eb' laj Israel, rochb'een li awab'ej. Chixjunileb' li wankeb' xyu'am aran, ke'kamsiik chi ch'iich'; maajun chik kikanaak chi yo'yo sa' li tenamit a'an. Laj Josué kixb'aanu re li awab'ej a'an jo' kixb'aanu re li awab'ej re Jerikó.

³¹ Chirix chik a'an laj Josué, rochb'een chixjunileb' laj Israel, ke'xkanab' Libná ut koheb' Lakix; ke'xsut ut ke'ok chi yalok aran.

³² Li Qaawa' kixq'axtesi ajwi' Lakix sa' ruq'eb' laj Israel, ut sa' xkab' li kutan kichape'k li tenamit ut ke'kamsiik chi ch'iich' jo'k'ihaleb' li wankeb' xyu'am aran, kama' xk'ulumeb' laj Libná.

³³ Toja' naq laj Jorán, li awab'ej re Késer, kitaqe'k chi xtenq'ankil Lakix, ab'anan kiq'axe'k ru rochb'een chixjunileb' laj puub': maajun chik kikanaak chi yo'yo.

³⁴ Chirix chik a'an laj Josué, rochb'een chixjunileb' laj Israel, ke'elk Lakix ut koheb' Eklón; ke'xsut ut ke'ok chi yalok aran.

³⁵ Sa' ajwi' li kutan a'an ke'xchap ut ke'xkamsiheb' chi ch'iich' li wankeb' Eklón. Sa' li kutan a'an ke'sache'k ru chi junajwa jo'k'ihaleb' li wankeb' xyu'am aran, kama' ak xk'ulumeb' laj Lakix.

³⁶ Laj Josué, rochb'een chixjunileb' laj Israel, ke'elk Eklón ut ke'taqe'k Hebrón ut ke'ok chi yalok aran.

³⁷ Ke'xchap ut ke'xkamsiheb' chi ch'iich', rochb'een li awab'ej, chixjunileb' li tenamit ut li wankeb' xyu'am aran. Maajun chik kikanaak chi yo'yo kama' ak xk'ulumeb' laj Eklón. Ke'sache'k ru chi junajwa jo'k'ihaleb' li wankeb' xyu'am.

³⁸ Toja' naq laj Josué, rochb'een chixjunileb' laj Israel, koheb' Debir ut ke'ok chi yalok aran.

³⁹ Ke'xchap Debir; ke'xchap ajwi' li awab'ej ut chixjunileb' li poyanam. Ke'xkamsi chi ch'iich' ut ke'xsach ru jo'k'ihaleb' li wankeb' xyu'am aran: maajun chik kikanaak chi yo'yo. Jo' naq xk'ulumeb' li tenamit Hebrón, jo'wi' Libná ut li x'awab'ejeb', jo'kan ajwi' kixk'ul Debir ut li x'awab'ejeb'.

⁴⁰ Jo'ka'in naq laj Josué kireechani chixjunil li na'ajej: eb' li tzuul, Nejeb, eb' li ru taq'a ut li na'ajej wank chi xk'atq. Kixq'ax ruheb' chixjunil li awab'ej, kixsacheb' ru chixjunil li wankeb' xyu'am aran ut maajun chik kikanaak chi yo'yo, kama' yeeb'il reheb' xb'aan li Qaawa', xYos laj Israel.

⁴¹ Laj Josué kireechani chixjunil li na'ajej chalen Kadés-Barné toj Gasa, jo'wi' li xsutam Gosen toj Gabahón.

⁴² Sa' li yalok a'an kixq'ax ruheb' chixjunil li awab'ej a'an ut kireechani li xna'ajeb', xb'aan naq li Qaawa', xYos laj Israel, yo chi tenq'ank reheb' laj Israel.

⁴³ Moqon chik laj Josué, rochb'een chixjunileb' laj Israel, ke'sutq'iik chaq Kilkal, sa' li xmuheb'aaleb'.