Jonás 3 - Q'eqchi Bible

Eb' laj Nínive ke'paab'ank

¹ Li Qaawa' kiraatina xka'sutil laj Jonás, ut kixye re:

² “Ayu sa' li nimla tenamit Nínive ut toxaaye li k'aru tinye aawe”.

³ Kixaqliik laj Jonás ut kixchap xb'e re xik Nínive, jo' kiyehe'k re xb'aan li Qaawa'. Nínive a'an jun nimla tenamit, oxib' kutan nab'eeniik wi' chixjunil.

⁴ Laj Jonás ki'ok chi xtoqb'al ru li tenamit, ut chiru jun kutan japjo re chi xyeeb'al chi kaw xyaab' xkux: “Sa' ka'k'aal kutan taajuk'manq Nínive”.

⁵ Eb' laj Nínive ke'xpaab' raatin li Yos: ke'xkanab' wa'ak ut ke'xk'e q'es ruhil t'ikr chirixeb', reetalil li rahil ch'oolejil. Chixjunileb', li ninqeb' ut li maak'a'eb' xwankil, ink'a' ke'xyal wa'ak chiru li kutan a'an.

⁶ Naq li awab'ej re Nínive kirab'i resil a'an, ki'elk sa' li xk'ojarib'aal, kirisi li xchaab'il aq' chirix ut kixk'e xq'esnal ru t'ikr chirix; toja' naq kixchunub' rib' sa' cha.

⁷ Chi junpaat li awab'ej, rochb'eeneb' li neke'k'anjelak chiru, ke'xk'e chi nawe'k li chaq'rab' a'in sa' li tenamit Nínive naq maajun taawa'aq; ink'a' ajwi' te'k'eemanq xwa ut ruk'a'eb' li ketomq:

⁸ “Tiqib'omaq eerib' rik'in q'es ruhil t'ikr jo' reetalil li rahil ch'oolejil; tiqib'omaq ajwi' eb' li xul chi jo'kan. Ut kaw tz'aamanqex chiru li Yos. Li junjunq xkanab'aq xb'aanunkil li xmaa'usilal ut li raaxiik' naxb'aanu toj anaqwan.

⁹ Mare wachik li Yos tixjal li xk'a'uxl, taach'anaaq li xjosq'il, ut ink'a' tookamq”.

¹⁰ Naq li Yos kiril li yookeb' chi xb'aanunkil eb' li tenamit, naq yookatqeb' chi xkanab'ankil li xmaa'usilaleb', kixjal li xk'a'uxl ut ink'a' chik kixk'eheb' sa' tojb'amaak, jo' chanru kixye reheb' xb'enwa.