Jonás 2 - Q'eqchi Bible

Laj Jonás kitijok

¹ Toja' naq laj Jonás kitijok chaq chiru li Qaawa' li xYos, toj sa' xsa' li nimla kar,

² ut kixye chi jo'ka'in: “Sa' xrahilal inch'ool xintijok chawu, at Qaawa', ut xinaasume chaq. Toj sa' xchamal li xna'ajeb' li kamenaq xinpatz' chaq laak'ab'a', ut laa'at xinaawab'i.

³ Xinaakut sa' xchamal li palaw, ut xinmuqunk chisa'. Li xkaw oq li palaw li nakataqla laa'at, xlaje'nume'k sa' inb'een.

⁴ Ut xinye sa' inch'ool: «Xinaawisi chi xnaq' aawu». Xink'oxla naq ink'a' ta chik twil laasantil ochoch.

⁵ Li ha' xinxnuq' chi junajwa, yookin chi xik sa' li xchamal; ut xtzukle rib' li xpimul li ha' chinjolom.

⁶ Q'axal cham wi' chik xinwulak; xink'oxla naq ink'a' chik tinxkoq' chaq. Ab'an laa'at at Qaawa', at inYos, xinaakol chiru li kamk.

⁷ Xweek'a naq yo chi elk linch'ool, naqaamilat sa' li waanm, at Qaawa', ut lintij xwulak aawik'in, toj sa' laasantil ochoch.

⁸ Eb' li neke'loq'onink eb' li yal k'oxlanb'il yos, moko tiikeb' ta xch'ool chawix.

⁹ A'ut laa'in tinyoxinq ut tinmayejaq chawu; tinb'aanu li k'aru inyeechi'om aawe. At Qaawa', ka'ajwi' aawik'in nachalk li kolb'a ib'”.

¹⁰ Toja' naq li Qaawa' kixtaqla li nimla kar chi xxa'wankil laj Jonás chi ch'och'el.