Jeremías 7 - Q'eqchi Bible

Kawil aatin chirix li rochoch li Yos

¹ Li Qaawa' kiraatina laj Jeremías ut kixye re:

² “Xaqab' aawib' chire li rochoch li Yos ut k'e chi nawe'k li esil a'in: Chejunilex laa'ex aj Judá, li nekexnume'k sa' li okeb'aal a'in re xloq'oninkil ru li Qaawa', ab'ihomaq li aatin a'in.

³ Jo'ka'in xye li Nimajwal Yos, li xYos laj Israel: «Chaab'ilob'resiiq leeyu'am ut leeb'aanuhom, ut laa'in texinkanab' chi wank sa' li na'ajej a'in.

⁴ Meeb'alaq'i eerib' chi xyeeb'al: Arin wank rochoch li Qaawa', waayi' li rochoch li Qaawa', a'in li rochoch li Qaawa'!

⁵ «Wi nekechaab'ilob'resi leeyu'am ut leeb'aanuhom; wi tiikaq leech'ool cherib'il eerib';

⁶ wi ink'a' chik teerahob'tesi li jalaneb' xtenamit, eb' li neb'a'yox ut eb' li xmalka'an, chi moko teekamsiheb' chik leeras eeriitz'in li maak'a'eb' xmaak, sa' li na'ajej a'in; wi ink'a' chik teeloq'oni ruheb' li jalanil yos li yookex wi' xsik'b'al li rahilal sa' eeb'een,

⁷ relik chi yaal naq texink'e chi wank sa' li na'ajej a'in, sa' li ch'och' ink'ehom chi junajwa reheb' leena' leeyuwa'.

⁸ «Ab'anan laa'ex nekepaab' li b'alaq'il aatin li maak'a' na'ok wi' cho'q eere.

⁹ Nekex'elq'ak, nekekamsi leeras eeriitz'in, nekexmuxuk sumlaak, nekexyehok jurament sa' tik'ti', nekexmayejak chiruheb' laj Bahal ut nekeloq'oni ruheb' li yos ink'a' eenawomeb' ru.

¹⁰ Chirix chik a'an nekexchalk arin sa' li wochoch li ninloq'oniik wi', ut nekeye: Kolb'ilo, sa wanko arin, chankex. Ut nekeb'aanu wi' chik chixjunil li maa'usilal a'an.

¹¹ Malaj nekek'oxla naq li ochoch nanimaak wi' link'ab'a', a'an rochocheb' laj elq'? Laa'in nink'e reetal jo'ch'inal jo'nimal li nekeb'aanu. Raatin li Qaawa'.

¹² «Ayuqex anaqwan aran Siló, sa' li na'ajej kiloq'oniik wi' wu najter, ut k'ehomaq reetal k'aru kinb'aanu re xb'aan li xmaa'usilaleb' laj Israel, lintenamit.

¹³ Naab'al sut xexinq'us chirix naq ink'a' us nekeb'aanu, a'ut laa'ex ink'a' xeraj wab'inkil; k'iila wa xexwaatina, ut ink'a' xineesume.

¹⁴ Jo'kan naq li ochoch a'in li nanimaak wi' link'ab'a', li kaw wi' leech'ool ut ink'ehom eere jo' ajwi' reheb' leena' leeyuwa', tinkanab' jo' kinkanab' li wochoch aran Siló.

¹⁵ Texwisi chi xnaq' wu jo' kinb'aanu junxil reheb' li ralal xk'ajoleb' laj Efraín, leerech'alal».

Eb' li yal k'oxlanb'il yos

¹⁶ “At Jeremías, mattijok chirix li tenamit a'in, mattz'aamank chiwu chi moko chat-elajinq chirixeb'. Maawelaji wu xb'aan naq moko tatwab'i ta.

¹⁷ Ma ink'a' nakak'e reetal li neke'xb'aanu sa'eb' li tenamit sa' xteepal Judá ut sa'eb' li b'e re Jerusalén?

¹⁸ Eb' li alal k'ajolb'ej neke'k'amok chaq li si', eb' li yuwa'b'ej neke'tz'ab'ok li xam ut eb' li ixaqilb'ej neke'k'uub'ank re li k'uluj re xmayejankil chiru li jalanil yos, a' li xNa' li choxa neke'xye re. Neke'xchiq' ajwi' injosq'il naq neke'uk'ak sa' xk'ab'a'eb' li jalanil yos.

¹⁹ Ma laa'in tab'i' yookeb' chinmajewankil? Ma ink'a' tab'i' a'aneb' ajwi' neke'xmajewa rib' ut chi jo'kan neke'xk'ut xxutaaneb'?

²⁰ Jo'kan naq li Qaawa' xye chi jo'ka'in: Twisi linjosq'il sa' xb'een li na'ajej a'in, sa' xb'eeneb' li xpoyanamil ut eb' li xul, sa' xb'eeneb' li che' ut eb' li awimq. Ut linjosq'il chanchanaq li choqlenk li ink'a' naru xchupb'al”, chan li Qaawa'.

Li tz'aqal paab'ank

²¹ Jo'ka'in ki'aatinak li Qaawa', li Nimajwal Yos, li xYos laj Israel, reheb' li xtenamit: “Yeechi'ihomaq ut k'atomaq chixjunil leemayej li teeraj, ut tzekahomaq li tib' a'an.

²² Ab'anan naq kiwisiheb' chaq leexe'toonil yuwa' aran Ejiipt, ink'a' kiwaatinaheb' chi moko kinchaq'rab'iheb' chirix li mayejak ut k'atok mayej.

²³ Li kinchaq'rab'iheb' wi' a'an a'in: «Paab'omaq li waatin; chi jo'kan laa'inaq leeYos ut laa'exaq lintenamit. K'amomaq li b'e tink'ut cheru, re naq junelik us tex'elq», chankin reheb'.

²⁴ Ab'anan ink'a' kine'xpaab' chi moko ke'raj wab'inkil, ke'xjipi chik rib' ut ke'xb'aanu li k'aru ke'raj xb'aanunkil. Ruuchil li chalk wik'in, intz'eqtaanankil chik ke'xb'aanu.

²⁵ “Chalen naq ke'elk chaq leena' leeyuwa' sa' li tenamit Ejiipt toj anaqwan, rajlal xintaqla eerik'in eb' li propeet, laj k'anjeleb' chiwu.

²⁶ A'ut laa'ex ink'a' xineepaab' chi moko xeraj wab'inkil, xejipi chik eerib' ut q'axal yib' wi' chik ru leena'leb' chiru leena' leeyuwa'.

²⁷ “Taaye reheb' chixjunil li aatin xinye aawe, a Jeremías, us ta ink'a' te'raj aawab'inkil. Jap aawe chi xb'oqb'aleb', us ta ink'a' tate'xsume.

²⁸ Ye reheb' chi jo'ka'in: «A'an a'in li tenamit li ink'a' xraj xpaab'ankil raatin li Qaawa' li xYos, chi moko xraj q'use'k. Maak'a' chik li tiikilal ut li yaal rik'ineb'; x'oso'k chi junwaakaj»”.

Rahil ch'oolejil sa' xTaq'ahil Ben-Hinón

²⁹ At Jerusalén, set li rismal laajolom ut kut chi najt. Ayu chi yaab'ak sa' xb'eeneb' li t'ojoch aj b'ool. Xb'aan naq li Qaawa' yo xjosq'il rik'ineb' laakomonil; xtz'eqtaanaheb' ut xkanab'eb' xjunes chi junajwa.

³⁰ Jo'ka'in kixye li Qaawa': “Eb' laj Judá xe'xb'aanu li ink'a' nawulak chiwu: xe'xk'am li xtz'i'b'eetal aj yos sa' linsantil ochoch ut xe'xsach xwankil li na'ajej nanimaak wi' link'ab'a'.

³¹ Sa' xTaq'ahil Ben-Hinón xe'xyiib' li tijob'aal re Tófet, re xyeechi'inkileb' li ralal xk'ajol cho'q k'atb'il mayej, li maajun wa inyehom reheb' chi moko xink'oxla b'ayaq a'an.

³² Jo'kan naq laa'in ninye chi jo'ka'in: Taawulaq xkutankil naq li na'ajej a'an ink'a' chik tixk'ab'a'in Tófet chi moko xTaq'ahil Ben-Hinón, tixk'ab'a'in b'an chik: xTaq'ahil li kamsink. Aran Tófet te'muqe'q eb' li kamenaq, xb'aan naq maak'a'aq chik na'ajej re muquk.

³³ Ut li xtib'eleb' li te'kamq taatiwe'q xb'aaneb' li so'sol jo'wi' eb' li josq' aj xul, ut maajun taaxib'enq reheb'.

³⁴ Tinsach li sahil ch'oolejil sa'eb' li tenamit re Judá ut sa'eb' li b'e re Jerusalén; ink'a' chik taa'ab'iiq li b'ichank na'uxk sa' xkutankil li sumlaak. Xb'aan naq nakirirnak taakanaaq chixjunil li na'ajej”.