Jeremías 5 - Q'eqchi Bible

Li xq'etb'a aatin Jerusalén

¹ “B'eenihomaq eb' li b'e re Jerusalén -chan li Qaawa'-, ilomaq chi us ut k'ehomaq reetal. Sik'omaq sa'atqeb' li ruq' b'e re rilb'al ma teetaw junaq winq li nab'aanunk li tiikilal ut naxsik' li yaal; ut tinkuy raj xmaak Jerusalén.

² Wankeb' neke'xpatz' xk'ab'a' li Qaawa' sa' jurament, ab'anan moko neke'xb'aanu ta li neke'xye”.

³ At Qaawa', ma ink'a' tab'i' a' li yaal nakasik'? Xarahob'tesiheb', ab'an maak'a' xe'reek'a; xasacheb' ru, ab'an ink'a' xe'raj xtawb'al xyaalal. Xe'xkawub'resi b'an li xch'ooleb' jo' li pek ut ink'a' xe'raj xjalb'al xna'leb'eb'.

⁴ Toja' naq xinye: “Relik chi yaal naq maak'a' neke'xnaw li ink'a' tzolb'ileb': ink'a' neke'xtaw ru li rajom li Qaawa' chi moko li xchaq'rab' li xYoseb'.

⁵ Tinxik rik'ineb' li ninqeb' xwankil ut twaatinaheb', xb'aan naq eb' a'an neke'xnaw li xb'e li Qaawa' ut tzolb'ileb' chi us sa' li xchaq'rab' li xYoseb'”. Ab'anan juntaq'eet ajwi' xwil aran: xe'xq'etq'eti ajwi' rib' a'an chiru li Qaawa' ut ink'a' xe'raj ab'ink.

⁶ Jo'kan naq te'kamsiiq xb'aaneb' li kaqkoj sa' k'iche' ut eb' laj xojb' te't'upinq reheb' sa' li chaqich'och'; sutsuuq li xtenamiteb' xb'aaneb' li hix, ut jo'k'ihaleb' li te'elq sa' li tenamit, te'putz'iiq. Xb'aan naq numtajenaq li maak xe'xb'aanu ut k'iila wa xe'xtz'eqtaana li Qaawa'.

⁷ “Chan ta naq tinkuy aamaak xb'aan a'an, a Jerusalén? -chan li Qaawa'-. Eb' laawalal aak'ajol xine'xtz'eqtaana ut a' chik li maawa' yos neke'xpatz' sa' jurament. Naq xink'eheb' chi tzekank toj reetal xe'nujak, intz'eqtaanankil chik xe'xb'aanu ut jun xikikeb' sa' rochochil li maa'usilal chi xmuxb'aleb' rib'.

⁸ Chanchaneb' laj k'ol kawaay ninqeb' xtib'el: li junjunq nakaano'k ru re xchapb'al li rixaqil li ras riitz'in.

⁹ Ma ink'a' tab'i' tink'eheb' chi xtojb'al rix li maak a'an? Ma ink'a' tink'ajtesi ru li tenamit li jo'kan naxb'aanu? -chan li Qaawa'-.

¹⁰ Okanqex sa' li tenamit ut sachomaq, ab'an moko teesach ta chi junajwa. Ka'ajwi' li ink'a' chaab'ileb' xch'ool teerisi, xb'aan naq moko weheb' ta.

¹¹ Laj Israel ut laj Judá relik chi yaal naq xine'xtz'eqtaana”, chan li Qaawa'.

Resilal li rahilal chaalel

¹² Ke'xyehatq naq maak'a' li Yos: “Maak'a' xwankil li Yos; maajun rahilal tqak'ul. Ink'a' taawanq raaxiik' chi moko we'ej.

^13-14 Eb' li propeet yal chanchaneb' li iq', xb'aan naq maak'a' li raatin li Qaawa' rik'ineb'. Chiq'apliiq ta sa' xb'eeneb' li k'aru neke'xye”, chankeb'. Jo'kan naq li Nimajwal Yos kixye we chi jo'ka'in: “Xb'aan naq xe'xye chi jo'kan, laa'in tink'e li waatin chi xtz'uumal aawe jo'kaq li xam; ut li tenamit a'in chanchanaqeb' li si' naq te'oso'q xb'aan li raq'xam”.

¹⁵ “Ex aj Israel -chan li Qaawa'-, laa'in tintaqla chaq chi yalok eerik'in jun tenamit li jwal najt wan chaq; q'axal kaweb' rib' ut najter winqeb'. Laa'ex ink'a' nekenaw li raatinob'aaleb' chi moko neketaw ru li neke'xye.

¹⁶ Chixjunileb' a'an jwal kaweb' rib', ut naq neke'kutuk chi simaj, maajun nakole'k.

¹⁷ Eb' a'an te'xtzeka ru leerawimq ut te'xchoy leewa leeruk'a'; a'aneb' ajwi' te'sachoq reheb' leeralal eek'ajol. Te'xtzeka eb' li karneer ut eb' li wakax, eb' lee'uub' jo'wi' eb' lee'iig. Te'xjuk'i leekawub'resinb'il tenamit li jwal nekekawu wi' leech'ool”.

¹⁸ “Ab'an chiruheb' li kutan a'an -chan li Qaawa'- toj maji' texinsach chi junajwa.

¹⁹ Ut naq te'xpatz' aawe: «K'a'ut naq li Qaawa' xb'aanu qe chixjunil a'in?», taaye reheb': «Jo' naq laa'ex xekanab' li Qaawa' re k'anjelak chiruheb' li jalanil yos sa' leena'aj, jo'kan ajwi' naq texk'anjelaq chiruheb' laj ab'l poyanam, sa' li na'ajej moko eere ta».

²⁰ “Ye li esil a'in reheb' li ralal xk'ajol laj Jakob ut k'e chi xnaweb' laj Judá:

²¹ «Ab'ihomaq li esil a'in, ex jip aj tenamit ut maak'a' eena'leb'! Wank xsa' leeru, ab'an maak'a' nekeril; wank leexik, ut ink'a' nekex'ab'ink.

²² Ma ink'a' nekexiwa wu laa'in? -chan li Qaawa'-. Ma ink'a' teesiksiki eerib' xb'aan eexiw chiwu? Laa'in kink'e li samahib' cho'q xramleb' li palaw, a'an jun nub'ajl li ink'a' naru xq'axb'al. Us ta te'wakliiq li xkawil oq li ha' ut kaw te'eek'anq, ab'an ink'a' te'nume'q sa' xb'een.

²³ Ab'an li tenamit a'in a'an aj b'alaq', jip li xch'ool ut q'etq'et; xine'xtz'eqtaana ut xkoheb'.

²⁴ Ink'a' x'alaak b'ayaq sa' xch'ooleb' xyeeb'al: Qaxiwaaq ru li Qaawa' li qaYos li naxtaqla chaq li hab' sa' xq'ehil; ut ak xaqxo li kutan li naqaxok wi' ru li awimq.

²⁵ Xb'aan leemaa'usilal naq xjalaak ru chixjunil a'in; a' leemaak laa'ex xnajtob'resink eere rik'in li sahil wank.

²⁶ Sa' lintenamit wankeb' winq ink'a' useb' xna'leb' li junelik yookeb' chi luktesink ch'oolej, chanchan tawi' naq yookeb' chi ra'lenk xik'anel xul; ab'an a'eb' chik li winq neke'xluktesi xch'ooleb'.

²⁷ Chanchan naq nujenaq chi xik'anel xul li xra'aleb', jo'kan naq li rochocheb' nujenaq chi k'a'aq ru elq'anb'il; xe'ninqank xwankil ut xe'b'ihomo'k,

²⁸ ninqeb' li xtib'eleb' ut kaweb' rib'. K'ajo' naq xe'numtaak chi b'aanunk maa'usilal: ink'a' neke'xkol rix li neb'a'yox sa' li raqb'a aatin chi moko neke'xk'e li xk'ulub' li neb'a'.

²⁹ Ma ink'a' tab'i' tinraqoq aatin chirix chixjunil a'an? Ma ink'a' tink'e reeqaj a'an re li tenamit a'in li jo'kan neke'xb'aanu?

³⁰ Jwal xiw xiw ut tz'i'b'eetal li k'aru yo chi k'ulmank sa' li na'ajej a'in.

³¹ Junes tik'ti' neke'xye eb' li propeet, eb' laj tij neke'xb'aanu li neke'raj xch'ooleb', ut lintenamit jo'kan neke'wulak chiruheb'! K'a' chik ru teeb'aanu naq toxraqe'q chixjunil a'in?»”.