Jeremías 47 - Q'eqchi Bible

Li rahilal te'xk'ul eb' laj Filistea

¹ A'an a'in li aatin kixye li Qaawa' re laj Jeremías, li propeet, chirixeb' laj Filistea, naq toj maji'aq na'eechaniik Gasa xb'aan laj Parahón.

² Li Qaawa' kixye re chi jo'ka'in: “Sa' xjayal releb'l iq' xe'chalk chaq eb' laj Babilonia jo'eb' chaq li b'ut'iha'; nab'ut'unk li na'ajej jo'wi' chixjunil li wank chisa', naxsacheb' li tenamit ut eb' li xpoyanamil. Japaqeb' re xb'aan li rahilal chixjunileb' li poyanam, ut yalaq b'ar te'yaab'aq li tenamit.

³ Naq taa'ab'iiq xyaab' li roqeb' li kawaay ut tz'aapixikaq xyaab'eb' li xsuriil eb' li b'eleb'aal ch'iich', eb' li yuwa'b'ej ink'a' chik te'rileb' li xkok'al xb'aan naq maak'a'aq chik xmetz'eweb'.

⁴ Xwulak xkutankil xsachb'al ruheb' laj Filistea, naq te'oso'q chixjunileb' li neke'tenq'ank re Tiro ut Sidón”. Li Qaawa' tixjuk' xwankileb' laj Filistea, li jo'k'ihaleb' ke'chalk Kreta, chire li palaw.

⁵ Eb' laj Gasa te'xjo xjolomeb' xb'aan li rahilal ut mem te'kanaaq eb' laj Askalón. Ut laa'ex li rela' eb' li winq ninqeb' xteram, toj jo'q'e teekanab' xlet'exinkil ru leetib'el?

⁶ At xch'iich' li Qaawa', toj jo'q'e tatch'anaaq chi kamsink? Ch'ik wi' chik aawib' sa' laawochoch, hilan b'ayaq ut wanqat sa' xyaalal.

⁷ Ab'anan, chanru naq taach'anaaq wi li Qaawa' xtaqlank re chi xsachb'al Askalón jo'wi' chixjunileb' li poyanam wankatqeb' chire li palaw?