Jeremías 45 - Q'eqchi Bible

Li Qaawa' kixk'e xkawub' xch'ool laj Baruk

¹ A'an a'in li aatin kixye laj Jeremías re laj Baruk, ralal laj Nerías, naq a'in kixtz'iib'a sa' li b'otb'ookil hu chixjunil li kiyehe'k re, sa' li xka chihab' chi awab'ejink laj Johakín, ralal laj Josías, ut awab'ej re Judá:

^2-3 “At Baruk, laa'at xaye naq jwal toq'ob'aal aawu ut junes xrahil laach'ool naxk'e li Qaawa', li xYos laj Israel. Xaye ajwi' naq lub'luukat chi yaab'ak ut maak'a' chik junaq xsahil laawaanm nakataw.

⁴ Ab'an li Qaawa' xye li aatin a'in chawix ut xinxtaqla chaq chi xnumsinkil aawe: «Laa'in tinjuk' li k'aru xinkab'la, ut tinmich' li xwaw; ut a'in tinb'aanu re chixjunil li ruuchich'och'.

⁵ Maak'a' aj e naq yookat xsik'b'al xnimal aawankil. Maasik' chik, xb'aan naq ok we chi xtaqlankil xninqal rahilal sa' xb'eeneb' chixjunileb' li poyanam. A'ut laa'at tinkol laayu'am, a' yaal b'ar tatxik. Laa'in, li Qaawa', ninyehok re a'in»”.