Jeremías 44 - Q'eqchi Bible

Xq'usb'aleb' laj Judiiy naq ink'a' te'loq'oninq jalanil yos

¹ A'an a'in li kiyehe'k re laj Jeremías chirixeb' laj Judiiy li wankeb' chaq Ejiipt, sa'eb' li tenamit re Mikdol, Tafnes, Menfis ut li wankatqeb' chaq sa' xteepal Patros:

² “Jo'ka'in xye li Nimajwal Yos, li xYos laj Israel: «Laa'ex xeril rik'in leeru chixjunil li rahilal kinb'aanu re Jerusalén ut sa' chixjunileb' li tenamit sa' xteepal Judá. Anaqwan po'lem aj chik, maajun chik wank aran,

³ xb'aan naq ke'xchiq' injosq'il rik'in li maa'usilal ke'xb'aanu, naq ke'ok chi xloq'oninkileb' li jalanil yos, li ink'a' xnawomeb' ru eb' a'an, chi moko laa'ex malaj eb' leexe'toonil yuwa'.

⁴ «Laa'in junelik kink'e inch'ool chi xtaqlankileb' chaq eerik'in linpropeet, aj k'anjeleb' chiwu, re xyeeb'al eere naq meeb'aanu li tz'i'b'eetalil na'leb' li ink'a' nawulak chiwu.

⁵ Ab'anan ink'a' kineepaab' chi moko keraj wab'inkil; ink'a' kekanab' leemaa'usilal, tik kex'ok b'an chik chi mayejank k'ajpom chiruheb' li jalanil yos.

⁶ Jo'kan naq kilochk xxamlel linjosq'il ut q'axal kinjosq'o'k sa' xb'eeneb' li tenamit re Judá ut sa'atqeb' li b'e re Jerusalén. Ke'juk'mank ut nakirirnak ke'kanaak chalen toj anaqwan.

⁷ «Jo'kan utan, laa'in li Nimajwal Yos, li xYos laj Israel, ninye chi jo'ka'in: K'a'ut naq nekeb'oq li nimla rahilal a'in sa' eeb'een? K'a'ut naq nekek'e chi kamk chixjunileb' laj Judá, eb' li winq ut eb' li ixq, eb' li saaj al ut eb' li k'uula'al, toj reetal naq maajun chik eere tkanaaq?

⁸ K'a'ut naq nikineemajewa rik'in li k'aru nekeb'aanu, naq nekemayeja li k'ajpom chiruheb' li jalanil yos arin Ejiipt, b'arwi' kexchalk chi na'ajunk, yal re naq tinsach eeru ut tz'eqtaananb'ilaqex ut xutaanalaqex cho'q reheb' chixjunil li tenamit sa' ruuchich'och'?

⁹ Ma xsachk sa' eech'ool li maak ke'xb'aanu eb' leexe'toonil yuwa', jo'wi' eb' li awab'ej re Judá ut eb' li rixaqileb'? Ma xsachk sa' eech'ool leemaa'usilal laa'ex ut li xmaakeb' leerixaqil li keb'aanu sa' xteepal Judá ut sa'atqeb' li b'e re Jerusalén?

¹⁰ Ab'anan, chalen toj anaqwan, toj maji' nayot'e'k eech'ool chi moko nekexxiwak b'ayaq; tik ink'a' nekeb'aanu jo' naxye li waatin chi moko linchaq'rab' ink'ehom eere laa'ex ut reheb' leena' leeyuwa'.

¹¹ «Jo'kan naq laa'in li Qaawa', li xYos laj Israel, ninye chi jo'ka'in: K'ehomaq reetal, tintaqla chaq li rahilal sa' eeb'een, re xsachb'al ru chixjunil Judá.

¹² Ut eb' laj Judá li xe'xk'e xch'ool chi xik chi na'ajunk Ejiipt, aran te'oso'q chixjunileb'. Te'kamsiiq sa' li raaxiik' ut xb'aan li we'ej: jo' kok' jo' ninq te'kamq chixjunileb' xb'aan li q'esnal ch'iich' ut li we'ej. Te'majewaaq ut te'kanaaq cho'q se'leb'aal; xiwajelaq ut xutaanalaq rilb'aleb'.

¹³ Laa'in tinrahob'tesiheb' li wankeb' chaq Ejiipt jo' naq kinrahob'tesiheb' laj Jerusalén, rik'in raaxiik', we'ej ut raxkamk.

¹⁴ Maajun reheb' li xch'inach'uuteb' laj Judá li xkoheb' chi wank sa' xteepal Ejiipt, te'kole'q. Us ta raj te'sutq'iiq chaq wi' chik Judá, ink'a' te'ruuq sutq'iik; yal wiib' oxib'eb' aj chik te'eleliq ut te'sutq'iiq chaq»”.

¹⁵ Toja' naq jo'k'ihaleb' li neke'xnaw naq li rixaqileb' neke'k'atok k'ajpom chiruheb' li jalanil yos, chixjunileb' li ixq ch'utch'uukeb' aran jo'wi' chixjunileb' li wankatqeb' chaq Patros, sa' xteepal Ejiipt, ke'xye re laj Jeremías:

¹⁶ “Ink'a' tqapaab' li k'aru xaye qe sa' xk'ab'a' li Qaawa',

¹⁷ tqab'aanu b'an chixjunil li wank sa' qach'ool xb'aanunkil. Toj yooqo chi xmayejankil k'ajpom ut b'iin chiru li xNa' li choxa, jo' naqab'aanu chalen toj anaqwan, jo' ke'xb'aanu chaq eb' li qana' qayuwa', eb' li awab'ej ut eb' li xjolomileb' li qatenamit sa' xteepal Judá ut sa'atqeb' li b'e re Jerusalén. Xb'aan naq junxil chaq k'ajo' li qatzekemq, jwal us koowank ut maajun rahilal kiqataw.

¹⁸ Ut chalen naq kiqakanab' xmayejankil li k'ajpom ut li b'iin chiru li xNa' li choxa, maak'a' chik wank qe ut eb' li poyanam yookeb' chi kamk xb'aan li we'ej malaj xb'aan li raaxiik'”.

¹⁹ Eb' li ixq ke'xye ajwi': “Naq laa'o xooyiib'ank k'uluj sa' xk'ab'a' li xNa' li choxa, ut xooyeechi'ink k'ajpom ut b'iin chiru a'an, ma xoomayejak tab'i' chi ink'a' ta neke'xnaw eb' li qab'eelom? Ut toj yooqo ajwi' chi xb'aanunkil a'an”, chankeb'.

²⁰ Toja' naq laj Jeremías kixye reheb' chixjunileb' li winq ut ixq li ke'aatinak chi jo'kan:

²¹ “Ma ink'a' tab'i' naxnaw li Qaawa' malaj naxk'e reetal naq laa'ex jo'wi' eb' leena' leeyuwa', eb' li awab'ej, eb' li xjolomileb' li tenamit ut chixjunileb' li wankeb' sa' li ruuchich'och', xexyeechi'ink k'ajpom chiruheb' li jalanil yos sa'eb' li tenamit re Judá ut sa'atqeb' li b'e re Jerusalén?

²² Ab'an li Qaawa' ink'a' chik naxkuy leemaak ut li jo'maajo'il b'aanuhom li ink'a' nawulak chiru; jo'kan naq leena'aj nakirirnak aj chik ut maajun chik wank aran; majewanb'il aj chik ut q'axal xiwajel ru anaqwan.

²³ Chixjunil li rahilal li yookex chi xk'ulb'al chiruheb' li kutan a'in, xchalk sa' eeb'een xb'aan naq xexmayejank k'ajpom chiruheb' li jalanil yos, xexmaakob'k chiru li Qaawa' ut ink'a' xex'ab'ink chiru, chi moko xexwank jo' naxye li raatin, li xtaqlahom ut li xchaq'rab'”.

²⁴ Laj Jeremías kixye ajwi' reheb' li tenamit, jo'eb' ajwi' li ixq: “Ab'ihomaq li raatin li Qaawa', chejunilex laa'ex aj Judá li wankex Ejiipt.

²⁵ Li Nimajwal Yos, li xYos laj Israel, naxye chi jo'ka'in: «Laa'ex ut eb' leerixaqil xeye rik'in xtz'uumal eere, ut rik'in leeruq' xeb'aanu li k'aru xeye: Tento tqab'aanu chi tz'aqal re ru li qayeechi'om naq toomayejanq k'ajpom ut b'iin chiru li xNa' li choxa, chankex. Us b'i', paab'omaq leeyeechi'om ut b'aanuhomaq chi junpaat!

²⁶ Ab'anan ab'ihomaq li raatin li Qaawa', chejunilex laa'ex aj Judá li wankex Ejiipt: Laa'in, li Nimajwal Yos, ninye eere chi tz'aqal yaal naq maajun wa chik taapatz'manq link'ab'a' arin xb'aan junaq aj Judá; maajun chik tixye sa' xsutam Ejiipt: Sa' xk'ab'a' li Qaawa'!, cha'aq.

²⁷ K'ehomaq reetal naq yooqin rilb'aleb' re xtaqlankil li rahilal sa' xb'eeneb' ut maawa' re rusilankileb'. Chixjunileb' laj Judá li wankeb' sa' xteepal Ejiipt te'sache'q ru xb'aan li raaxiik' ut li we'ej, toj reetal naq maajun chik tkanaaq.

²⁸ Ka'ajeb' wi' wiib' oxib' li te'kole'q sa' li raaxiik'; te'elq Ejiipt ut te'sutq'iiq wi' chik Judá. Toja' naq chixjunileb' laj Judá li ke'chalk chi na'ajunk Ejiipt, te'xnaw ani aj aatin xtz'aqlok ru, ma a' li waatin laa'in, malaj li raatineb' a'an.

²⁹ Ut a'an a'in li reetalil naq taak'ulmanq li xinye, ut naq texinrahob'tesi sa' li tenamit Ejiipt -chan li Qaawa'-:

³⁰ Laa'in tinq'axtesi laj Parahón Hofra xk'ab'a', li awab'ej re Ejiipt, sa' ruq'eb' li xik' neke'ilok re, li te'ajoq xkamsinkil. Jo' naq kinq'axtesi laj Sedesías, li awab'ej re Judá, sa' ruq' li xik' na'ilok re, a' laj Nabukodonosor, li awab'ej re Babilonia, jo'kan ajwi' tinb'aanu re laj Hofra»”.