Jeremías 41 - Q'eqchi Bible

Ke'xkamsi laj Kedalías

¹ Sa' xwuq li po laj Ismael, ralal laj Natanías ut ri laj Elisamá, xkomon li awab'ej, koho rochb'een lajeeb' chi winq chi rula'aninkil laj Kedalías, aran Mispá. Ut naq yookeb' chi wa'ak sa' komonil,

² laj Ismael, ralal laj Natanías, rochb'eeneb' li lajeeb', ke'wakliik ut ke'xkamsi laj Kedalías, ralal laj Ajikán ut ri laj Safán, li kixaqab'aak chi xjolominkileb' laj Judá xb'aan li awab'ej re Babilonia.

³ Laj Ismael kixkamsiheb' ajwi' chixjunileb' laj Judá ut eb' laj puub' aj Kaldeha li wankeb' Mispá rochb'een laj Kedalías.

⁴ Eweraq chik li xkamik laj Kedalías, naq toj maajun nanawok re,

⁵ ke'wulak kaak'aal chi winq aj Sikem, aj Siló ut aj Samaria. Job'il chaq li xmacheb', q'ichilkeb' li raq' ut k'ajo' xtiq'ilaleb'. Ke'xk'am chaq li ru eb' li awimq ut li k'ajpom re xyeechi'inkil sa' rochoch li Yos.

⁶ Toja' naq laj Ismael, ralal laj Natanías, ki'elk Mispá; yo chi yaab'ak sa' b'e naq koho chi xk'ulb'aleb', ut kixye reheb': “Kimqex chi rilb'al laj Kedalías, ralal laj Ajikán”, chan.

^7-9 Ab'an ka'ajwi' ke'wulak sa' xyi li tenamit, laj Ismael rochb'eeneb' li xkomon ke'xtikib' xkamsinkileb' li ula' ut xkutb'aleb' sa' jun tamb'aha'. A'an ajwi' li tamb'aha' kixyiib' laj Asá li awab'ej, re xkolb'al rib' chiru laj Basá, li awab'ej re Israel. Jwal nim li tamb'aha' a'an, ut kinujak rik'ineb' li winq li kixkamsi laj Ismael. Toja' naq lajeeb' sa' xyanqeb' li xkaak'aal chi winq ke'xye re laj Ismael: “Moohaakamsi! Wank qatriiw, qaseb'aad, qa'aseeyt ut qaya'al kab' muqmu chaq sa' k'aleb'aal”, chankeb' re. Ut sa' xk'ab'a' a'an laj Ismael ink'a' kixkamsiheb', jo' kixb'aanu reheb' li rochb'eeneb'.

¹⁰ Moqon kixchapeb' li xrab'ineb' li awab'ej jo'wi' eb' li poyanam toj wankeb' Mispá, a'eb' li ke'k'ehe'k chi ril laj Kedalías, ralal laj Ajikán, xb'aan laj Nabusaradán, xjolomileb' laj k'aak'alenel; kixchapeb' ut ki'ok xk'amb'aleb' sa' xteepaleb' laj Amón.

¹¹ Naq laj Jwan, ralal laj Kareha, ut eb' li xjolomileb' laj puub' ke'rab'i resil li ink'a' us kixb'aanu laj Ismael, ralal laj Natanías,

¹² ke'xch'utub' chixjunileb' laj puub' ut koheb' chi yalok rik'in laj Ismael, ralal laj Natanías. Koxe'xtaw chire li ha' wank Gabahón.

¹³ K'ajo' naq ke'saho'k sa' xch'ool chixjunileb' li poyanam li ke'chape'k xb'aan laj Ismael, naq ke'ril ru laj Jwan, ralal laj Kareha, jo'wi' eb' li xjolomileb' laj puub' li wankeb' rochb'een.

¹⁴ Ke'sutq'iik chirixeb' ut koheb' rik'in laj Jwan, ralal laj Kareha.

¹⁵ Ab'anan laj Ismael, rochb'een waqxaqib'eb' chi winq, ke'elelik chiru laj Jwan ut koheb' sa' xteepaleb' laj Amón.

¹⁶ Laj Jwan, ralal laj Kareha, rochb'een chixjunileb' li xjolomileb' laj puub', ke'xch'utub'eb' laj puub', eb' li ixq, eb' li kok'al ut li ninqeb' xwankil li ke'sutq'iik chaq Gabahón ut ke'chape'k xb'aan laj Ismael aran Mispá, chirix naq ak xkamsi laj Kedalías.

¹⁷ Ke'xchap xb'eheb' ut koxe'hilanq Kerut-Kinan, li wank nach' rik'in Belén. Li rajomeb' a'an: naq te'xik Ejiipt

¹⁸ re elk chiruheb' laj Kaldeha, xb'aan naq k'ajo'eb' xxiw. Ke'ok xxiw xb'aan naq laj Ismael, ralal laj Natanías, kixkamsi laj Kedalías, ralal laj Ajikán, li kixaqab'aak xwankil chi xjolominkileb' laj Judá xb'aan li awab'ej re Babilonia.