Jeremías 40 - Q'eqchi Bible

Laj Jeremías ki'isiik sa' tz'alam

¹ Naq laj Jeremías ki'isiik sa' tz'alam xb'aan laj Nabusaradán, xjolomileb' laj k'aak'alenel, aran Ramá, li Qaawa' ki'aatinak rik'in. B'ak'b'o chi kareen naq ke'xtaw li propeet sa' xyanqeb' chixjunileb' laj Jerusalén ut eb' laj Judá li yookeb' xk'amb'al Babilonia.

² Li xjolomileb' laj k'aak'alenel kirisi xjunes laj Jeremías ut kixye re: “Li Qaawa' laaYos ak xyehom resil li rahilal a'in sa' xb'een li na'ajej a'in,

³ ut xb'aanu ajwi' jo' chanru xye. Ut a'in xk'ulmank xb'aan naq xexmaakob'k chiru li Qaawa' ut ink'a' xepaab' li raatin.

⁴ K'e reetal, anaqwan laa'in twisi chawuq' eb' li ch'iich' b'ak'b'ookat wi'. Wi taawaj, tatxik chiwix Babilonia ut laa'in tin'iloq aawe; ab'an wi ink'a' tixk'ul aach'ool, kanaaqat. Wank chawu chixjunil li ch'och' ut naru tatkanaaq b'arwi' taawaj malaj taawulaq chawu li wank.

⁵ Ab'anan wi ink'a' taawaj wank wik'in, ayu sa' rochoch laj Kedalías, ralal laj Ajikán ut ri laj Safán, li xxaqab'aak chi xjolominkil li tenamit Judá xb'aan li awab'ej re Babilonia, ut wankat sa' rochoch, sa' xyanqeb' laawech tenamitul. Wanqat b'arwi' tixk'ul laach'ool”. Chirix chik a'an laj Nabusaradán, xjolomileb' laj k'aak'alenel, kixk'e xtzekemq ut xsimaatan; toja' naq kixchaq'rab'i.

⁶ Ut laj Jeremías koho sa' rochoch laj Kedalías, ralal laj Ajikán, aran Mispá, ut aran kina'ajunk sa' xyanqeb' li poyanam li ke'kanaak sa' xteepal Judá.

Ke'xk'uub' xkamsinkil laj Kedalías

⁷ Chixjunileb' li xjolomileb' laj puub' aj Judiiy li wankeb' chaq sa' k'iche', ke'rab'i naq laj Nabukodonosor, li awab'ej re Babilonia, kixxaqab' laj Kedalías, ralal laj Ajikán ut ri laj Safán, chi xjolominkil li tenamit ut kixkanab'eb' sa' ruq' eb' li q'axal neb'a', a'eb' li winq, eb' li ixq ut eb' li kok'al li ink'a' ke'k'ame'k Babilonia;

⁸ jo'kan naq koheb' toj Mispá chi rilb'al laj Kedalías. A'aneb' a'in li xk'ab'a'eb': laj Ismael, ralal laj Natanías; laj Jwan ut laj Jonatán, ralaleb' laj Kareha; laj Seraías, ralal laj Tanjumet; eb' li ralal laj Efay, Netofá xtenamit; ut laj Jasanías, ralal jun li winq aj Mahaká, ut chixjunileb' li wankeb' rochb'een.

⁹ Laj Kedalías, ralal laj Ajikán ut ri laj Safán, kixye reheb' sa' jurament: “Mexxiwak chi k'anjelak chiruheb' laj Kaldeha. Kanaaqex sa' li tenamit, k'anjelanqex chiru li awab'ej re Babilonia, ut us wanqex.

¹⁰ Laa'in tinkanaaq arin Mispá ut tin'okenq cherix naq eb' laj Kaldeha te'chalq chi qula'aninkil. Laa'ex naru texkanaaq arin chi xxokb'al ru li uub', li triiw ut li oliiw. K'uulahomaq chi chaab'il ut kanaaqex sa'eb' li tenamit xereechani”.

¹¹ Jo'kaneb' ajwi' eb' laj Judiiy li wankeb' chaq Mohab, Amón, Edom ut sa'atqeb' chixjunil li tenamit ke'xnaw naq li awab'ej re Babilonia kixkanab'eb' laj Judiiy chi wank sa' li xna'ajeb'; ke'xnaw ajwi' naq laj Kedalías kixaqab'aak chi xjolominkileb'.

¹² Jo'kan naq ke'sutq'ije'k chaq sa'eb' li jalan jalanq chi tenamit b'arwi' ke'cha'cha'iik, ut ke'chalk rik'in laj Kedalías aran Mispá, sa' xteepal Judá. Ut eb' a'an ke'k'uulank ajwi' b'iin ut ruheb' li awimq chi q'axal yo'oon.

¹³ Toja' naq laj Jwan, ralal laj Kareha, ut chixjunileb' li xjolomileb' laj puub' li wankeb' chaq sa' k'iche', ke'chalk rik'in laj Kedalías aran Mispá

¹⁴ ut ke'xye re: “Ma ink'a' nakanaw naq laj Bahalís, li awab'ej re Amón, xtaqla chaq laj Ismael, ralal laj Natanías, chakamsinkil?”. Ab'an laj Kedalías, ralal laj Ajikán, ink'a' kixpaab'.

¹⁵ Toja' naq laj Jwan, ralal laj Kareha, kixye re laj Kedalías sa' hasb' aran Mispá: “Laa'in tinxik anaqwan ut toxinkamsi chaq laj Ismael, ralal laj Natanías, ut maajun taanawoq ani xkamsink re. K'a'ut naq tqakanab' laj Ismael re naq tatxkamsi laa'at? Wi tatkamsiiq, te'xcha'cha'i wi' chik rib'eb' laj Judiiy li xule'xch'utub' rib' aawik'in, ut te'oso'q li rela'eb' laj Judá”.

¹⁶ Ab'an laj Kedalías, ralal laj Ajikán, kixye re laj Jwan, ralal laj Kareha: “Maab'aanu a'an. Li nakaye chirix laj Ismael, moko yaal ta”.