Jeremías 39 - Q'eqchi Bible

Xsachik li tenamit Jerusalén

¹ Ak b'eleeb' po re li xlaje chihab' rokik laj Sedesías cho'q awab'ej re Judá, laj Nabukodonosor, li awab'ej re Babilonia, kichalk rochb'een chixjunileb' laj puub' re xsachb'al ru Jerusalén, ut ke'xsut rix li tenamit.

² Ak b'eleeb' kutan xb'e li xka po re li xjunlaju chihab' rokik laj Sedesías cho'q awab'ej, eb' laj Kaldeha ke'xte jun li okeb'aal sa' li xsuttz'akil li tenamit,

³ ut chixjunileb' li xninqal ru winq re laj Nabukodonosor ke'ok ut koxe'kanaaq chire li Nimla Okeb'aal. A'aneb' laj Nerkal-Saréser, laj Sankar-Nebo, laj Sarsekín, xnimal ru aj jolominel, laj Nerkal-Saréser jun chik, nim ajwi' xwankil, ut chixjunileb' li xkomoneb' li xninqaleb' ru winq re li awab'ej re Babilonia.

⁴ Naq laj Sedesías, li awab'ej re Judá, ut chixjunileb' laj puub' ke'ril li yo chi k'ulmank, ke'elelik chiru q'oqyink sa' li tenamit, sa' xb'ehil li rawimq li awab'ej; ke'nume'k sa' xyanqeb' li suttz'ak ut ke'xchap xb'e re xik Arabá.

⁵ Ab'an eb' laj puub' aj Kaldeha ke'raanilasiheb' ut koxe'xtaw laj Sedesías sa' xtaq'ahil Jerikó. Ke'xchap ut ke'xk'am rik'in laj Nabukodonosor toj Riblá, sa' xteepal Jamat. Aran laj Nabukodonosor kixraq aatin sa' xb'een.

⁶ Chiru ajwi' laj Sedesías ke'ch'ote'k chi xkuxeb' li ralal xk'ajol, rochb'eeneb' chixjunileb' li xninqal ru winq aj Judá.

⁷ Ut laj Sedekías ki'isiik xsa'eb' li ru ut kik'ame'k Babilonia chi b'ak'b'o rik'in wiib' kareen q'anch'iich'.

⁸ Eb' laj Kaldeha ke'xk'at li rochoch li awab'ej jo' ajwi' li rochocheb' li poyanam, ut ke'xjuk' li xsuttz'akil Jerusalén;

⁹ ut eb' li poyanam li ke'kanaak sa' li tenamit ut eb' li ke'q'axonk sa' xyanqeb' laj Kaldeha jo'wi' chixjunileb' laj pak'onel ke'k'ame'k Babilonia xb'aan laj Nabusaradán, xjolomileb' laj k'aak'alenel.

¹⁰ Ab'anan eb' li jwal neb'a'eb', eb' li maak'a' wank reheb', laj Nabusaradán kixkanab'eb' sa' xteepal Judá, ut sa' ajwi' li kutan a'an kixk'eheb' rawimq uub' ut xk'aleb'aaleb'.

¹¹ Laj Nabukodonosor, li awab'ej re Babilonia, kixchaq'rab'i laj Nabusaradán, xjolomileb' laj k'aak'alenel, chirix li k'aru taakanaaq wi' laj Jeremías, ut kixye re:

¹² “K'am li propeet ut taawil chi us; maab'aanu junaq rahilal re, chab'aanu b'an li k'aru tixye aawe a'an”.

¹³ Toja' naq laj Nabusaradán, xjolomileb' laj k'aak'alenel, rochb'een laj Nerkal-Saréser, xnimal ru aj jolominel, ut chixjunileb' li ninqeb' xwankil sa' x'awab'ejilal laj Nabukodonosor

¹⁴ ke'xtaqla risinkil laj Jeremías chiru xneb'aalil li rochocheb' laj k'aak'alenel ut ke'xq'axtesi re laj Kodolías, ralal laj Ajikán, ri laj Safán, re naq taak'ame'q wi' chik sa' li rochoch. Jo'kan naq li propeet kikanaak sa' xyanqeb' li wankeb' Jerusalén.

¹⁵ Naq tz'aptz'o laj Jeremías chiru xneb'aalil li rochocheb' laj k'aak'alenel, li Qaawa' ki'aatinak rik'in ut kixye re:

¹⁶ “Ohat ut ye re laj Ebedmélek, aj Etiopía: «Jo'ka'in xye li Nimajwal Yos, xYos laj Israel: Ok we chi xb'aanunkil li xinye chirix li tenamit a'in, re xrahob'tesinkil ut maawa' re rusilankil ru. Ut laa'at taawil rik'ineb' laawu sa' li kutan a'an.

¹⁷ Ab'an naq taak'ulmanq a'an, laa'in tatinkol re naq ink'a' tatq'axtesiiq sa' ruq'eb' li q'axal nakaxiwaheb' ru.

¹⁸ Laa'in tinkoloq aawe chiru li kamk, ut laa'at tatkanaaq chi yo'yo xb'aan naq k'ojk'o laach'ool wik'in», chan li Qaawa'”.