Jeremías 34 - Q'eqchi Bible

Li rahilal tixk'ul laj Sedesías

¹ Naq laj Nabukodonosor, li awab'ej re Babilonia, rochb'eeneb' laj puub' ut chixjunileb' li tenamit li wankeb' rub'el xwankil sa' ruuchich'och', yookeb' chi yalok rik'ineb' laj Jerusalén ut rik'ineb' chixjunil li tenamit wankeb' chi xsutam, li Qaawa' ki'aatinak rik'in laj Jeremías ut kixye re:

² “Laa'in, li Qaawa' ut xYos laj Israel, nakatintaqla chi xyeeb'al re laj Sedesías, awab'ej re Judá: «Jo'ka'in xye li Qaawa': Laa'in tinq'axtesi li tenamit a'in sa' ruq' li awab'ej re Babilonia re naq tixk'at.

³ Ut laa'at ink'a' tatkole'q chiru: relik chi yaal naq tate'xchap ut tatq'axtesiiq sa' ruq'; ut naq akaq xawil rik'in aawu li awab'ej re Babilonia ut xex'aatinak cherib'il eerib', tatk'ame'q sa' li tenamit a'an.

⁴ At Sedesías, awab'ejat re Judá, ab'i li ninye aawe laa'in li Qaawa': Ink'a' tatkamq chi q'esnal ch'iich',

⁵ tatkamq b'an sa' tuqtuukilal. Jo' naq kik'atmank li sununkil b'an sa' xb'eeneb' laana' laayuwa' li ke'awab'ejink xb'enwa chawu laa'at, jo'kan ajwi' naq te'xk'at sa' aab'een ut te'xye: Xkamk li qa'awab'ej, cha'qeb'. Laa'in, li Qaawa', ninyehok re a'in»”.

⁶ Laj Jeremías, li propeet, kixye chixjunil a'in re laj Sedesías, awab'ej re Judá, aran Jerusalén,

⁷ naq eb' laj puub' re li awab'ej re Babilonia yookeb' chaq chi yalok rik'in Jerusalén ut rik'in Lakix ut Aseká, a'aneb' li kawub'resinb'il tenamit sa' xteepal Judá li toj maji' neke'sachmank.

Xkolb'aleb' laj Judá li wankeb' chi munil

⁸ Li Qaawa' ki'aatinak rik'in laj Jeremías, naq laj Sedesías kixk'e rib' sa' aatin rik'in chixjunileb' laj Jerusalén, re naq te'xkanab' chi ach'ab'anb'il eb' li xmuneb'.

⁹ Chixjunileb' laj Judá li wankeb' cho'q xmun junaq rech tenamitul, a' yaal ma winq malaj ixq, tento rach'ab'ankil.

¹⁰ Chixjunileb' li xjolomileb' li tenamit ut chixjunileb' li poyanam li ke'xk'ulub'a ru li aatin a'in, ke'xkanab' chi ach'ab'anb'il li xmuneb' ut ink'a' chik ke'xmin ruheb' chi k'anjelak chiruheb'.

¹¹ Ab'anan, ra wi' chik ke'reek'a naq jo'kan ke'xb'aanu, ut ke'roksiheb' wi' chik cho'q xmuneb' li winq ut li ixq aj Judá li ak xkanab'ahomeb' chi ach'ab'anb'il.

¹² Toja' naq li Qaawa' ki'aatinak rik'in laj Jeremías ut kixye re:

¹³ “Laa'in, li Qaawa', xYos laj Israel, kink'ojob' jun Sumwank rik'ineb' leena' leeyuwa' naq kiwisiheb' chaq Ejiipt, b'arwi' ke'wank chaq chi munil. Ut kinye reheb':

¹⁴ Rajlal wuqub' chihab' chejunilex teekanab' chi ach'ab'anb'il leeras eeriitz'in aj Hebreo. Li junjunq aj Hebreo li xk'ayi rib' cheru taak'anjelaq waqib' chihab' cho'q eemun, ut chirix a'an taawanq chi ach'ab'anb'il, chankin. A'ut eb' leena' leeyuwa' ink'a' kine'xpaab' chi moko ke'raj wab'inkil.

¹⁵ Anaqwan laa'ex xeyot' leech'ool xejal leek'a'uxl ut xeb'aanu li nawulak chiwu: xekanab' chi ach'ab'anb'il leerech tenamitul ut xek'e eerib' sa' aatin wik'in, sa' li ochoch nanimaak wi' link'ab'a'.

¹⁶ Ab'anan, chirix a'an xepo' leena'leb' ut xesach xwankil link'ab'a' naq xex'ok wi' chik chi xminb'aleb' ru eb' li winq ut eb' li ixq li ak xe'wank cho'q eemun, re naq te'k'anjelaq wi' chik cheru.

¹⁷ Jo'kan naq laa'in, li Qaawa', ninye chi jo'ka'in: Laa'ex ink'a' xineepaab' ut ink'a' xekanab' chi ach'ab'anb'il leeras eeriitz'in; jo'kan naq laa'in tinkanab' chi chalk sa' eeb'een li raaxiik', li we'ej ut li raxkamk, re naq te'ok xxiw chixjunileb' li tenamit sa' ruuchich'och' chi rilb'al leerahilal.

^18-19 Eb' li neke'jolomink re Judá ut Jerusalén, eb' laj ilol re li rochoch li awab'ej, eb' laj tij jo'wi' chixjunileb' li poyanam xe'xk'ojob' jun li sumwank chiwu: xe'xkamsi jun li saaj wakax, xe'xjach sa' xyi ut xe'nume'k sa' xyanq li wiib' jachal. Ab'an xe'q'etok aatin ut xe'xsach xwankil li sumwank xe'xk'ulub'a chiwu. Jo'kan naq tink'eheb' chi oso'k jo'qeb' li saaj wakax

²⁰ ut tinq'axtesiheb' sa' ruq'eb' li xik' neke'ilok reheb' ut te'ajoq xkamsinkileb'. Chikanaaq li xtib'eleb' cho'q xtib' eb' li so'sol ut eb' li k'iche'il xul.

²¹ Tinq'axtesi ajwi' laj Sedesías, li awab'ej re Judá, ut eb' li xjolomileb' li tenamit sa' ruq'eb' li te'ajoq xkamsinkileb', sa' ruq'eb' li xsoldaad li awab'ej re Babilonia, li ak xe'xkanab' eech'i'ch'i'inkil anaqwan.

²² Laa'in tinsutq'isiheb' chaq wi' chik ut te'chalq chi xsachb'al Jerusalén; te'reechani ut te'xk'e xxamlel. Ut nakirirnak te'kanaaq chixjunileb' li tenamit sa' xteepal Judá ut maajun chik poyanam taawanq chisa'”, chan li Qaawa'.