Jeremías 30 - Q'eqchi Bible

Li xyeechi'om li Yos chirix li xsutq'ijikeb' chaq eb' laj Israel

¹ A'aneb' a'in li aatin kixye li Qaawa' re laj Jeremías:

² “Jo'ka'in xye li Qaawa', xYos laj Israel: Tz'iib'a sa' junaq tasal hu chixjunileb' li aatin inyehom aawe,

³ xb'aan naq twulaq xkutankil naq tinsutq'isiheb' chaq wi' chik eb' lintenamit Israel ut Judá li wankeb' chaq chi preexil. Laa'in, li Qaawa', ninyehok re a'in. Tink'eheb' chi wank sa' li xna'ajeb' ink'ehom reheb' li xxe'toonil yuwa'”, chan li Qaawa'.

⁴ A'aneb' a'in li aatin kixye li Qaawa' chirixeb' laj Israel ut Judá.

⁵ Li Qaawa' kixye chi jo'ka'in: “Na'ab'imank japok e xb'aan xiwak ut xiwxiwil wank; maak'a' li tuqtuukil usilal.

⁶ Ayuqex chi xpatz'b'al ut k'ehomaq reetal: ma na'alank junaq winq? Wi ink'a', k'a'ut naq eb' li winq neke'xchap li xyi rixeb', chanchaneb' chik li ixq okeb' re chi alank? K'a'ut naq saqkirinkeb' aj chik neke'ilok?

⁷ Q'axal rahaq rilb'al li kutan a'an, jwal xiwajelaq jo' maajun wa ilb'il. A'an xkutankil li nimla rahil ch'oolej cho'q reheb' laj Jakob, ab'an te'xkoolan xnumsinkil li kutan a'an.

⁸ Chiru li kutan a'an laa'in tinkoleb' lintenamit ut tinjuk'i li xwankilaleb' li yookeb' chi rahob'tesinkeb' re. Ink'a' chik te'tawasiiq xb'aaneb' laj ab'l tenamit,

⁹ te'k'anjelaq b'an chik chiru li Qaawa', li xYoseb', ut chiru laj David, li tinxaqab' cho'q awab'ej.

¹⁰ “Ab'an laa'at, a Jakob, aj k'anjelat chiwu, matxiwak -chan li Qaawa'-; mich'inank laach'ool, a Israel, xb'aan naq we'kin laa'in. Tinchalq chakolb'al laa'at jo'wi' eb' laawalal aak'ajol, tatwisi chaq sa' li najtil tenamit katintaqla wi' chi tawasiik, ut tatwanq wi' chik sa' tuqtuukilal, sa' sahilal, chi maajun chik taaxib'esinq aawe.

¹¹ Laa'in, li Qaawa', ninye li waatin naq wankin aawik'in chakolb'al ut tinsach ruheb' chixjunil li tenamit katincha'cha'i wi'. Ab'an ink'a' tinsach aawu laa'at chi junajwa, us ta tatinq'us ut tatintij jo' chanru aak'ulub': ka'ajwi' nawaj naq taatoj rix laamaak sa' xyaalal”.

¹² Li Qaawa' kixye ajwi' chi jo'ka'in: “Laarahilal maak'a' chik xb'anol ut maak'a' chik xja'lenkil.

¹³ Maajun natenq'ank aawe; laatiq'ilal moko taak'iraaq ta, maajun natawok xb'anol laarahilal.

¹⁴ Xate'xtz'eq chirix xch'ooleb' eb' li neke'rahink aawu, maak'a' chik nakate'raj wi'. Xb'aan naq xatintiq' jo' naxb'aanu li xik' na'ilok, jo' naxb'aanu li josq' aj winq; xatinrahob'tesi xb'aan xk'ihal laamaak: k'ajo' li maa'usilal xab'aanu!

¹⁵ K'a'ut naq nakajap aawe xb'aan laarahilal? Maak'a' chik xb'anol laatiq'ilal. Xb'aan xk'ihal laamaak ut li maa'usilal xab'aanu xinb'aanu aawe chi jo'kan.

¹⁶ Ab'anan te'sache'q ru jo'k'ihaleb' li neke'rahob'tesink aawe, ut chixjunileb' li xik' neke'ilok aawe te'xik chi preexil. Taa'elq'aaq chixjunil li k'a'aq re ru reheb' li xe'elq'ank aawe; ut eb' li xe'maq'ok k'a'aq re ru aawe, taamaq'manq ajwi' chiruheb' li k'aru reheb'.

¹⁷ Relik chi yaal naq tatink'irtasi wi' chik ut tinb'an laatiq'ilal, us ta xak'ab'a'in: «Tz'eqtaananb'il» jo' ajwi': «Maajun nak'oxlank re li tenamit Sión». Laa'in, li Qaawa', ninyehok re a'in”.

¹⁸ Li Qaawa' kixye ajwi' chi jo'ka'in: “Eb' li ralal xk'ajol laj Jakob te'sutq'iiq chaq wi' chik sa' li xmuheb'aaleb', xb'aan naq twuxtaana ru li xna'ajeb' a'an. Jerusalén taawaklesimanq wi' chik sa' xb'een li po'lem, ut li kawub'resinb'il ochoch taayiib'aaq wi' chik sa' li xna'aj tz'aqal.

¹⁹ Ut aran taa'ab'iiq li b'ichank re b'anyoxink ut li japok e xb'aan li sahil ch'oolejil. Teb'ink'e wi' chik chi k'ihank toj reetal te'naab'alo'q; maajoq'e chik te'tz'eqtaanaaq, xb'aan naq tink'e wi' chik xloq'aleb'.

²⁰ Eb' li ralal xk'ajol laj Israel te'wanq jo' chaq junxil, xaqxooq chi kaw li xkomonileb' chi paab'ank; ut laa'in tinrahob'tesiheb' li te'rahob'tesinq reheb'.

^21-22 Sa' xyanqeb' a'an taawakliiq li taajolominq reheb'; rik'ineb' a'an taa'elq li taa'awab'ejinq reheb'. Tinb'oq chink'atq ut a'an taachalq wik'in, xb'aan naq ani tixkawu xch'ool chi jilok chink'atq? Laa'exaq lintenamit ut laa'inaq leeYos”, chan li Qaawa'.

²³ Ilomaq naq xchalk xjosq'il li Qaawa' jo' li kaqsut-iq'; chanchan li muqyax naq xchalk sa' xb'eeneb' li ink'a' useb' xna'leb'.

²⁴ Maajoq'e taach'anaaq xjosq'il li Qaawa' toj reetal tixb'aanu ut tixtz'aqob'resi ru li x'alaak sa' xch'ool xb'aanunkil. Ut a'in ink'a' neketaw ru anaqwan, ab'an teetaw xyaalal sa' junaq kutan.