Jeremías 27 - Q'eqchi Bible

Li b'itche' a'an reetalil li rahilal

¹ Naq laj Sedesías, ralal laj Josías, ki'ok chi awab'ejink sa' xb'eeneb' laj Judá, ki'aatinaak laj Jeremías xb'aan li Qaawa'

² chi jo'ka'in: “Sik' wiib'aq aak'aam ut yiib' junaq aab'itche', ut b'ak'eb' chirix laakux.

³ Chirix chik a'an taqla li esil a'in rik'ineb' li awab'ej re Edom, re Mohab, re Amón, jo' ajwi' re Tiro ut Sidón. Taqla xyeeb'al reheb' chirixeb' li taql li xe'k'ulunk Jerusalén chi rula'aninkil laj Sedesías, li awab'ej re Judá,

⁴ naq laa'in li Nimajwal Yos, li xYos laj Israel, xinye chi jo'ka'in:

⁵ Rik'in xnimal linwankil ut linmetz'ew kink'uub' li ruuchich'och', jo'wi' eb' li poyanam ut li xul li wankeb' chisa', ut laa'in yaal we k'aru tinb'aanu rik'in chixjunil a'an: naru tink'e sa' ruq' li ani xk'ulub'a wi' linch'ool.

⁶ Ut anaqwan xinq'axtesi chixjunileb' li na'ajej a'in sa' ruq' laj Nabukodonosor, aj k'anjel chiwu, awab'ej re Babilonia, ut xink'eheb' ajwi' eb' li k'iche'il xul re te'k'anjelaq chiru a'an.

⁷ Chixjunileb' li tenamit wanqeb' rub'el xwankil a'an, jo'wi' rub'el xwankil eb' li ralal xk'ajol ut eb' li ri xmam, toj taawulaq xq'ehil naq li x'awab'ejihom toxwanq ajwi' rub'el xwankileb' li xninqal ru tenamit ut awab'ej li q'axal kaweb' rib'.

⁸ Wi wank junaq tenamit malaj junaq awab'ej li ink'a' naxk'e rib' rub'el xwankil laj Nabukodonosor, li awab'ej re Babilonia, ut ink'a' naraj k'anjelak chiru, laa'in tinraqoq aatin sa' xb'eeneb' rik'in rahilal, we'ej ut raxkamk, toj reetal toxe'oso'q sa' ruq' -chan li Qaawa'-.

⁹ “Jo'kan naq meepaab' li neke'xye leepropeet, eb' laj q'e malaj li neke'tawok ru li matk', chi moko chepaab' eb' laj tuul ut eb' li neke'nawalink naq neke'xye eere: «Laa'ex ink'a' texwanq rub'el xwankil li awab'ej re Babilonia».

¹⁰ Xb'aan naq yal tik'ti' li neke'xye eere: wi teepaab' li raatineb' a'an, tex'isiiq sa' leena'aj ut laa'in texincha'cha'i ut texkamsiiq.

¹¹ Ab'an li tenamit li tixk'e rib' rub'el xwankil li awab'ej re Babilonia ut taak'anjelaq chiru, laa'in tinkanab' chi wank sa' li xna'aj re naq taahilanq aran sa' tuqtuukilal ut taa'awq chiru”, chan li Qaawa'.

¹² Laa'in laj Jeremías kinye chixjunil li esil a'in re laj Sedesías, li awab'ej re Judá, ut kinye ajwi' re chi jo'ka'in: “K'ehomaq eerib' rub'el xwankil li awab'ej re Babilonia ut li xtenamit, re naq teekol leeyu'am.

¹³ K'aru aj e naq teek'e eerib' chi kamsiik laa'at ut laatenamit xb'aan li raaxiik', li we'ej ut li raxkamk? Xb'aan naq a'in xyehom li Qaawa' chirix li tenamit li ink'a' taaraj k'anjelak chiru li awab'ej re Babilonia: relik chi yaal naq taakamq.

¹⁴ Meepaab' li raatineb' li propeet naq neke'xye eere: «Meek'e eerib' rub'el xwankil li awab'ej re Babilonia», xb'aan naq eeb'alaq'inkil yookeb'.

¹⁵ Moko laa'in ta xintaqlank reheb' -chan li Qaawa'-, ut yookeb' chi roksinkil link'ab'a' chi yal tik'ti'. Mare anchal texwisi sa' leena'aj, ut texkamq laa'ex jo'wi' eb' li propeet xe'b'alaq'ink eere”.

¹⁶ Kiwaatinaheb' ajwi' eb' laj tij ut chixjunileb' li poyanam, ut kinye reheb': “Li Qaawa' xye chi kama'in: «Meepaab' li yookeb' xyeeb'al eb' li propeet naq chi seeb' eb' laj Babilonia te'xq'axtesi chaq wi' chik li xsahil eechej li rochoch li Yos. A'an yal tik'ti'.

¹⁷ Meerab'i naq neke'xye chi jo'kan. K'ehomaq eerib' rub'el xwankil li awab'ej re Babilonia ut teekol leeyu'am. K'aru aj e naq tkanaaq chi po'lem Jerusalén?

¹⁸ Wi raj yaal naq propeeteb' ut wank li raatin li Qaawa' rik'ineb', tijoqeb' anaqwan chiru li Nimajwal Yos, re naq li k'a'aq re ru re li rochoch li Qaawa' li toj xkanaak ut li toj wank sa' rochoch li awab'ej re Judá ut Jerusalén ink'a' taak'ame'q aran Babilonia».

^19-21 “Naq laj Nabukodonosor, li awab'ej re Babilonia, kixk'am chi preexil laj Jekonías, ralal laj Johakín, li awab'ej re Judá, rochb'eeneb' li xninqal ru winq wankeb' Jerusalén ut sa' xteepal Judá, ink'a' kixk'am chixjunil li k'a'aq re ru aran Babilonia. Kixkanab' b'an eb' li oqech, li tamb'aha' li yiib'anb'il rik'in q'anch'iich', eb' li xaqleb'aal ut li k'a'aq chik re ru terto xtz'aq. Jo'ka'in xye li Nimajwal Yos, xYos laj Israel, chirix li sahil eechej li kikanaak sa' rochoch li Qaawa' jo'wi' Jerusalén ut sa' rochoch li awab'ej re Judá:

²² «Chixjunil a'in taak'ame'q Babilonia ut aran tkanaaq chaq, toj reetal naq laa'in twaj xk'amb'al chaq wi' chik», chan li Qaawa'”.