Jeremías 13 - Q'eqchi Bible

Li k'aamalsa' muqb'il sa' li nima'

¹ Li Qaawa' kixye we chi jo'ka'in: “Ayu, loq' chaq junaq aak'aamalsa' liino ut b'ak' chasa', ab'an maat'aqresi sa' ha'”, chan.

² Laa'in kinloq' li k'aamalsa', jo' kixye we li Qaawa', ut kinb'ak' chinsa'.

³ Toja' naq li Qaawa' kixye wi' chik we sa' xka'sutil:

⁴ “K'am li k'aamalsa' xaloq' ut xab'ak' chasa', ayu sa' li nima' Éwfrates ut muq chaq sa' xloot' junaq pek”, chan.

⁵ Kohin laa'in sa' li nima' Éwfrates ut koxinmuq li k'aamalsa' jo' kixye we li Qaawa'.

⁶ Chirix chik k'iila kutan, li Qaawa' kixye we: “Ayu sa' li nima' Éwfrates ut xok chaq li k'aamalsa' li kinye aawe naq toxaamuq chaq sa' li ha'”.

⁷ Kohin sa' li nima', kinsik' li k'aamalsa' b'arwi' kinmuq, ab'an q'aajenaq chik ut maak'a' chik na'ok wi'.

⁸ Toja' naq li Qaawa' ki'aatinak wi' chik wik'in

⁹ ut kixye we: “Jo'kan ajwi' naq tinsach li xwankil laj Judá ut li xq'etq'etil laj Jerusalén.

¹⁰ Li reemaaru aj tenamit a'in li ink'a' neke'raj xpaab'ankil li waatin, neke'b'eek jo' naraj li xjip aj ch'ooleb' ut xkoho xch'ooleb' chirixeb' li jalanil yos re xk'anjelankil ut xloq'oninkil ruheb', toxe'kanaaq jo' li k'aamalsa' a'in li maak'a' chik na'ok wi'.

¹¹ Jo' naq nab'ak'mank li k'aamalsa' chi sa'ej, jo'ka'an naq xwaj xb'ak'b'al wik'in chixjunileb' li tenamit Israel ut Judá, rik'in xk'oxlankil naq a'aneb' raj intenamit, li xnimal ink'ab'a', linloq'al ut linwankilal. A'ut eb' a'an ink'a' xe'raj wab'inkil.

Jaljookil ru aatin chirix li jorol kuk

¹² “Ye ajwi' li jaljookil ru aatin a'in reheb': «Jo'ka'in xye li Qaawa', li xYos laj Israel: Chixjunileb' li kuk neke'nujob'resiik chi b'iin». Ut eb' laj Israel tate'xsume chi jo'ka'in: «Ma ink'a' tab'i' naqanaw naq chixjunil li kuk nanujob'resiik chi b'iin?», cha'qeb'.

¹³ Toja' naq taaye reheb': «Jo'ka'in xye li Qaawa': Ok we chi xb'ut'b'aleb' chi b'iin chixjunileb' li wankeb' sa' li tenamit a'in; eb' li awab'ej li neke'k'ojlaak sa' xk'ojarib'aal laj David, eb' laj tij, eb' li propeet ut chixjunileb' laj Jerusalén.

¹⁴ Chirix chik a'an tink'eheb' chi xteninkileb' rib' chirib'ileb' rib': li na'b'ej yuwa'b'ej rik'in li alal k'ajolb'ej, jo' naq najore'k junaq kuk. Ink'a' tintoq'ob'a ruheb', chi moko tinkuy xmaakeb' malaj twil xtoq'ob'aal ruheb' naq teb'insach»”, chan li Qaawa'.

Xyeeb'al resil chi rub'elaj li k'aru taak'ulmanq

¹⁵ Ab'ihomaq ut k'ehomaq reetal, meeq'etq'eti chik eerib', xb'aan naq li Qaawa' yo chi aatinak.

¹⁶ Loq'onihomaq ru li Qaawa' leeYos, naq toj maji' naq'oqyino'k ut nekextichk'oq sa'eb' li aak'ab'il tzuul. Laa'ex nekeroyb'eni li kutan saqenk, ab'an li Qaawa' tixjal ru cho'q aak'ab' ut cho'q q'oqyinkil choql.

¹⁷ Wi ink'a' nekexpaab'ank chiru, laa'in tinyaab'aq injunes xb'aan leeq'etq'etil; taayot'e'q linch'ool ut xiikil li xya'al wu tinhoy, xb'aan naq li xtenamit li Qaawa' xe'isiik sa' li xna'ajeb'.

¹⁸ “Ye re li awab'ej ut re li xna': «Kub'sihomaq leewankil ut chunlanqex sa' ch'och', xb'aan naq maak'a' chik leekoroon li na'uutz'u'ujink re leejolom».

¹⁹ Eb' li tenamit sa' xteepal Nejeb sutsuukeb' xb'aaneb' li xik' neke'ilok reheb', ut maajun chik naru chi nume'k aran. Chixjunileb' laj Judá xe'chape'k ut xe'k'ame'k chi preexil sa' najtil tenamit.

²⁰ “At Jerusalén, taqsi laawilob'aal ut k'e reetal naq sa' xjayal releb'l iq' yookeb' chaq chi chalk eb' li xik' neke'ilok aawe. B'ar xkoheb' li jun ch'uut chi karneer li xk'eemank chawil? B'ar wankeb' anaqwan eb' laachaq'alil ru karneer?

²¹ K'aru taaye naq tatink'e chi awab'ejiik xb'aaneb' li xak'uleb' aawik'in cho'q aawamiiw? Q'axal ra taak'ul xb'aaneb' jo' junaq ixq ok re chi alank.

²² Ut wi taaye sa' laach'ool: «K'a'ut naq nink'ul chi jo'ka'in?», chanawaq naq xb'aan laak'iila maa'usilal yookat chi xk'ulb'al a'an; jo'kan naq xe'risi laawaq' chawix ut xate'xmux.

²³ Ma naru nasaqo'k xtib'el laj q'eq? Ma naru naxsach li xtzipixil rix li hix? Jo'kan ajwi' laa'ex ink'a' texruuq xb'aanunkil li usilal xb'aan naq k'aynaqex chi xb'aanunkil li maa'usilal.

²⁴ Jo'kan utan texincha'cha'i jo' li k'im naq nak'ame'k xb'aan li iq' nachalk sa' li chaqich'och'.

²⁵ A'an laak'ulub', a Israel, a'an laaq'ajkamunkil li tink'e aawe -chan li Qaawa' Yos-. Xb'aan naq xinaatz'eq chirix aach'ool ut xkohat chirixeb' li yos li maak'a' neke'ok wi'.

²⁶ Laa'in ajwi' tatinkanab' chi yak'yo re naq taak'utunq laaxutaan.

²⁷ Xwil chixjunil laamaa'usilal ut li xutaanalil yumb'eetak xab'aanu, xink'e reetal li xsahil aach'ool chi maakob'k; xwileb' laatz'i'b'eetalil yos sa' xb'eeneb' li tzuultaq'a. Toq'ob' aawu, a Jerusalén! Rahilal taachalq sa' aab'een, xb'aan naq ink'a' nakawaj xch'ajob'resinkil aawib'. Jo' najtil chik tatkanaaq chi jo'kan?”.