Jeremías 12 - Q'eqchi Bible

Q'axal sa wankeb' li ink'a' useb' xna'leb'

¹ At Qaawa', naq ninwech'ok aawik'in, laa'at junelik tiik aach'ool; ab'anan nawaj xpatz'b'al aawe li na'leb' a'in: K'a'ut naq jwal us neke'elk li ink'a' useb' xch'ool ut sa wankeb' li neke'b'alaq'ink?

² Laa'at xat-awok reheb' jo'eb' li che', ut eb' a'an neke'xchap xxe' ut neke'uuchink. Laak'ab'a' junelik wank chi xtz'uumal reheb', ab'an li xch'ooleb' najt wank aawik'in.

³ At Qaawa', laa'at nakanaw wu; xinaawil ut xak'e reetal naq linch'ool wank aawik'in. K'ameb' sa' li kamsib'aal jo' naq nak'ame'k li karneer, ut k'e reetalileb' cho'q re xkutankil li kamsink.

⁴ Jo' najtil chik taawanq li ch'och' chi ra sa' xch'ool ut chaqi aj chik li pim sa'eb' li tzuultaq'a? Xb'aan li xmaa'usilaleb' li poyanam xe'osoje'k eb' li ketomq ut eb' li xik'anel xul. Xb'aan naq neke'xye: “Li Qaawa' ink'a' naxnaw li naqab'aanu”, chankeb'.

Li xsumehom li Yos

⁵ “Wi nakatlub'k chi aanilak chirixeb' li neke'xik chi roqeb' -chan li Qaawa'-, chanru taawaj xyalb'al aawu rik'ineb' li neke'xik chirixeb' li kawaay? Wi ch'i'ch'i' wankat sa' jun li na'ajej maak'a' wi' ch'a'ajkilal, k'aru taab'aanu naq wanqat sa' xk'iche'il Jordán?

⁶ A'aneb' ajwi' laawas aawiitz'in, eb' laawech'alal xe'b'alaq'ink aawe ut nakate'xhob' chirix aajolom. Maak'ojob' aach'ool chirixeb' naq nakate'raatina rik'in ch'ina'usil aatin.

Li Qaawa' ra xch'ool chirix li xtenamit

⁷ “Xinkanab' li rochochil laj Israel ut xintz'eqtaana li weechanihom. Xinq'axtesi li jwal raaro inb'aan sa' ruq'eb' li xik' neke'ilok re.

⁸ Xb'aan naq lintenamit li jwal ninra xik' xinril jo' jun li kaqkoj sa' li k'iche'. Xe'xjap reheb' sa' inb'een; jo'kan naq xeb'intz'eqtaana.

⁹ Lintenamit kama' chik li xik'anel xul ch'ina'us rilb'al, ut chixjunileb' li k'uch neke'rupupnak sa' xb'een. Kimqex, chejunilex li k'iche'il xul; ch'utub'omaq eerib' chi xt'upinkil!

¹⁰ Naab'aleb' laj k'aak'alenel ketomq xe'xsach li wawimq ut xe'xteni ru li weechanihom; joxk' aj chik xe'xkanab' linna'aj li jwal raaro inb'aan, chanchan chik li chaqich'och'.

¹¹ Nayamnak ut nakirnak xe'xkanab' chi q'axal toq'ob'aal ru; po'lem xkanaak chixjunil, ab'an maajun naraho'k b'ayaq xch'ool chirix.

¹² Sa' xb'eeneb' chixjunil li t'ojoch aj tzuul xe'chalje'k chaq eb' laj elq' xb'aan naq laa'in, li Qaawa', wank jun inq'esnal ch'iich' li tinsach wi' chixjunil li na'ajej toj sa' xmaril, ut maajun taakole'q.

¹³ Xe'awok triiw, ut k'ix chik xe'xxok; maak'a' rajb'al naq xe'k'anjelak chi kaw. Te'xutaanaq chi xxokb'al li kach'in ajwi' xb'aan naq k'ajo' li xxamlel linjosq'il”.

Xyeechi'om li Qaawa' reheb' li tenamit li nach' wankeb' rik'in laj Israel

¹⁴ Jo'ka'in kixye li Qaawa': “Chixjunileb' li rechkab'al laj Israel ink'a' useb' xna'leb'. A'aneb' li xe'sachok re li na'ajej ink'ehom re li tenamit Israel; jo'kan naq laa'in twisiheb' sa' li xna'ajeb', ut twisiheb' chaq laj Judá sa' xyanqeb'.

¹⁵ Ab'anan naq akaq xinsacheb' ru, tinsutq'iiq chaq ut tintoq'ob'a ruheb', ut tink'ameb' chaq wi' chik sa' li xna'ajeb' ut sa' li xtenamiteb'.

¹⁶ Relik chi yaal naq a'aneb' xe'tzolok re lintenamit chi yehok jurament sa' xk'ab'a' laj Bahal, ab'an anaqwan naru te'wanq sa' xyanqeb' lintenamit wi relik chi yaal naq neke'xtzol li xpaab'aaleb' laj Israel ut neke'yehok jurament sa' ink'ab'a', sa' xk'ab'a' li yo'yookil Yos.

¹⁷ A'ut li tenamit li ink'a' taapaab'anq chiwu, laa'in twisiheb' sa' li xna'ajeb' ut tink'eheb' chi sache'k chi junwaakaj”, chan li Qaawa'.