Isaías 8 - Q'eqchi Bible

Li ralal laj Isaías a'anaq jun eetalil

¹ Li Qaawa' kixye we: “Sik' junaq nimla tz'alamche' ut chiru a'an tz'iib'a chi chaab'il li aatin a'in: Maher-Salal-Jas-Bas (naraj naxye: «Chi seeb' taawanq li elq'ak ut li juk'uk»),

² ut k'eheb' cho'q intestiiw laj Urías, laj tij, ut laj Sakarías, ralal laj Barakías”.

³ Moqon kinwak rik'in li wixaqil, propeet ajwi', ut a'an kikanaak sa' yu'am ut kiwank jun xk'uula'al. Toja' naq li Qaawa' kixye we: “K'e cho'q xk'ab'a': Maher-Salal-Jas-Bas,

⁴ xb'aan naq li k'uula'al toj maji'aq ajwi' tixnaw xyeeb'al: «na' ut yuwa'», naq taa'elq'aaq chixjunil li k'aru wank re Damaask ut Samaria, ut li xb'ihomaleb' taak'ame'q toj rik'in li awab'ej re Asiria”.

Siloé ut Éwfrates

⁵ Li Qaawa' kinraatina wi' chik ut kixye:

⁶ “Li tenamit a'in xe'xtz'eqtaana li ha' re Siloé li nab'eek roq sa' xyaalal, ut xch'inank xch'ooleb' chiru laj Rasín ut laj Pékaj, ralal laj Romelías.

⁷ Jo'kan naq li Qaawa' tixtaqlaheb' chaq li xkawil oq li nima' Éwfrates sa' xb'eeneb' (a' li awab'ej re Asiria rochb'een chixjunil li xwankilal); taab'ut'unq, taaxik yalaq b'ar ut talaje'nujaq chixjunileb' li na'ajej.

⁸ Tox'okaq toj Judá, kama' li b'ut'iha', ut taawulaq toj chi xkuxeb' li poyanam: chanchanaq li t'iw helho li xxik' li tixtz'ap chixjunil laatenamit, a Emmanuel”.

⁹ Ch'utub'omaq eerib', ex tenamit, chi yooq leexiw. Ab'ihomaq, ex najtil poyanam: kawresiiq eerib', ab'an taaq'axe'q eeru; yo'oon wanqex chi yalok, ab'an texsache'q ajwi'.

¹⁰ Us ta teek'uub' chi us li k'aru teeb'aanu, ab'anan maak'a' aj e. Us ta teeye li k'aru teeraj, moko taatz'aqloq ta ru. Xb'aan naq li Qaawa' wank qik'in.

Li xtaqlankil laj Isaías

¹¹ Li Qaawa' kixye we, rik'in xnimal xwankil, naq ink'a' tink'am we jo' li xyu'ameb' li tenamit a'in:

¹² “Meeye po'ok na'leb' re li neke'xk'e cho'q po'ok na'leb' li tenamit a'in -chan we- chi moko teexiwa ru li neke'xxiwa eb' a'an.

¹³ A' li Nimajwal Yos, li q'axal Sant, A'an teexiwa ut teeroxloq'i ru.

¹⁴ A'anaq li santil na'ajej, li pek te'tichk'oq wi' eb' li tenamit ut luktesib'aal ch'oolej cho'q reheb' laj Israel ut eb' laj Judá; kama'aq jun li kanleb' ut ra'al cho'q reheb' li wankeb' Jerusalén.

¹⁵ Naab'aleb' li te'tichk'oq, te't'ane'q ut kok'putz' te'kanaaq; naab'aleb' li te'chape'q sa' li ra'al”.

¹⁶ K'uula chi us eb' li aatin a'in, kaaxti chi chaab'il li chaq'rab' xink'e aawe sa' xyanqeb' lintzolom a'in.

¹⁷ Us ta li Qaawa' xmuq rib' chiruheb' li ralal xk'ajol laj Jakob, laa'in k'ojk'o linch'ool chirix A'an, ut xaqxo li woyb'enihom rik'in.

¹⁸ Arin wankin wochb'eeneb' li walal xk'ehom we li Qaawa' jo' loq'laj eetalil cho'q reheb' laj Israel, sa' xk'ab'a' li Nimajwal Yos, li nahilank sa' li tzuul Sión.

¹⁹ Ut naq taayeemanq eere: “Patz'onqex rik'ineb' li neke'aatinank kamenaq jo'wi' rik'ineb' laj q'e li neke'hashotk ut neke'choqoqnak chi aatinak xjuneseb'”, teesumeheb': “Ma ink'a' tab'i' tento naq eb' li tenamit te'patz'oq rik'in li xyoseb' chirixeb' li yo'yookeb' ut li kamenaqeb'?”.

²⁰ Us raj te'aatinaq chi jo'ka'in, ab'anan li k'aru neke'xye, maak'a' na'ok wi'.

Li b'eek chiru q'oqyink

²¹ Te'xb'eeni rib'eb' li tenamit chi ra sa' xch'ooleb' ut te'tz'okaje'q; ut naq yooq li xtz'okajikeb', te'josq'o'q ut te'xmajewa li awab'ej ut li xYoseb'. Toja' naq te'iloq sa' li choxa;

²² chirix chik a'an te'iloq sa' li ruuchich'och', ut junes rahil ch'oolej ut rahilal, aak'ab' ut ch'a'ajkilal te'xtaw. Aran te'oso'q sa' li q'oqyink.