Isaías 65 - Q'eqchi BibleLi raqb'a aatin chaalel 1 Xyehom li Qaawa' chi jo'ka'in: “Laa'in xin'elk chi xk'ulb'aleb' li ink'a' neke'patz'ok we ut xink'e wib' chi tawe'k xb'aaneb' li maajun sut nikine'xsik'. Xinye reheb' li ink'a' neke'xpatz' link'ab'a': «Wankin arin, wankin arin». 2 Maak'a' rajb'al naq junelik xink'e inch'ool chi xk'ulb'al jun q'etq'et aj tenamit li junes maa'usilal naxik wi' xch'ool; 3 jun tenamit li junelik naxchiq' injosq'il chi xnaq' wu xb'aan naq namayejak chiruheb' li jalanil yos sa' xna'ajeb' li awimq ut naxk'at li k'ajpom sa' xb'eeneb' li xanil artal; 4 neke'k'ojlaak sa'eb' li muqleb'aal kamenaq ut neke'xnumsi li q'oqyink sa' muqmuukil na'ajej; neke'xtzeka xtib'el li aaq ut neke'xk'e sa' li xsek'eb' li ink'a' us xtzekankil. 5 Ut neke'xye: «Kanaaqat aran sa' laana'aj, matjilok chaq chink'atq: mare anchal tatsanto'q inb'aan», chankeb'. Chixjunileb' a'an chanchaneb' li sib' sa' wu'uj, jo' li xam li junelik yo chinch'i'ch'i'inkil. 6 “K'ehomaq reetal, chixjunil a'an tz'iib'anb'il chiwu ut ink'a' tinkanab' aatinak toj reetal tink'e leeq'ajkamunkil, 7 chirix leemaa'usilal laa'ex jo'wi' chirix li xmaakeb' leena' leeyuwa'. Eb' a'an xe'k'atok k'ajpom sa'eb' li tzuul ut xine'xmajewa sa' xb'eeneb' li b'ool; jo'kan naq tink'e li xq'ajkamunkileb' chi tz'aqal re ru”, chan li Qaawa'. 8 Li Qaawa' kixye chi jo'ka'in: “Naq natawmank jun chiilaq chi uub' k'ajo' xya'al, naxye li winq: «Maab'atz'unle li uub' a'in xb'aan naq a'an jun rosob'tesihom li Yos», chan. Jo'kan ajwi' tinb'aanu laa'in sa' xk'ab'a'eb' laj k'anjel chiwu: ink'a' tinsach chixjunileb' li tenamit. 9 Tink'e chi k'ihank eb' li ralal xk'ajol laj Jakob ut eb' laj Judá te'eechaninq re eb' lintzuultaq'a; li ch'och' taa'eechaniiq xb'aaneb' li sik'b'ileb' ru inb'aan ut aran te'wanq laj k'anjel chiwu. 10 Sarón a'anaq xna'ajeb' li karneer, ut li xtaq'ahil Akor taakanaaq cho'q xwa'leb'aaleb' li wakax, cho'q reheb' lintenamit xe'sik'ok we. 11 “A'ut laa'ex li neketz'eqtaana li Qaawa' ut neketz'eq chirix eech'ool linsantil tzuul, li nekemayeja li tzekemq chiru laj Gad ut nekenujob'resi li sek' rik'in b'iin cho'q re laj Mení, 12 laa'in texink'e chi kamsiik chi q'esnal ch'iich' ut chejunilex tex'oso'q chi ch'otb'il leekux, xb'aan naq xexinb'oq ut ink'a' xineesume, xexwaatina, ut ink'a' xeraj wab'inkil; xeb'aanu b'an li ink'a' nawulak chiwu, a' chik li nachiq'ok injosq'il xesik' xb'aanunkil”. 13 Jo'kan naq li Qaawa' kixye chi jo'ka'in: “Eb' laj k'anjel chiwu wanqeb' xtzekemq, ut laa'ex tex'oso'q xb'aan tz'okaak; eb' laj k'anjel chiwu sa te'uk'aq b'iin, ut laa'ex tex'oso'q xb'aan li chaqi'eel; eb' laj k'anjel chiwu k'ajo'aq xsahil sa' xch'ooleb', ut laa'ex texkanaaq sa' xutaan; 14 eb' laj k'anjel chiwu te'b'ichanq chi sa sa' xch'ooleb', ut laa'ex teejap eere chi yaab'ak ut chi q'oqonk, chi k'ajo'aq xmay ut xyot'ik leeraanm. 15 “Eb' li sik'b'il ru inb'aan te'roksi leek'ab'a' re majewank ut re xyeeb'al reheb' li jalan chik: «Chi jo'ka'in tatxk'e chi kamk li Qaawa' Yos!», cha'qeb'. Ab'an eb' laj k'anjel chiwu tink'e reheb' jun ak' k'ab'a'ej. 16 Jo'k'ihaleb' li te'raj osob'tesiik sa' li tenamit, te'xpatz' rosob'tesinkileb' sa' xk'ab'a' li Qaawa', li Yos q'axal paab'ajel; ut li ani tixye xjurament sa' li tenamit, tixb'aanu sa' ink'ab'a' laa'in, li ninb'aanu li k'aru xinyeechi'i. Relik chi yaal naq li rahilal li kik'ulmank junxil taasachq sa' inch'ool ut ink'a' chik tink'e sa' li waanm. 17 “K'ehomaq reetal, tinyoob'tesi jun ak' choxa ut jun ak' ruuchich'och'. Maajoq'e chik taajultikamanq li k'aru xk'ulmank ut ink'a' chik tink'e sa' inch'ool. 18 Sahoqex ut chiwanq nimla sahilal chi junelik xb'aan li k'aru tinyoob'tesi: ok we chi xyoob'tesinkil jun ak' Jerusalén nujenaqaq chi sahil ch'oolej. Ut numtajenaqaq li xsahilal xch'ooleb' li te'wanq aran. 19 “Laa'in sahaq inch'ool rik'in Jerusalén, ut lintenamit tixk'e xnimal xsahil li waanm. Ink'a' chik taa'ab'iiq aran li yaab'ak chi moko li q'oqonk. 20 Ink'a' chik te'kamq aran eb' li k'uula'al toja' xe'yo'laak, chi moko te'q'ajq te'sutq'iiq eb' li cheekel poyanam chi ink'a' ta te'xtz'aqob'resi li xchihab'eb'. Li taakamq sa' o'k'aal chihab', chanchan naq taakamq chi toj saaj; ut li ink'a' tixkooloni li o'k'aal chihab', a'an li majewanb'il. 21 Eb' li poyanam te'kab'laq ut te'wanq chisa'; te'awq uub' ut te'xtzeka li ru. 22 Moko te'kab'laq ta ut jalan ta chik taawanq chisa', chi moko te'awq ut jalan chik taayaloq xsahil li ru. Lintenamit taanajto'q roq li xyu'am, jo' jun toon chi che'; ut eb' li sik'b'ileb' ru inb'aan te'xyal xsahil li xk'anjeleb'. 23 Ink'a' chik te'xtawasi rib' chi k'anjelak chi maak'a' rajb'al, chi moko te'kamq li ralaleb' chi toj saajaqeb', xb'aan naq osob'tesinb'ilaqeb' a'an rochb'eeneb' li ralal xk'ajoleb': a'anaqeb' jun tenamit osob'tesinb'il xb'aan li Qaawa'. 24 Naq toj maji' neke'xpatz' link'ab'a', laa'in akaq xinsumeheb' chaq; toj maji' ajwi' neke'aatinak, laa'in akaq xwab'iheb'. 25 Laj xojb' ut li karneer te'ichajib'q sa' wiib'al; li kaqkoj taawa'oq pim jo' li wakax, ut li k'anti' taalowoq pojtz'. Maajun chik taarahob'tesinq chi moko taasachoq sa' linsantil tzuul”, chan li Qaawa'. |
Q'eqchi DC Bible © Bible Society in Guatemala, 2005.
Bible Society in Guatemala