Isaías 57 - Q'eqchi Bible

¹ Nakamk li winq tiik ru xyu'am ut maajun nak'oxlak chirix a'an. Neke'kamk li winq useb' xch'ool, ab'an maajun naxtaw xyaalal naq sa' li xkamikeb' neke'ach'ab'aak chiru chixjunileb' li raaxiik'

² ut neke'xtikib' hilank sa' tuqtuukilal. Xe'wank sa' tiikilal ut anaqwan neke'hilank sa' li xmuqleb'aaleb'.

Xsachb'aleb' li jalanil yos

³ Kimqex arin, laa'ex ralal xk'ajol laj tuul, ex riyajil laj yumb'eet ut laj muxul sumlaak.

⁴ Ani nekese'e laa'ex, ani nekereetz'u ut nekeb'iy chere? Laa'ex ralal xk'ajol li maak, yal sik'b'il alex

⁵ li nekexxik chi xb'aanunkil leemaa'usilal rub'eleb' li ji malaj rub'elatq k'a'aq chik chi ninqal che'; nekekamsi leekok'al chireheb' li nima' ut sa'atqeb' li ochoch pek.

⁶ “At Israel, nawulak chawu xloq'oninkileb' ru eb' li t'ort'ookil pek li wankeb' sa'eb' li nima', xb'aan naq a'aneb' tz'aqal aaweechanihom. Sa' xb'eeneb' ajwi' a'an xahoy laab'iin naq xatmayejak. Ma taach'anaaq linjosq'il xb'aan a'an naq nakak'oxla?

⁷ Toj sa' xb'een li tzuul najt xteram ut kaw xaqink ru xayiib' laana'aj; toj aran ajwi' xattaqe'k chi mayejak.

⁸ Chirix li xtz'apb'al re laawochoch, sa' li rokeb'aal xak'e li reetalil laamaa'usilal. Xamuq aawib' chiwu, xat'usub' aawib' ut xattaqe'k chiru laach'aat k'ajo' xnimal ru. Xak'e aawib' sa' aatin rik'ineb' li xwulak wi' chawu yoklaak, naq yookat chi xka'yankil li tz'ik.

⁹ “Xkohat rik'in laj Molok ut xak'am naab'al li aseeyt jo'wi' sununkil b'an. Yalaq b'ar xataqlaheb' laataql, toj sa' xb'alb'a xak'eheb' chi kub'eek!

¹⁰ Xb'aan laak'iila b'eenik xattawaak, ab'an maajun wa xaye: «Ink'a' chik nawaj xb'aanunkil». Nakataw li k'aru naxk'e aakawilal, jo'kan naq ink'a' nach'inank laach'ool.

¹¹ “K'a' chi yosil xxib'esink aawe ut xatxiwak xb'aan naq xinaab'alaq'i ut xinsachk sa' laach'ool chi junajwa? Ma yal xb'aan naq maak'a' ninye aawe chalen chaq junxil naq ink'a' xaxiwa wu?

¹² A'ut anaqwan tink'e chi kutankil laab'aanuhom jo'wi' laana'leb' li maak'a' na'ok wi'.

¹³ Naq taajap aawe chi xpatz'b'al aatenq'ankil, ink'a' tate'xkol chi moko tate'xtenq'a eb' laajalanil yos, xb'aan naq chixjunileb' a'an te'sapuuq xb'aan li iq'. A'ut li kaw xch'ool wik'in taareechani li na'ajej ut taakanaaq sa' linsantil tzuul”.

Maak'a' li tuqtuukilal wi maak'a' li tiikil ch'oolej

¹⁴ Toja' naq taayeemanq: “Tuqub'omaq, tuqub'omaq ru ut tehomaq li b'e; isihomaq chixjunil li naramok re xb'e lintenamit”.

¹⁵ Xb'aan naq jo'ka'in xyehom li Nimajwal Yos, li nim xwankil, li junelik wank chalen chaq q'e kutan ut li q'axal Sant li xk'ab'a': “Laa'in wankin sa' li na'ajej najt xteram ut jwal loq', ab'anan wankin ajwi' rik'in li ra sa' xch'ool ut li tz'eqtaananb'il, re xk'eeb'al xkawub' xch'ool li kub'enaq xwankil ut li namayok raanm.

¹⁶ Ink'a' tinjit lintenamit chi junelik chi moko toj yooq linjosq'il chi junajwa, xb'aan naq laa'in kinyoob'tesink re li winq ut li ixq, ut ink'a' nawaj naq te'ch'inanq ut te'raho'q xch'ool chiwu.

¹⁷ Xinjosq'o'k xb'aan naq k'ajo' li ratawom laj Israel; xinrahob'tesi ut xinmuq wib' chiru. Ab'an a'an xq'etq'eti rib' ut xkawub'resi xch'ool sa' li xjipil.

¹⁸ Ak xwil li xb'aanuhom, ab'an tink'irtasi, tinb'eresi ut tink'ojob' xch'ool a'an jo'wi' li neke'yaab'ak chirix;

¹⁹ ut tink'eheb' chi b'ichank chi saheb' sa' xch'ool: «Chiwanq tuqtuukilal rik'ineb' li wankeb' chaq chi najt ut cho'q reheb' ajwi' li wankeb' chi nach' -cha'aq li Qaawa'-. Laa'in tink'irtasiheb'».

²⁰ A'ut eb' li ink'a' useb' xna'leb' chanchaneb' li xkaw oq li palaw, kama'eb' li palaw li ink'a' nakanaak chi ch'anch'o ut nareek'asi li sulul ut li tz'ajn.

²¹ Maak'a' li tuqtuukilal cho'q reheb' li ink'a' useb' xna'leb'”, chan linYos.