Isaías 54 - Q'eqchi Bible

Li xrahom li Yos wank chi junelik

¹ Jap aawe xb'aan xsahil aach'ool, at ma'al ixq li maajuneb' laawalal aak'ajol. B'ichan chi sa sa' laach'ool, laa'at li maajun sut xat-alank, xb'aan naq li Qaawa' kixye chi jo'ka'in: “Q'axal wi' chik naab'aleb' li ralal xk'ajol li kanab'anb'il ixq chiru li wank xb'eelom”.

² Nimob'resi xsa' li muheb'aal wankat wi', seeb'a aawib' chi xhelb'al li xt'ilkem; tiq roq li xk'aamal ut lap chi cham eb' li che' neke'chapok re,

³ xb'aan naq tatk'ihanq chi yo'oon, eb' laawalal aak'ajol te'reechani naab'aleb' li tenamit ut te'wanje'q sa'eb' li na'ajej yamyookeb' anaqwan.

⁴ Matxiwak, moko tatkanaaq sa' xutaan; matxutaanak xb'aan naq maak'a'aq chik k'aru tatkaqo'q wi'. Tz'eq chirix laach'ool li k'aru xak'ul sa' laasaajilal ut maak'oxla chik laamalka'anil.

⁵ Xb'aan naq laasum'aatin a'an laj Yoob'tesihom aawe, li Nimajwal Yos xk'ab'a'; li xSant laj Israel a'an laj kolol aawe: “xYos chixjunil li ruuchich'och'” naxk'ab'a'in.

⁶ Laa'at chanchanat jun li ixaqilb'ej naq xatwank, jo' jun li ixq kanab'anb'il xb'aan li xb'eelom ut ra sa' xch'ool; ab'an anaqwan xatxb'oq wi' chik li Qaawa' ut naxye aawe: “Ma naru xtz'eqtaanankil li ixq sik'b'il chaq ru sa' linsaajilal?

⁷ Jun k'amok xatinkanab', ab'an rik'in xnimal xchaab'ilal linch'ool tatink'am wi' chik wik'in, -chan laaYos-.

⁸ Naq xchaalunk linjosq'il, jun k'amok xinmuq wib' chawu; ab'an nakatinra rik'in xnimal inrahom wank chi junelik -chan li Qaawa', laj kolol aawe-.

⁹ Jo' naq kinye injurament re laj Noé naq ink'a' chik tink'e chi b'ut'irk li ruuchich'och', jo'kan ajwi' anaqwan ninye injurament naq ink'a' chik tinjosq'o'q aawik'in chi moko tatinch'iila chik.

¹⁰ Us ta eb' li tzuul te'xjal li xna'ajeb' ut eb' li b'ool te'juk'e'q, ab'an linrahom ink'a' taanajto'q aawik'in, chi moko taasachq xwankil li Sumwank xink'ojob' aawik'in re wank sa' tuqtuukilal”, chan li Qaawa' li na'uxtaanank aawu.

Li ak' Jerusalén

¹¹ “Toq'ob' aawu, tawasinb'ilat xb'aan li kaqsut-iq': maajun nak'ojob'ank aach'ool! Laa'in tatinwaklesi wi' chik rik'in q'eqjohinkil pek ut cho'q rub'elankil tink'eheb' li safiro.

¹² Tinyiib'eb' laanajt xteramil ochoch rik'in rubí, ut sa'eb' li okeb'aal, lem tink'e cho'q xtz'apb'aleb'; tinwaklesi chixjunileb' li suttz'ak rik'in xchaq'alil ru pek.

¹³ Chixjunileb' laawalal aak'ajol te'tzole'q xb'aan li Qaawa', ut k'ajo'aq li sahilwank toxe'xtaw chixjunileb'.

¹⁴ K'ojk'ooqat sa' xb'een li tiikilal, kolb'ilaqat chiru li rahob'tesiik ut li xiwak, ut maajun chik taaxib'esinq aawe.

¹⁵ Wi wank junaq li taaraj numtaak sa' aab'een, moko intaql ta chik laa'in; ut wi wank junaq li taachalq chi yalok aawik'in, chawu ajwi' laa'at toxpik'a rib'.

¹⁶ “K'e reetal, laa'in xinyoob'tesink re laj tenol ch'iich', li na'apunk re li ru xam ut naxyiib' li ch'iich' nak'anjelak chiru; laa'in ajwi' xinyoob'tesink re li winq aj sachonel re naq taasachoq ut taajuk'uq.

¹⁷ Ab'anan maajun xyiib'ank re li ch'iich' li taasachoq aawe. Mem taakanab'eb' li te'jitoq aawe sa' raqleb'aal aatin. A'an a'in li xmaataneb' laj k'anjel chiru li Qaawa', a'an a'in li q'axok u tink'e reheb'”, chan li Qaawa' Yos.