Isaías 52 - Q'eqchi Bible

Xkolb'al li tenamit Jerusalén

¹ Ajen, ajsi aawu, at Sión; tiqib' aawib' rik'in wankilal! Tiqib' aawib' jo' sa' xhonalil li ninq'e, at Jerusalén, santil tenamit! Xb'aan naq eb' laj ab'l tenamit ut eb' li tz'ajn ru xch'ooleb' ink'a' chik te'chalq aawik'in.

² Waklin, at Jerusalén, chiq' li pojtz' chawix; isi aawib' sa' li rahilal, at Sión, li wankat chi preexil.

³ Jo'ka'in kixye li Qaawa': “Maak'a' tumin kink'ul naq kexk'ame'k chi munil; jo'kan naq maak'a' tumin tink'e naq texwisi chaq anaqwan.

⁴ Xb'enwa lintenamit ke'koheb' Ejiipt chi kanaak aran jo' ab'l tenamit; moqon chik ke'rahob'tesiik xb'aaneb' laj Asiria chi maak'a' xyaalal.

⁵ Ut anaqwan k'aru yookin chi xk'ulb'al arin -chan li Qaawa'- xb'aan naq lintenamit xe'k'ame'k chi munil chi maak'a'eb' xmaak? Eb' li neke'numtaak sa' xb'eeneb' neke'xjap reheb' chi q'etq'eteb' ut rajlaleb' kutan chinmajewankil.

⁶ Ab'anan taawulaq xkutankil naq lintenamit te'xnaw tz'aqal link'ab'a' ut te'xtaw xyaalal naq laa'in xin'aatinak rik'ineb', ut we'kin arin!”.

⁷ K'ajo' xchaq'al ru rilb'al sa' xb'eeneb' li tzuul li roqeb' laj yehol resil li tuqtuukil usilal, li nayehok chaab'il esilal, li napuktesink resil li kolb'a ib' ut naxye re Sión: “Ak yo chi awab'ejink laaYos!”.

⁸ Ab'i li xyaab' xkuxeb' laj k'aak'alenel: japjookeb' re sa' junajil xb'aan xsahilaleb' xch'ool, xb'aan naq xe'ril rik'in ruheb' naq li Qaawa' xchalk wi' chik Sión.

⁹ Japomaq eere chi b'ichank chi junaj xyaab' leekux, ex xpo'lemil Jerusalén, xb'aan naq li Qaawa' xril xtoq'ob'aal ru li xtenamit, ak xkol Jerusalén.

¹⁰ Li Qaawa' xk'ut li xnimal xwankil chiruheb' chixjunil li tenamit; ut yalaq b'ar toj sa' xmaril li ruuchich'och' x'ilmank li kolb'a ib' nachalk rik'in li qaYos.

¹¹ Jo'kan naq elenqex, elenqex ut kanab'omaq Babilonia! Meech'e' li k'a'aq re ru tz'ajn ru. Elenqex chaq sa' li tenamit a'an! Ch'ajob'resiiq eerib' laa'ex li nekexk'amok li xsahil eechej li Qaawa'.

¹² Ab'an moko tex'elq ta chi junpaat chi moko jo' aj eelel ta naq texxik, xb'aan naq k'amolb'ehaq li Qaawa' cheru ut chi ixb'ej wanq li xYos laj Israel.

Li xka xb'ich laj K'anjel chiru li Qaawa'

¹³ Laj K'anjel chiwu jwal us taa'elq rik'in li k'aru tixb'aanu; nimaq xwankil ut taaterq'usiiq xloq'al, q'axal taanimaaq li xk'ab'a'.

¹⁴ Jo' naq naab'aleb' xe'sachk xch'ool chi rilb'al naq moko jo' ta chik junaq poyanam ut ink'a' chik nak'utunk li ru xb'aan li rahilal,

¹⁵ jo'kan ajwi' naab'aleb' li tenamit te'sachq xch'ool ut eb' li awab'ej mem aj chik te'kanaaq, xb'aan naq te'ril li maajun wa seeraq'inb'il reheb' ut te'xka'ya li maajun wa rab'ihomeb'.