Isaías 5 - Q'eqchi Bible

Li jaljookil ru aatin chirix li rawimq uub'

¹ Ok we chi b'ichank cho'q re li wamiiw; tinb'icha jun li b'ich sa' xk'ab'a' li rawimq uub'. Li wamiiw wank jun xna'aj li x'uub' sa' jun siir chi chaab'il ch'och'.

² Kixpiki li ch'och', kirisiheb' li pek chisa' ut kiraw li iyaj jwal chaab'il. Sa' xyi li rawimq kixkab'la jun najt xteramil ochoch ut kixyiib' jun xna'aj re xyatz'b'al li uub'. Li wamiiw kiroyb'eni li uub' q'axal ki', ab'anan junes ra re li uub' kiruuchin.

³ Ut anaqwan, ex aj Jerusalén ut aj Judá, raqomaq aatin sa' qab'een: ani xmaakob'k, ma li wawimq malaj laa'in?

⁴ K'a' raj chik ru xinb'aanu re li wawimq? Malaj wank k'aru ink'a' xinb'aanu re? Xwoyb'eni ki'il uub'; k'a'ut naq junes ra re li uub' xk'e?

⁵ Jo'kan utan tinye eere li k'aru ok we chi xb'aanunkil re li wawimq: tinte li okeb'aal re naq taa'oso'q; tinjuk' li tz'ak sutsu wi' li wawimq, re naq taayeq'iiq ut taasache'q ru.

⁶ Nakirirnak tinkanab' li ch'och' a'an: ink'a' chik taa'aq'iiq chi moko taasaab'esiiq, chamo'qaq li pim ut chinujaq li k'ix sa' xb'een. Ut tinram chiruheb' li choql re naq ink'a' tixk'e li hab' sa' xb'een.

⁷ Li xyaalal li b'ich, a'an a'in: li rawimq li Nimajwal Yos, a'an li tenamit Israel, ut eb' laj Judá, a'an li iyaj jwal raaro xb'aan. Li Qaawa' kiroyb'eni naq te'xb'aanu li us, ut maa'usilal chik kixtaw; kixyo'oni naq te'wanq sa' tiikilal, ut junes a' chik li rahob'tesink ib' kixtaw.

Ra chaalel sa' eeb'een laa'ex li ink'a' us eena'leb'

⁸ Ra chaalel sa' eeb'een li yookex chi loq'ok naab'al chi ochoch, li yookatqex chi loq'ok ch'och', toj reetal naq maajun chik nekek'ul ut chanchan naq ka'ajex wi' laa'ex wankex sa'eb' li tenamit.

⁹ Jo'ka'in xwab'i chi xyeeb'al li Nimajwal Yos: “Naab'aleb' li ochoch te'juk'manq. Us ta jwal ninq ut ch'ina'usil kab'l te'wanq aran, maajun chik poyanam taawanq chisa'.

¹⁰ Xb'aan naq lajeeb' k'aam chi uub' taa'awmanq, ut moko k'i ta li b'iin tixk'e. Jun iiq chi iyaj taa'awmanq, ut yal jun chakach ajwi' chi triiw taa'elq”.

¹¹ Ra chaalel sa' xb'eeneb' li neke'atawank b'iin toj eq'la, ut naq na'ok li q'oqyink, toj yookeb' xkalajik.

¹² Junes aarp, kitaar, tzojtzoj, xolb' ut b'iin nawank junelik sa' li xninq'eheb'; ab'anan ink'a' neke'ril li xb'aanuhom li Qaawa', chi moko neke'xk'e reetal li xk'anjel li Yos.

¹³ Maak'a' xna'leb' lintenamit, jo'kan naq te'chape'q ut te'isiiq sa' xna'ajeb'. Li xninqaleb' ru winq kamkeb' re xb'aan tz'okaak ut chixjunileb' li poyanam te'chaqiq xb'aan chaqi'eel.

¹⁴ Jo'kan naq li xna'ajeb' li kamenaq yo chi nimank: kama' junaq josq' aj xul, teeto li re chi xnuq'b'aleb' li poyanam jo'wi' li xjolomileb', a'eb' li sa neke'ninq'ehik.

¹⁵ Li junjunq taakub'siiq xwankil chi junajwa ut eb' li q'etq'et te'xkub'si rib'eb'.

¹⁶ Taaterq'usiiq xloq'al li Nimajwal Yos sa' li raqb'a aatin, ut li Qaawa' tixk'ut li xsantilal rik'in xb'aanunkil li tiikilal.

¹⁷ Te'juk'e'q li tenamit ut aran, sa' li xpo'lemeb', te'ichajib'q eb' li karneer ut eb' li chib'aat.

¹⁸ Ra chaalel sa' xb'eeneb' li neke'yoob'ank rahilal rik'in li b'alaq'ik ut neke'k'amok chaq li maak jo' tawi' yookeb' chi kelonk kareet.

¹⁹ Laa'ex li nekeye: “Xseeb'aaq rib' li Qaawa' chi xb'aanunkil li naraj, re naq taaqil. Chitz'aqloq ru chi junpaat li xk'a'uxl li xSant laj Israel, re naq tqanaw”.

²⁰ Ra chaalel sa' eeb'een li nekexyehok us re li ink'a' us, ut moko us ta nekeye re li chaab'ilal; li nekek'e cho'q saqenk li aak'ab', ut li q'oqyink nekek'e cho'q kutan; li nekek'e li k'a cho'q ruuchil li ki', ut li ki' nekek'e cho'q k'a.

²¹ Ra chaalel sa' eeb'een li nekeye naq wank eena'leb' ut nekek'oxla naq seeb' leech'ool.

²² Ra chaalel sa' eeb'een li kaw eerib' chi kalaak, ut maajun naq'axok eeru chi xyiib'ankil li ha' nakaltesink.

²³ Laa'ex li natuminaak eeru chi xyeeb'al naq maak'a' xmaak li xmaakob'k, ut neketeneb' maak sa' xb'een li maak'a' xmaak.

²⁴ Jo' naq li xam naxk'at li k'im ut na'oso'k li k'ix xb'aan li raq'xam, jo'kan ajwi' naq tex'oso'q laa'ex, jo' li che' xq'aak li xxe' ut li ratz'um xhame'k kama' li pojtz'. Xb'aan naq xetz'eqtaana li xchaq'rab' li Qaawa' ut li raatin li Nimajwal Yos, li xSant laj Israel.

²⁵ Jo'kan naq xchalk xjosq'il li Qaawa' sa' xb'een li xtenamit ut xk'eheb' chi xtojb'al li xmaakeb'. Xe'eek'anje'k li tzuul sa' li xna'ajeb' ut t'ant'ookeb' sa' b'e xe'kanaak eb' li kamenaq jo'keb' li mul. Ab'anan li Qaawa' toj maji' naraqe'k li xjosq'il, ut toj yo ajwi' chi rahob'tesink.

²⁶ Rik'in eetalil xb'oq jun li tenamit wan chaq chi najt; rik'in jun xuxb' xb'oq chaq toj sa' xmaril li ruuchich'och': ilomaq arin chi junpaat, xseeb'ank chaq chi chalk.

²⁷ Maajun chaq reheb' li tenamit a'an tawajenaq malaj lub'lu, maajun reheb' natichk'ok; maajun nawark malaj naxiikank, chixjunileb' b'an yo'oon wankeb' chi yalok.

²⁸ Q'es q'es ru'ujeb' li xsimaj ut chixjunil li xna' simaj kaw kaw rixeb'. Chanchan raxjohinkil pek li rixi'ijeb' li kawaay ut li roqeb' li xkaar kama'eb' li kaqsut-iq'.

²⁹ Chanchan li kaqkoj li xyaab'eb', jo' nayaab'ak li ral li kaqkoj; naxjap re naq naxtaw li xtzak, ut naxk'am chi maajun namaq'ok chiru.

³⁰ Naq taawulaq xkutankil, li tenamit a'an tixjap chaq re jo' xyaab' li palaw naq taachalq sa' xb'eeneb' laj Israel; ut wi wank junaq taaril li ruuchich'och', tixk'e reetal naq junes aak'ab' ru ut rahil ch'oolej, ut maak'a'aq chik li saqenk xb'aan li choql.